Yilinga ya Apostolo 28:1-31
28 Muze te hitwalilamwina, yitunyingika ngwetu tungu liacho kakulivuluka ngwo Melita.
2 Atu a ha tungu liacho katusolwelele utu unji. Vula yaputuka kunoka yikupwa nawa chishika chinji, kashika o yawika kahia ni kututambula kanawa.
3 Paulu yakunga jimwe tete, muze hajisa ha jiko, yihatuhuka umwe chihili mumu lia chivukuminya, yamusuma ku kwoko.
4 Muze akwa-tungu hamona chihili kanasukama ku kwoko lienyi, yaliamba umwe ni mukwo ngwo: “Chamwenemwene, lunga yono mukwa-kushiha atu, mumu chipwe ngwe kalilamwina mu kalunga-lwiji hindu Ululi* kuwamutayijile kununga ni mwono.”
5 Alioze, Paulu yakukumwina chihili ha kahia, kevwile yikola niyimwe.
6 O yatala nyi majimba hanji malimbuka hashi susumuku ni kufwa. Muze te hatalatala ha shimbu linene, alioze nichimwe chipi kuchalingiwile kuli iye, o yalumuna manyonga jo ni kuputuka kwamba ngwo, pundu yono kali umwe zambi.
7 Hakamwihi ni chihela chize, kwapwile minda ya mukwa-kuyula tungu jina lienyi Pupiliu. Iye yatusambilila, yatuzumbula. Chikwo nawa, yitutwama ku zuwo lienyi ha matangwa atatu.
8 Tato ya Pupiliu te kanapombo ni kachiki ni kulokoka mu jimo, chocho Paulu yaya kuli iye yalemba ni kusayika moko jenyi hali iye mba yamuuka.
9 Alioze, muze halinga chino, mieji akwo eswe a mu tungu yeza ni kumufupa, no yaauka.
10 Chikwo nawa, o katulemesele chinji ha kutwaha yawana. Mba muze te himutuya o yatwaha yeswe yize te tunafupiwa.
11 Kulutwe lia tukweji atatu, yitunjila mu ulungu wa ku Alexandria uze watwamine mu tungu yacho ha mashimbu a chishika. Chilayi cha ulungu wacho chapwile “Ana-Apasa a Zeuse.”
12 Yituheta ku Serakusa kuze twatwamine matangwa atatu.
13 Kukatuka kukuze, yitununga ni wenyi ndo ku Rejiu. Ha kupalika cha tangwa limuwika, fuji ya ku sule yiyiputuka kupekumuka. Ha tangwa liamuchiali yituheta ku Puteolu.
14 Ako yituwanako mandumbu waze aliumbile kuli yetu tutwame hamwe no matangwa shimbiali. Chocho yituheta ku Roma.
15 Muze mandumbu evwile sango hakutwala kuli yetu, yeza ni kutupatwiza ku yitanda ya Apiu ni ku Mazuwo Atatu a kutulila ngeji. Muze Paulu aamwene yasakwilila Zambi, yajikiza mu mbunge.
16 Muze twahetele ku Roma, yaatayiza Paulu kutwama ukawenyi ni umwe swalale yoze te mamufunga.
17 Kulutwe lia matangwa atatu, iye yasanyika malunga alemu ja A-Yunda. Muze alikungulwile, Paulu yamba kuli ayo ngwenyi: “Mandumbu, chipwe ngwe chalingile nichimwe chakulimika ni atu hanji ni mianda ya tulamba twetu, nihindu kangusele mu zuwo lia ususu ku Yerusaleme ni kungukunjika ku moko ja A-Roma.
18 Muze te hangusopesa, o yaazanga kungutusula mumu kakawanyine chitela chize te mangushihila.
19 Mba muze A-Yunda alitunyine, yinguliumba hanga Sezare akasope mulonga wami, alioze chishi kwami ni chuma chakusumina vungu liami mulonga.
20 Kashika nanusanyika hanga ngunumone ni kuhanjika ni yenu mumu kanangukase ni malenge wano hamukunda wa kutalatala chize A-Izalele alinacho.”
21 O yamukumbulula ngwo: “Yetu kutwatambwile mukanda kukatuka ku Yundeya hakutwala kuli yena. Chikwo nawa, niumwe wa kuli mandumbu jetu waze akatukileko watulwezele chipwe kuhanjika chimwe chuma chipi hakutwala kuli yena wakuhi.
22 Chapema chinji kwivwa yize wakunyonga. Mumu kwamba umwenemwene, yuma yize tunanyingika hakutwala ku uwayilo uno wakukaula Yesu, yili yize akwa-kulimika ni uwayilo wacho akwamba ku yihela yeswe.”
23 Ayo yatesa tangwa lize te mahanjika ni Paulu. Ha chisuho chacho yikwiza atu anji ku zuwo kuze Paulu te atwama. Chize ku chimenemene ndo ufuku, Paulu yaambulwila kanawa hakutwala ku Wanangana wa Zambi ni kweseka kwakununa hakutwala kuli Yesu kulita ni Shimbi ya Mose ni mikanda ya Aprofeta.
24 Amwe yatayiza yuma yize anakalumbunwina, alioze akwo kayitayijile.
25 Amu kwakapwile kulivwashana hakachi ko, yaputuka kuyaya kwo, mba Paulu yamba wika maliji wano ngwenyi: “Spiritu yisandu yahanjikile kanawa kuli tulamba twenu kupalikila muli profeta Izaia ngwo:
26 ‘Yako kuli atu wano ukambe ngwe: “Yenu kwivwa munukevwa, alioze kuyichi kanulumbunuka chipwe hakehe, mba kutala munukatala, alioze kunuchi kamona chipwe hakehe.
27 Mumu mbunge ja atu wano hijinakale mbe, ayo hanajiki matwi ni kufuka meso jo, hanga ahone kumona ni meso jo, chipwe kwivwa ni matwi jo, chipwe kunyingika ni mbunge jo hanga alikonyeke, yami ngwauke.”’
28 Kashika, nyingikenu ngwenu, ulamwino wa Zambi kautuma kuli akwa-mavungu, o nawa kumakapanjika.”
29 * ——
30 Chocho, Paulu yatwama miaka yaali yamuwundu mu zuwo lize te akufwetela lukeza. Iye te kakutambula kanawa atu waze apwile ni kuya ni kumutala.
31 Ni kwambulwila Wanangana wa Zambi ni kulongesa hakutwala kuli Mwene Yesu Kristu ni hamu lieswe chakuhona chikwiko.
Footnotes
^ Mu limi lia Ngregu liji Díke, kota linatale hali kazambi wa pwo yoze wakukala ni ululi. Hanji ha ululi uze kuushi kumoneka.
^ Tala Apendice A3.
