Yilinga ya Apostolo 26:1-32
26 Akripa yamba kuli Paulu ngwenyi: “Tunakutayiza uhanjike mukulisambisa.” Chocho, Paulu yolola kwoko lienyi ni kuputuka kulisambisa ngwenyi:
2 “Ngunawahilila Mwanangana Akripa se mungulisambisa kumeso jenu musono ha yuma yize yeswe A-Yunda anangusumu.
3 Kuhiana chikolo, mumu unanyingika ndako jeswe ja A-Yunda ni kuhamika cho. Ngunaliumbu ngwami, ungwivwe kama ni uhumikizo.
4 “Kwamba pundu, ndako jize napwile najo chize ku ukweze mukachi ka atu jami ni mu Yerusaleme, A-Yunda eswe
5 waze angunyingika ha miaka yinji kananyingika ngwo, natwamine ngwe Ka-Fwariseu kulita ni malongeso eswe waze uwayilo wetu wakulongesa. Nyi maazanga o mahasa kupwa yela ha chikuma chino.
6 Haliapwila, kanangusopesa mumu lia kutalatala cha chilakenyo chize Zambi alakenyene kuli tulamba twetu.
7 Mavungu jetu 12 kakushimbwila kumona umanunuko wa chilakenyo chino. Kashika akulingila Zambi ufuku ni mwalwa. Mwanangana, A-Yunda kanangusumu mulonga mumu lia chilakenyo chino.
8 “Mumu liaka chili chikalu kufuliela ngwenu, Zambi mahasa kuhindwisa afu?
9 Chamwenemwene, yami mwene nanyongene ngwami, changutamba kulinga yuma yeka ni yeka hanga ngujimune jina lia Yesu Ka-Nazare.
10 Yino ye nalingile mu Yerusaleme. Nasele asandu anji mu zuwo lia ususu mumu natambwile chiyulo chacho kuli miata a asasendote. Chikwo nawa, muze apwile ni kwapatwila hanga aashihe ni yami napwile ni kuchitayiza.
11 Ha yisuho yinji naamwesene lamba mu masunangonga ni kwashinjila kulikala ufulielo wo. Yingwevwila ufwatulo unji, yingwahungumiona ndo ku mambonge a kusuku.
12 “Chino che chikuma te chinangutwala ku Ndamaseku, ni ndundo ni chiyulo chize natambwile kuli miata a asasendote.
13 Mwanangana, muze te nguli mu jila ha muchima-tangwa, yingumona pangu linakatuka mwilu liahiana pangu lia tangwa lize liangujingilikile yami ni waze nayile no.
14 Muze yetweswe hitwalimbukila hashi, yingwivwa liji mu limi lia Hepreu ngwo: ‘Saulu, Saulu, mumu liaka unanguhungumiona? Kulimika ni yami muchikulinga upi* yena mwene.’
15 Yingumukumbulula ngwami: ‘Yena iya?’ Iye yamba ngwenyi: ‘Yami Yesu yoze unahungumiona.
16 Alioze, yamba kuli yami ngwenyi, katuka umane. Hinasoloka kuli yena hanga upwe kavumbi kami ni chela chami ha yuma yize hiwamona ni yize mungukakusolwela hakutwala kuli yami.
17 Mungukupulula kuli atu ni ku mavungu waze mungukutuma
18 ulawise meso jo, waachize ku milima ni kwaneha ku pangu, waatusule ku chiyulo cha Satana ni kwaneha kuli Zambi hanga akatambule ukonekeno wa shili yo ni chihinga hakachi ka waze haanasela ku usandu ha kufuliela muli yami.’
19 “Kashika, Mwanangana Akripa chakolemene ku usolwelo wa mwilu,
20 alioze nambujolwele hatangu kuli waze atwama ku Ndamaseku, ni ku Yerusaleme, ni ku chifuchi cheswe cha Yundeya, ni kuli akwa-mavungu ngwami, chatamba kulikonyeka akatewulukile kuli Zambi, akalinge yitanga yakulita ni kulikonyeka.
21 Hamukunda wa yino yuma, A-Yunda angukwachile mu tembele ni kweseka kungushiha.
22 Alioze, ni ukwaso wa Zambi ngunanungu ni kwambujola kuli akepe ni kuli anene ndo musono. Chambile nichimwe chuma chikwo, shina yuma yize te muyilingiwa ngwe chize ambile Aprofeta ni Mose,
23 ngwo, Kristu chamutamba kumona lamba ni kupwa mutangu kumuhindwisa hakachi ka afu hanga akanehe pangu kuli atu wano ni kuli akwa-mavungu.”
24 Muze Paulu te machihanjika ha kulisambisa, Fesetu yakololoka ni liji linene ngwenyi: “Paulu, unazaluka! Kulilongesa che chinji chinakuzalwisa!”
25 Alioze, Paulu yakumbulula ngwenyi: “Chazalukile, Fesetu Mulemu Wahiana, ngunahanjika maliji a umwenemwene ni a mana.
26 Mumu kwamba pundu, mwanangana yoze ngunahanjika nenyi kananyingika kanawa yino yuma. Nguli ni shindakenyo ngwami, nichimwe cha ku yuma yino chize kunwanyingikine chakuhi. Mumu yuma yacho kuyakalingiwile ku tenga.
27 Mwanangana Akripa, shina nwakufuliela muli Aprofeta nyi? Ngunanyingika ngwami, nwakwafuliela.”
28 Chocho, Akripa yamba kuli Paulu ngwenyi: “Kwasala hakehe wika kachi wangupwisa Mukwa-Kristu.”
29 Paulu ngwenyi: “Chipwe ha shimbu likepe hanji ha shimbu linene, nakulemba kuli Zambi ngwami, yenu ni atu eswe waze anangwivu musono apwe ngwe yami, alioze hi mu malenge wano ko.”
30 Mwanangana, nguvulu, Mberenise hamwe ni waze atwamine no yakatuka.
31 Ha kutuhuka, yaputuka kulihanjikisa umwe ni mukwo ngwo: “Lunga yono keshi kulinga nichimwe chakutela kufwa hanji kumusa mu zuwo lia ususu.”
32 Mba Akripa yamba kuli Fesetu ngwenyi: “Nyi lunga yono kakaliumbile hanga aye kuli Sezare, kachi twamutusula.”
Footnotes
^ Chize Alisonekene, “kulichoka ku misongolwela.”
