Asonekene Yoano 14:1-31
14 “Mbunge jenu kanda jilipikala. Fulielenu muli Zambi; fulielenu nawa muli yami.
2 Mu zuwo lia Tata muli yipatulo yinji. Nyi te kuyishimo, kachi chanulwezele, alioze ngunayi kwami hanga ngunululikile chihela.
3 Chikwo nawa, muze munguya kwami ni kunululikila chihela, mungukeza cheka tukaye chimuwika, hanga kuze mungupwa ni yenu nukapweko.
4 Yenu nunanyingika jila ya kuze ngunayi.”
5 Tomase yamba kuli iye ngwenyi: “Mwene, kutwanyingikine kuze unayi, mba kuchi mutuhasa kunyingika jila?”
6 Yesu yamukumbulula ngwenyi: “Yami nguli ye jila, we umwenemwene ni we mwono. Niumwe meza kuli Tata wakuhi, shina wika kupalikila muli yami.
7 Nyi te nunangunyingika, kachi mununyingika nawa Tata; kuputuka haliapwila ndo kulutwe, hinwamunyingika ni kungumona.”
8 Fwilipe yamba kuli iye ngwenyi: “Mwene, tusolwele Tata, mba mbunge jetu jiwahilile.”
9 Yesu yamukumbulula ngwenyi: “Shimbu lipwahaha nguli ni yenu, nihindu kuwangunyingikine, Fwilipe? Yoze unangumona, kanamono nawa Tata. Kuchi unambe ngwe: ‘Tusolwele Tata’?
10 Shina kushi kufuliela ngwe yami nakulivwashana ni Tata, ni Tata kakulivwashana ni yami? Yuma nakunulweza kuyishi kukatuka kuli yami, alioze Tata yoze wakulivwashana ni yami kanalingi milimo yenyi.
11 Fulielenu muze ngunambe ngwami, nakulivwashana ni Tata, ni Tata kakulivwashana ni yami; nyi ka, ngufulielenu mumu lia milimo yize ngunalingi.
12 Pundu, ngunanulweze ngwami, mweswe mafuliela muli yami, neye makalinga milimo yize nakulinga; makalinga milimo yinene-yinene kuhiana yino, mumu ngunayi kwami kuli Tata.
13 Chikwo nawa, yeswayo munwita mu jina liami, yami mungukayilinga, hanga ahalise Tata kupalikila muli Mwana.
14 Chuma cheswacho munwita mu jina liami, mungukachilinga.
15 “Nyi nwakunguzanga, munwononokena shimbi jami.
16 Yami mungwita kuli Tata, iye manwaha chikwashi mukwo hanga apwe ni yenu miaka yeswe,
17 ye spiritu yamwenemwene, yize akwa-hashi kechi kuhasa kutambula, mumu keshi kuyimona chipwe kuyinyingika. Alioze yenu nunayinyingika mumu yinanungu ni yenu, yili nawa muli yenu.
18 Chichi kunuhichika ukawenu, mungukeza cheka kuli yenu.
19 Kwasala hakehe, akwa-hashi kechi kangumona nawa, alioze yenu munukangumona. Mumu yami nguli ni mwono ni yenu munukapwa ni mwono.
20 Ha tangwa liacho, munukanyingika ngwenu, nakulivwashana ni Tata, yenu nwakulivwashana ni yami, ni yami nakulivwashana ni yenu.
21 Yoze wakutayiza shimbi jami ni kujikaula, mwe wakunguzanga. Chikwo nawa, yoze wakunguzanga, makamuzanga kuli Tata, ni yami mungukamuzanga, ni kulisolola kuli iye zwalala.”
22 Yundase, yoze hi Ka-Keriote ko, yamuhula ngwenyi: “Mwene, yika yalingiwa mba uzange kulisolola kuli yetu, alioze kuli akwa-hashi ka?”
23 Yesu yamukumbulula ngwenyi: “Nyi umwe mutu manguzanga, mononokena liji liami, ni Tata neye makamuzanga, ni yetu mutukaya kuli iye, mutukatwama nenyi.
24 Yoze keshi kunguzanga, keshi kwononokena maliji jami. Liji lize nunevu, hi lia yami ko, alioze, liambala lia Tata, yoze wangutumine.
25 “Ngunanulweze yuma yino shimbu nguchili ni yenu.
26 Alioze chikwashi, ye spiritu yisandu, yize tata makatuma mu jina liami, muyikanulongesa yuma yino yeswe, ni kunwiwulula yuma yeswe yize hinanulweza.
27 Sambukila ngunanuhichikila, ngunanwehe sambukila yami. Chanuheleyo ngwe chize akwa-hashi akuyihana. Mbunge jenu kanda jilipikala, chipwe kwivwa woma.
28 Nwevwanga chize nanulweza ngwami: ‘Munguya kwami, alioze mungukahiluka cheka kuli yenu.’ Nyi nwakunguzanga, te munuwahilila ha kunyingika ngwenu, ngunayi kuli Tata, mumu Tata kali munene kuhiana yami.
29 Kashika, ngunanulweze yino shimbu kanda yichilingiwa, hanga nukatayize muze muyikalingiwa.
30 Chichi kuhanjika nawa chinji ni yenu, mumu nguvulu wa hano hashi kaneza, iye keshi ni ndundo nijimwe hali yami.
31 Alioze, hanga akwa-hashi anyingike ngwo nakuzanga Tata, nakulinga ngwe chize Tata angulwezele. Tukatukenu hano, tuyenu kwetu.
