Yilinga ya Apostolo 9:1-43
9 Saulu te kasolo kulitwamina kuhalila kushiha tumbaji twa Mwene, chocho yaya kuli mwata wa asasendote
2 hanga amwite mikanda yakunjila nayo mu masunangonga a mu Ndamaseku, mumu te kanazange kukwata atu eswe, malunga ni mapwo waze apwile ni kukaula Jila ya Mwene hanga aakase ni kwaneha mu Yerusaleme.
3 Shimbu te achili mu wenyi, muze te anakundama mu Ndamaseku, susumuku kwahenyene limwe pangu kukatuka mwilu lize liamujingilikile.
4 Chocho iye yalimbukila hashi, mba yevwa limwe liji lize liambile ngwo: “Saulu, Saulu, mumu liaka unanguhungumiona?”
5 Saulu yahula ngwenyi: “Yena iya?” Iye yakumbulula ngwenyi: “Yami Yesu, yoze unahungumiona.
6 Alioze yamulweza ngwenyi, katuka unjile mu mbonge, mba makulweza yize watamba kulinga.”
7 Malunga waze endele nenyi, yamana kikili, kahashile kwamba liji nilimwe, yevwa liji alioze kamwene mutu niumwe.
8 Saulu yakatuka hashi, chipwe ngwe meso jenyi te kanalaula nihindu kahashile kumona nichimwe. Kashika yamukwata ku kwoko ni kumutwala ndo ku Ndamaseku.
9 Ha matangwa atatu iye kamwene chuma nichimwe, kalile chipwe kunwa.
10 Mu Ndamaseku mwapwile umwe kambaji jina lienyi te Ananiya, Mwene yahanjika nenyi mu usolwelo ngwenyi: “Ananiya!” Iye yakumbulula ngwenyi: “Yami uno Mwene.”
11 Mwene yamba kuli iye ngwenyi: “Katuka uye ku tapalo lize avuluka ngwo Lialulama, ufupe mu zuwo lia Yundase umwe lunga jina lienyi Saulu, wa ku Tarsu. Mumu ha shimbu lino kanalembe,
12 mba hamona mu usolwelo umwe lunga jina lienyi Ananiya, kananjila asayike moko jenyi hali iye hanga meso jenyi alaule.”
13 Chocho Ananiya yakumbulula ngwenyi: “Mwene, nakwivwa atu anji akuhanjika hakutwala kuli lunga yono, ni yuma yipi yize iye akulinga kuli asandu je mu Yerusaleme.
14 Iye kejile kuno ni chiyulo chize amuhele kuli asasendote a lutwe cha kukwata* atu eswe waze akutambika mu jina lienu.”
15 Alioze, Mwene yamba kuli iye ngwenyi: “Yako! Mumu lunga yono hapwa ngwe chikwachilo kuli yami chize hingunatongola kulu akatwale jina liami kuli akwa-mavungu, ni mianangana ni ana ja Izalele.
16 Mumu mungumulweza lamba lieswe lize makamona mumu ha jina liami.”
17 Mba Ananiya yaya yanjila mu zuwo, yasayika moko jenyi hali iye ni kwamba ngwenyi: “Ndumbwami Saulu, Mwene Yesu yoze wasolokele kuli yena mu jila yize wejile, kangutuma hanga ulaule meso je uzale too ni spiritu yisandu.”
18 Hazehene mu meso ja Saulu himuholoka yuma yalifwa ngwe mahalo, chocho yaputuka kumona cheka. Yakatuka mba Ananiya yamupapachisa.
19 Muze Saulu te halia, yevwa tachi.
Chocho yatwama amwe matangwa hamwe ni tumbaji mu Ndamaseku.
20 Hazehene yaputuka kwambujola mu masunangonga hakutwala kuli Yesu ngwo, iye Mwana wa Zambi.
21 Alioze eswe waze amuvwile yalishimwoka ni kwamba ngwo: “Lunga au hi yoze ko washihile atu waze te akutambika jina lia Yesu mu Yerusaleme nyi? Chuma chamunehene kuno ngwami chapwile kukwata ni kutwala* atu jacho kuli asasendote a lutwe?”
22 Chipwe chocho Saulu watakamine kuhiana ni kukomwesa A-Yunda waze te atwama mu Ndamaseku, ha kwasolwela ni shindakenyo ngwenyi, Yesu mwe Kristu.
23 Kashika, hakupalika cha matangwa anji, A-Yunda yamutwama punga hanga amushihe.
24 Alioze Saulu yevwa hakutwala ku punga yo. Kashika o afungile mapito eswe mwalwa ni ufuku hanga amushihe.
25 Alioze ha ufuku, tumbaji yamutwala yamuzeza mu chituwa cha mu chipanga ni kumusunwisa hashi mu chimwe chisoka chinene.
26 Muze ahetele mu Yerusaleme, iye yazanga kulichinga ni tumbaji akwo, alioze o yamuvwila woma mumu katayijile ngwo neye te hapwa kambaji.
27 Kashika Mbarnabe yeza ni kumukwasa, yamutwala kuli apostolo, mba yaalumbunwina mu yimako-yimako chize Saulu amwene Mwene mu jila, chize Mwene ahanjikile nenyi ni chize nawa Saulu ahanjikile ni hamu mu jina lia Yesu ku Ndamaseku.
28 Chocho Saulu yanunga hamwe no, yendangana mu* Yerusaleme mweswe, ni kulongesa ni hamu mu jina lia Mwene.
29 Iye wahanjikile ni kulihangujola ni A-Yunda waze apwile ni kuhanjika limi lia Ngregu, alioze o afupile kumushiha.
30 Muze tumbaji* achivwile, yamutwala ku Sezarea ni kumutuma ku Tarsu.
31 Chocho yikungulwila yeswe ya mu Yundeya, Ngalileya ni Samaria yapwile ni sambukila ni kujama chinji. Chikwo nawa, yikungulwila yokele mumu yendele mu jila* ya Yehova* ni kutwama kulita ni ukwaso wa spiritu yisandu.
32 Amu Petulu apwile ni kulinga wenyi mu chifuchi cheswe, yapalumuka hanga ameneke tumbaji* waze te atwama mu Lita.
33 Yawanamo umwe lunga jina lienyi Eneya yoze wapwile ha muhela ha miaka nake mumu te kayiza musongo wa kalepa.
34 Petulu yamba kuli iye ngwenyi: “Eneya, Yesu Kristu kakuuka. Katuka wale muhela we.” Hazehene iye yanyangumuka.
35 Muze atu eswe waze te atwama mu Lita, ni mu Chana cha Sarone amwene yize yalingiwile kuli Eneya, yaafuliela muli Mwene.
36 Mu Yopa mwapwile umwe kambaji yoze te avuluka ngwo Tavwita, jina lize linalumbunuka ngwo, “Ndorkase.” Iye kapwile ni kulinga yuma yinji yipema ni kukwasa yiswale.
37 Ha matangwa waze iye yayiza, chocho yafwa. Kashika, yamusanyisa yamusa mu chipatulo cha kwilu.
38 Amu Lita yapwile hakamwihi ni Yopa, kashika muze tumbaji a mu Yopa hevwa ngwo Petulu ku Lita ali, yaamutumina malunga aali ni kumwita ngwo: “Lisesa tweya kama kuno, kanda ushimbula.”
39 Chocho Petulu yalilulieka, yaya hamwe no. Muze aheteleko yamutwala ku chipatulo cha kwilu, mba tuliwa eswe yaamujingilika ni kulila ni kusolola yikuto ni mahina aze atongele Ndorkase shimbu apwile hamwe no.
40 Alioze Petulu yatuhwisa eswe, yasa makungunwa hashi yalemba. Ha kutewulukila ku mujimba, yamba ngwenyi: “Tavwita, hinduka!” Pwo yalaula meso jenyi, mba ha kumona Petulu yatwama.
41 Petulu yamukwata ku kwoko yamukatwisa, mba yasanyika tumbaji* ni tuliwa yamuhana kuli ayo wa mwono.
42 Mbonge yeswe ya Yopa yachivwa, chocho atu anji yaafuliela muli Mwene.
43 Petulu yatwama matangwa anji mu Yopa hamwe ni Semone mukwa-kukotongola malambu.
Footnotes
^ Chize Alisonekene, “cha kukasa.”
^ Chize Alisonekene, “kwatwala a kukasa.”
^ Chize Alisonekene, “wanjiliele ni kutuhwoka.”
^ Chize Alisonekene, “mandumbu.”
^ Chize Alisonekene, “yevwililile woma.”
^ Tala Apendice A5.
^ Chize Alisonekene, “asandu.”
^ Chize Alisonekene, “asandu.”
