Asonekene Yoano 13:1-38
13 Muze Chiwanyino cha Chizomboka te kanda chichiheta, Yesu te kananyingika ngwenyi, ola ya kuhichika hano hashi hanga aye kuli Tato hiyaheta. Kashika, amu te akuzanga atu jenyi waze atwama hano hashi, iye yaazanga ndo ku songo.
2 Ayo te kanali, Ndiapu te hasa kulu mu mbunge ya Yundase Ka-Keriote, mwana Semone, nyonga lia kukunjika Yesu.
3 Yesu te kananyingika ngwenyi, Tato hanakunjika yuma yeswe mu moko jenyi, nawa ngwo kakatukile kuli Zambi, maya cheka kuli Zambi,
4 chocho Yesu yakatuka ku mesa, yazula mazalo jenyi a helu, yanda tualia,* yalijichika mu zalilo.
5 Mba yasa meya ha mbashila, yaputuka kusanyisa molu ja tumbaji ni kwakusumuna ni tualia lize ajichikile mu zalilo.
6 Chocho, yaheta hali Semone Petulu. Iye yamba ngwenyi: “Mwene, yena mungusanyisa lume ku molu?”
7 Yesu yamukumbulula ngwenyi: “Yuma yize ngunalingi, kuyichi kukulumbunuka haliapwila, alioze muyikakulumbunuka muze yuma yino muyimanunuka.”
8 Petulu yamwamba ngwenyi: “Yena kuuchi kungusanyisa ku molu.” Yesu yamukumbulula ngwenyi: “Nyi chakusanyishine ku molu, kuuchi kupwa kambaji kami.”
9 Semone Petulu yamukumbulula ngwenyi: “Mwene, nyi chocho kanda ungusanyisa wika ku molu, alioze ngusanyise nawa ku moko ni ku mutwe.”
10 Yesu yamwamba ngwenyi: “Yoze hasana kanapeme, kafupiwile kusana cheka mujimba weswe, shina wika ku molu. Yenu nunapeme, alioze hi eswe ko.”
11 Mumu iye te kananyingika yoze mamukunjika. Kashika ambile ngwenyi: “Hi eswe ko nunapeme.”
12 Muze Yesu hahwisa kwasanyisa ku molu, yazala mazalo jenyi, yatwama cheka ku mesa, yamba kuli ayo ngwenyi: “Shina chuma chize nalinga kuli yenu, chanulumbunuka?
13 Yenu nwakunguvuluka ngwenu, ‘Longeshi,’ ‘Mwene,’ nwakwamba kanawa, mumu chenacho napwa.
14 Nyi yami nguli Mwene, nawa Longeshi, nasanyisa molu jenu, ni yenu nawa nwatamba kusanyisa molu ja umwe ni mukwo.
15 Mumu nanwaha chilweza, ngwe chize yami nalinga, ni yenu nawa chilingenu.
16 Ngunanulweze pundu ngwami, ndungo keshi kuhiana mwata wenyi, chipwe yoze akutuma keshi kuhiana yoze wakumutuma.
17 Nyi nunanyingika yuma yino, munuwahilila nyi munuyilinga.
18 Chahanjikile hakutwala kuli yenu eswe; ngunanyingika waze hingunasakula. Alioze, hanga maliji a Chisoneko chino amanunuke, anambe ngwo: ‘Yoze te wakulia mbolo hamwe ni yami, hangwalumukina.’
19 Ngunanulweze chuma chino haliapwila, shimbu kanda chilingiwa, hanga muze muchilingiwa, nufuliele ngwo yami nguli iye.
20 Ngunanulweze pundu ngwami, yoze matambula mweswawo mungutuma, yami anatambula, yoze mangutambula, katambula nawa Yoze wangutumine.”
21 Muze Yesu hamba yino yuma, yalipikala chinji mu spiritu, yamba ngwenyi: “Pundu ngunambe kuli yenu ngwami, umwe wa kuli yenu mangukunjika.”
22 Tumbaji yaputuka kulitala umwe ni mukwo, mumu te keshi kunyingika yoze anambila.
23 Umwe wa kuli tumbaji twenyi, yoze Yesu akuzanga te kanatwama hakamwihi ni Yesu.
24 Kashika, Semone Petulu yatenya kambaji wacho ni kwamba ngwenyi: “Tulweze yoze anambila.”
25 Chocho, kambaji wacho yasenya mu kondo lia Yesu, yamuhula ngwenyi: “Mwene, iya mwenawo?”
26 Yesu yamukumbulula ngwenyi: “Mutu yoze munguhana chipinji cha lumbolo chize mungutata ha longa, mwenawo.” Muze hatata lumbolo, yamuhana kuli Yundase mwana wa Semone Ka-Keriote.
27 Muze Yundase hatambula chipinji cha lumbolo, Satana yanjila muli iye, mba Yesu yamba kuli iye ngwenyi: “Linga kawashi yize unambe kulinga.”
28 Alioze, waze apwile ku mesa kakanyingikine ulumbunwiso wa maliji wano.
29 Amu Yundase mwe te wakufunga mushete wa mbongo, kashika, amwe yanyonga ngwo, kota Yesu kanamulweze ngwenyi: “Landa yuma yize tunahono ha chiwanyino,” hanji ngwo katamba kuhana yimwe yuma kuli yiswale.
30 Kashika, muze hatambula chipinji cha lumbolo, hazehene yatuhuka. Te hikwapwa ufuku.
31 Kashika, muze Yundase hatuhuka, Yesu yamba ngwenyi: “Haliapwila Mwana-mutu hamuhalisa, ni Zambi hamuhalisa kupalikila muli iye.
32 Zambi mwene makamuhalisa, makamuhalisa ni kawashi.
33 Ana jami a zango, nguli ni yenu ha shimbu likepe wika. Munungufupa, ngwe chizechene nalweza A-Yunda, ni yenu ngunanulweze nawa ngwami: ‘Kuze yami munguya, yenu nuchi kuhasa kuyako.’
34 Ngunanwehe shimbi yaha ngwami, lizangenu umwe ni mukwo; ngwe chizechene yami hingunanuzange, ni yenu nawa lizangenu umwe ni mukwo.
35 Nyi munulizanga umwe ni mukwo, atu eswe makanyingika ngwo yenu nuli tumbaji twami.”
36 Semone Petulu yamuhula ngwenyi: “Mwene, kulihi munuya?” Yesu yamukumbulula ngwenyi: “Kuze yami munguya, yena kuuchi kuhasa kungukaula haliapwila, alioze mba mukangukaula.”
37 Petulu yamulweza ngwenyi: “Mwene, mumu liaka chichi kukukaula haliapwila? Mumu lia yena, munguhana mwono wami.”
38 Yesu yamukumbulula ngwenyi: “Shina muhana lume mwono we mumu lia yami? Ngunakulweza pundu ngwami, shimbu ndemba kanda achisanyika, mukalikala yami yisuho yitatu.”
Footnotes
^ Hanji “hina.”
