Asonekene Yoano 15:1-27
15 “Yami nguli mutondo wamwenemwene wa vinyu,* Tata mwe njimi.
2 Mitango yeswe yize kuyishi kwima mihuko iye kakuyichiza kuli yami, alioze mitango yize yakwima mihuko iye kakuyipemesa hanga yime mihuko yinji.
3 Yenu hinwapema kulu mumu lia liji lize nanwambulwila.
4 Nungenu ni kulivwashana ni yami, ni yami mungununga ni kulivwashana ni yenu. Ngwe chizechene mutango kuuchi kuhasa kwima mihuko ukawawo chakuhona kulinunga ku mutondo wa vinyu, ni yenu nawa kunuchi kuhasa kwima mihuko nyi kunwanungine ni kulivwashana ni yami.
5 Yami nguli mutondo wa vinyu, yenu nuli mitango. Yoze manunga ni kulivwashana ni yami, ni yami mungununga ni kulivwashana nenyi, mwenawo mema mihuko yinji. Mumu nyi nwalihandununa ni yami kunuchi kuhasa kulinga nichimwe.
6 Nyi mutu kanungine ni kulivwashana ni yami, mamumbila haze ngwe mutango, mba iye moma. Mitango yacho mayikunga, mayimbila mu kahia ni kuyocha.
7 Nyi nwanunga ni kulivwashana ni yami, ni maliji jami manunga muli yenu, etenu cheswacho munuzanga, kumanwahacho.
8 Chino chakuhalisa Tata, nyi munununga ni kwima mihuko yinji ni kusolola ngwo, nuli tumbaji twami.
9 Ngwe chizechene Tata akunguzanga, ni yami nakunuzanga; nungenu mu zango liami.
10 Nyi munwononokena shimbi jami, munununga mu zango liami, ngwe chize yami nakwononokena shimbi ja Tata ni kununga mu zango lienyi.
11 “Nanulweza yuma yino, hanga nuwahilile ngwe yami, ni uwahililo wenu woke.
12 Yino ye shimbi yami, lizangenu umwe ni mukwo, ngwe chizechene yami hingunanuzange.
13 Kukushi mutu niumwe yoze uli ni zango linji kuhiana yoze unahana mwono wenyi hali masepa jenyi.
14 Yenu nuli masepa jami, nyi munulinga yize ngunanutumu.
15 Chichi kunuvuluka nawa ngwami ndungo, mumu ndungo kanyingikine yize mwata wenyi akulinga. Alioze ngunanuvuluka ngwami masepa, mumu hingunanusolwela yuma yeswe yize nevwile kuli Tata.
16 Yenu kunwakangusakwile, alioze yami nanusakwile, nanutongwele hanga nuye, nununge ni kwima mihuko, mihuko yize muyinunga, hanga yeswayo munwita kuli Tata mu jina liami, anweheyo.
17 “Ngunanulweze yuma yino hanga nulizange umwe ni mukwo.
18 Nyi akwa-hashi kakunuvwila kole, nyingikenu ngwenu kaliangile kunguvwila yami kole.
19 Nyi te nuli akwa-hashi, kachi akwa-hashi manuzanga ha kupwa atu jo. Haliapwila, amu hi nuli akwa-hashi ko, alioze yami nanusakwile kuli akwa-hashi, kashika akwa-hashi akunuvwila kole.
20 Iwulukenu yize nanulwezanga ngwami: Ndungo keshi kuhiana mwata wenyi. Nyi hananguhungumiona yami, ni yenu nawa kumakanuhungumiona; nyi mononokena maliji jami, kumononokena nawa maliji jenu.
21 Alioze kumakanulinga yuma yino yeswe yipi mumu ha jina liami, mumu kanyingikine Yoze wangutumine.
22 Nyi te kuchakejile ni kuhanjika no, kachi kapwile ni mulonga, alioze haliapwila keshi ni kaliongelo ha shili yo.
23 Yoze wakunguvwila kole, kakuvwila nawa kole Tata.
24 Nyi te chakalingile milimo hakachi ko yize niumwe kanda achilinga, kachi kechi kupwa ni mulonga wa shili; alioze hanangumono ni kunguvwila kole yami ni Tata.
25 Alioze, chino chalingiwa hanga maliji waze hanasonewa ha Shimbi yo amanunuke, anambe ngwo: ‘Yanguvwila kole chitela chakuhi.’
26 Muze chikwashi yoze mungunutumina wa kuli Tata meza, ye spiritu yamwenemwene yinakatuka kuli Tata, muyikahana uchela hakutwala kuli yami;
27 ni yenu nawa munukahana uchela, mumu nunakapwa ni yami chize ku uputukilo.
Footnotes
^ Hanji “vindera.”
