Asonekene Yoano 1:1-51
1 Ku uputukilo kapwile Liji, mba Liji liapwile hamwe ni Zambi, lie Liji liapwile umwe zambi.
2 Iye kapwile ni Zambi ku uputukilo.
3 Yuma yeswe kayitangile kupalikila muli iye, kakatangile chuma nichimwe chakuhona kupalikila muli iye.
Yuma yize atangile
4 kupalikila muli iye yili mwono, mba we mwono wapwile pangu lia atu.
5 Pangu linapanguka mu milima, alioze milima kuyalikumbile.
6 Kwejile umwe lunga yoze atumine kuli Zambi; jina lienyi Yoano.
7 Lunga yono kejile ngwe chela, hanga ahane uchela wa pangu, mba atu a mutapu weswe afuliele kupalikila muli iye.
8 Pangu liacho te hi iye ko, alioze kejile hanga ahane uchela wa pangu liacho.
9 Pangu liamwenemwene lize te mulitemuna hali atu a mutapu weswe, te kwasala hakehe hanga lize hashi.
10 Iye kapwile hano hashi, ni he hashi hatangiwile mumu lia iye, alioze akwa-hashi kamunyingikine.
11 Iye kejile kuli atu jenyi, alioze ayo kamutayijile.
12 Mba waze eswe amutayijile, iye yaaha uhashi wa kupwa ana ja Zambi, mumu kafulielele mu jina lienyi.
13 Ayo kakasemukine ku manyinga chipwe ku upale wa musunya hanji wa atu, alioze ku upale wa Zambi.
14 Kashika, Liji yilipwa musunya, yilitwama ni yetu, yetu yitumona uhenya walio, umwe uhenya ngwe wa mwana wa wika wa umwe tata; iye te wa too ni vumbi lia Zambi ni umwenemwene.
15 (Yoano yahana uchela hakutwala kuli iye, yakololoka ngwenyi: “Yono mwe nanulwezele ngwami: ‘Yoze uneza kunyima liami hanguhiana, mumu iye wapwileko kulu shimbu yami te kanda nguchisemuka.’”)
16 Mumu yetu eswe, hitwatambula ku kulumbama chenyi chawana cha keke yinene ya Zambi.
17 Mumu Shimbi kayihanyine kupalikila muli Mose, alioze chawana cha keke ni umwenemwene, yiyiza kupalikila muli Yesu Kristu.
18 Niumwe mutu kanda achimona Zambi nilimwe tangwa; zambi wa wika uli sali lia Tata, Mwe wamusolola.
19 Uno we uchela uze Yoano ahanyine, muze A-Yunda atumine asasendote ni A-Levi a ku Yerusaleme hanga amuhule ngwo: “Yena iya?”
20 Iye kakalitunyine kukumbulula, alioze yaalweza pundu ngwenyi: “Kristu hi yami ko.”
21 Ayo yamuhula ngwo: “Mba yena iya? Shina uli Eliya?” Iye yaakumbulula ngwenyi: “Ka hi yami ko.” “Shina uli Profeta?” Iye yaakumbulula ngwenyi: “Ka!”
22 Kashika yamuhula ngwo: “Yena uli iya? Tulweze hanga tuye tukumbulule kuli waze atutumanga. Kuchi wakulivuluka yena mwene?”
23 Iye yamba ngwenyi: “Yami nguli liji lia yoze unakololoka mu puya ngwo: ‘Lulamisenu jila ya Yehova,’* ngwe chize profeta Izaia ambile.”
24 Atu jacho waze atumine, kakatukile kuli A-Fwariseu.
25 Yamuhula nawa ngwo: “Mba mumu liaka unapapachisa atu, nyi yena hi uli Kristu ko, hanji Eliya chipwe Profeta?”
26 Yoano yaakumbulula ngwenyi: “Yami nakupapachisa mu meya. Hakachi kenu hali umwe yoze kunwanyingikine,
27 yoze meza kunyima liami, yami chishi ni ulite wa kukasulula muya wa sapato jenyi.”
28 Yuma yino yinakalingiwa ku Mbetaniya, mu sali lia lwiji Yordau, kuze Yoano apwile ni kupapachishila atu.
29 Muze hikwacha, Yoano yamona Yesu kaneza kuli iye, yamba ngwenyi: “Talenu, Mwana-panga wa Zambi, yoze wakuchiza shili ya akwa-hashi!
30 Yono kali mutu yoze nambile ngwami: ‘Kunyima liami mukwiza mutu yoze maya kulutwe liami, mumu iye te kwe apwile shimbu yami te kanda nguchisemuka.’
31 Chipwe yami te chamunyingikine, hachikuma chino kashika neza ni kumupapachisa mu meya hanga amunyingike mu Izalele.”
32 Yoano yahana nawa uchela uno hakwamba ngwenyi: “Ngunakamona spiritu yinahulumuka mu malilu ngwe katele, ni kutwama hali iye.
33 Chipwe yami mwene te chamunyingikine, alioze Yoze wangutumine hanga ngupapachise mu meya, yamba kuli yami ngwenyi: ‘Mutu yoze mumona spiritu yinahulumuka ni kutwama hali iye, mwe mukwa-kupapachisa ni spiritu yisandu.’
34 Yami yinguchimona, mba yinguhana uchela ngwami, yono mwe Mwana wa Zambi.”
35 Muze te hikwacha, Yoano te kanamana cheka nawa kuzekwene, hamuwika ni tumbaji twenyi aali,
36 ha kumona Yesu kanapalika, yamba ngwenyi: “Talenu, Mwana-panga wa Zambi!”
37 Muze tumbaji aali evwile chino, yakaula Yesu.
38 Yesu yatewuluka, yamona ayo kanamukaula, yaahula ngwenyi: “Yika nunafupu?” Ayo yamba kuli iye ngwo: “Rabi, kulihi nunatwama?” (jina Rabi linalumbunuka “Longeshi.”)
39 Iye yaalweza ngwenyi: “Tweyenu numone.” Chocho ayo yaya, yamona kuze te anatwama, ha tangwa liacho ayo yatwama nenyi. Te ha ola yamuchikumi.
40 Andeleu, mwana-kwo ya Semone Petulu, kali umwe wa kuli tumbaji aali waze evwile maliji ja Yoano mba yakaula Yesu.
41 Iye yawana chitangu yayo Semone, yamulweza ngwenyi: “Twawana Mesaya” (jina Mesaya linalumbunuka “Kristu”),
42 kashika yamutwala kuli Yesu. Muze Yesu hamumona, yamba ngwenyi: “Yena uli Semone, mwana wa Yoano. Makakuvuluka ngwo Sefwa” (jina Sefwa linalumbunuka “Petulu”).
43 Muze hikwacha, Yesu yazanga kuya ku Ngalileya. Chocho yawana Fwilipe, yamulweza ngwenyi: “Pwako kambaji kami.”
44 Fwilipe kumahio te ku Mbeteseta, mbonge ya Andeleu ni Petulu.
45 Fwilipe yawana Natanele, yamulweza ngwenyi: “Hitwawana yoze Mose asonekene mu Shimbi, yoze nawa Aprofeta asonekene: Yesu, mwana wa Yosefwe wa ku Nazare.”
46 Alioze, Natanele yamuhula ngwenyi: “Shina ku Nazare mukuhasa kukatuka chuma chipema?” Fwilipe yamukumbulula ngwenyi: “Tweya hanga umone.”
47 Yesu yamona Natanele kanakundama, yamba hakutwala kuli iye ngwenyi: “Talenu Ka-Izalele wamwenemwene kaneza, yoze keshi kalimbalimba.”
48 Natanele yamuhula ngwenyi: “Kuchi unangunyingika?” Yesu yamukumbulula ngwenyi: “Muze Fwilipe te kanda achikusanyika, yami nakumonanga te unatwama mushi lia mutondo wa mukuyu.”
49 Natanele yamulweza ngwenyi: “Longeshi, yenu nuli Mwana wa Zambi, nuli Mwanangana wa Izalele.”
50 Yesu yamukumbulula ngwenyi: “Shina unatayiza mumu namba ngwami, nakumonanga mushi lia mutondo wa mukuyu? Alioze kumukamona yuma yinene kuhiana yino.”
51 Chocho iye yamulweza ngwenyi: “Ngunanulweze pundu ngwami: Yenu munukamona lilu liawashi ni angelo ja Zambi kanazezuka ni kuhulumuka kuli Mwana-mutu.”
Footnotes
^ Tala Apendice A5.
