Asonekene Yoano 12:1-50
12 Muze te hikwasala matangwa asambano hanga alinge Chizomboka, Yesu yaheta ku Mbetaniya, kuze Lazaru, yoze ahindwishile hakachi ka afu apwile.
2 Kuzekwene, yamululiekela kulia cha chingoloshi; Marta mwe te unahana kulia, alioze Lazaru kapwile umwe wa kuli waze te anali ni Yesu.
3 Maria yanda chipinji cha mulangi* wa maji a vumba lipema, a ndando yinji, yazujila ku molu ja Yesu, yaakusumuna ni kambu jenyi. Zuwo yilizala too ni vumba lipema lia maji.
4 Alioze Yundase Ka-Keriote, umwe wa kuli tumbaji twenyi, yoze te unambe kumukunjika yamba ngwenyi:
5 “Mumu liaka kalanjishile maji wano a vumba lipema ha 300 ja ndenariu,* ni kuhana mbongo jacho kuli yiswale?”
6 Kwamba pundu, iye kakambile maliji wano ngwe kanalihulumba hali yiswale, alioze mumu te mwiji, iye mwe wapwile ni kufunga mushete wa mbongo, te kakwiya mbongo jize apwile ni kusamo.
7 Alioze Yesu yamba ngwenyi: “Mwechenu, kanda numupinjisa, mumu kanaliange kulinga yize makalinga ha tangwa lia kungufunda.
8 Mumu yiswale kali hamwe ni yenu matangwa eswe, alioze yenu, kunuchi kupwa ni yami matangwa eswe.”
9 Alioze, mbunga yinene ya A-Yunda yanyingika ngwo iye te kali ku Mbetaniya, yayako hi mumu lia Yesu wika ko, alioze nawa hanga amone Lazaru yoze iye ahindwishile hakachi ka afu.
10 Asasendote a lutwe yatwama punga hanga ashihe nawa Lazaru,
11 mumu A-Yunda anji apwile ni kuyako mumu lia iye, ni kufuliela muli Yesu.
12 Muze hikwacha, mbunga yinene ya atu waze ayile ku chiwanyino, yevwa ngwo Yesu kanakundama ku Yerusaleme.
13 Mba yanda mitango ya yingaji, yaya ni kumupatwiza ni kukololoka ngwo: “Tunaliumbu kuli yenu, mulamwina! Kawaha yoze uneza mu jina lia Yehova,* kawaha Mwanangana wa Izalele!”
14 Yesu yawana mwana-chimbulu, yatwamaho ngwe chize hanasoneka ngwo:
15 “Kanda wivwa woma mwana-pwo wa Zaione. Tala! Mwanangana we kaneza, kanatwama helu lia mwana chimbulu.”
16 Ku uputukilo, yuma yino kuyakalumbunukine kuli tumbaji twenyi, alioze muze Yesu ahilukile mu malilu, ayo yeuluka ngwo, yuma yacho kayisonekene hakutwala kuli iye, ni atu te mayilinga hali iye.
17 Atu waze apwile hamwe nenyi muze iye asanyikine Lazaru hanga atuhuke mu fuka ni kumuhindwisa hakachi ka afu, kapwile ni kuhana uchela.
18 Kashika mbunga ayile kuli iye, mumu kevwile ngwo kanakalinga chilayi chino.
19 Kashika, A-Fwariseu yaliamba hakachi ko ngwo: “Tunamono ngwe kutwahashile nichimwe. Talenu! Atu eswe kanamukaula.”
20 Amwe A-Ngresia kapwile hakachi ka atu waze ayile ni kuwayila Zambi ha chiwanyino.
21 Ayo yakundama kuli Fwilipe wa ku Mbeteseta ya mu Ngalileya, yamwita ngwo: “Mwene, tunazange kumona Yesu.”
22 Fwilipe yaya ni kulweza Andeleu. Mba Andeleu ni Fwilipe yahanjika ni Yesu.
23 Alioze Yesu yaakumbulula ngwenyi: “Ola yakuhalisa Mwana-mutu hiyaheta.
24 Ngunanulweze pundu ngwami, nyi luchichi wa tiliku maholoka hashi kafwile, manunga ni kupwa luchichi umuwika; alioze nyi mafwa mema mihuko yinji.
25 Yoze mazanga mwono wenyi, mautokesa, alioze yoze matokesa mwono wenyi mu chifuchi chino, makaufunga hanga akapwe ni mwono wa mutolo.
26 Nyi mutu mazanga kungulingila, angukaule, kuze yami mungupwa, kavumbi kami neye kwe makapwa nawa. Nyi umwe mutu mazanga kungulingila, Tata makamuhalisa.
27 Haliapwila yami ngunanenganyana, mba yika mungwamba? Tata, ngulamwine ku ola yino, alioze nejile mumu lia chino, mumu lia ola yino.
28 Tata, halisa jina lie.” Mba liji yiliza kukatuka mwilu ngwo: “Hingunalihalisa, mungulihalisa cheka nawa.”
29 Mbunga waze apwileho yevwa liji liacho, yaputuka kwamba ngwo kwakulunguza. Akwo yamba ngwo: “Umwe mungelo wahanjika nenyi.”
30 Yesu yakumbulula ngwenyi: “Liji lino kuliejile mumu lia yami, alioze lieza mumu lia yenu.
31 Haliapwila upatwilo wa hano hashi unalingiwa, haliapwila nguvulu wa hano hashi kumamuhuma.
32 Alioze, muze manguzundula hano hashi, mungukaneha atu a mutapu weswe kuli yami.”
33 Kwamba pundu, kambile chino hanga asolole mutapu wa kufwa chenyi.
34 Kashika, mbunga yamukumbulula ngwo: “Hitunevu mu Shimbi ngwo Kristu manunga ku miaka yeswe, mba kuchi unambe ngwe Mwana-mutu katamba kumuzezeleka? Mwe Mwana-mutu wacho iya?”
35 Yesu yamba kuli ayo ngwenyi: “Pangu mulipwa mukachi kenu ha mashimbu akehe. Endenu shimbu nuchili ni pangu, hanga milima yichine kunukumba. Yoze unende mu milima keshi kunyingika kuze anayi.
36 Shimbu nuchili ni pangu, fulielenu pangu hanga nupwe ana a pangu.”
Muze Yesu hamba yuma yino, yaya kwenyi, yaswama hanga ayo ahone kumumona.
37 Chipwe ngwe kalingile yilayi yinji kumeso jo, nihindu kafulielele muli iye,
38 hanga maliji ja profeta Izaia amanunuke, anambe ngwo: “Yehova,* iya yoze wafuliela ha yize twahanjika? Kuli iya asolwele kwoko lia Yehova?”*
39 Izaia kambile nawa yuma yize te muyakwika hanga ahone kufuliela, hakusoneka ngwenyi:
40 “Iye hanapupuchisa meso jo, hanakalisa mbunge jo, hanga ahone kumona ni meso jo, chipwe kunyingika ni mbunge jo, kuchina malikonyeka hanga yami ngwauke.”
41 Izaia kambile yuma yino mumu kamwene uhenya wenyi, kashika ahanjikile hakutwala kuli iye.
42 Kwamba pundu, chipwe lume akwa-kuyula anji ja A-Yunda, no kapwile ni kufuliela muli iye, alioze mumu lia A-Fwariseu te keshi kumutayiza ha mbunga, hanga ahone kwahuma mu sunangonga,
43 mumu ayo kazangile chinji lufuma wa atu kuhiana lufuma wa Zambi.
44 Kashika, Yesu yakololoka ni liji mwilu ngwenyi: “Yoze mangufuliela, kafulielele wika yami, alioze kafuliela nawa muli yoze wangutumine,
45 yoze unangumono, kanamono nawa Yoze wangutumine.
46 Yami nejile ngwe pangu hano hashi, hanga mweswawo mafuliela muli yami ahone kununga mu milima.
47 Alioze nyi umwe mevwa maliji jami mba kechi kwakaula, yami chichi kumusopesa, mumu kuchejile ni kusopesa akwa-hashi, alioze neza hanga ngwalamwine.
48 Yoze mangulelesa ni kulituna maliji jami, kali ni yoze mamusopesa. Maliji waze namba, e makamusopesa ha tangwa lia kasula.
49 Mumu chahanjikile ku nyonga lia yami mwene, alioze Tata yoze wangutumine, mwe wanguhele shimbi ha yize mungwamba ni yize munguhanjika.
50 Ngunanyingika ngwami, shimbi yenyi yinalumbunuka mwono wa mutolo. Kashika yuma yeswe nakuhanjika, nakuyamba kulita ni chize Tata angulwezele.”
Footnotes
^ Tala Apendice B14.
^ Tala Apendice B14.
^ Tala Apendice A5.
^ Tala Apendice A5.
^ Tala Apendice A5.
