Asonekene Yoano 16:1-33
16 “Hinanulweza yuma yino hanga nuhone kutalinga.
2 Atu makanuhuma mu sunangonga. Kwamba pundu, ola muyiza muze waze manushiha makanyonga ngwe kanalingila Zambi mulimo usandu.
3 Alioze, makalinga yuma yino mumu kanyingikine Tata, chipwe yami kangunyingikine.
4 Kashika, hinanulweza yuma yino hanga muze ola ya kumanunuka chayo muyiheta, nukewuluke ngwenu hingunanulwezayo kulu.
“Chanulwezeleyo ku uputukilo mumu te nguli ni yenu.
5 Alioze, haliapwila ngunayi kuli Yoze wangutumine; chipwe chocho, niumwe wa kuli yenu unanguhula kama ngwenyi: ‘Kulihi unayi?’
6 Alioze, mbunge jenu jinazala too ni yinyengo mumu nanulweza yuma yino.
7 Ngunambe pundu kuli yenu ngwami, kuya chami, muchinuyukisa. Mumu nyi chayile, chikwashi kechi kwiza kuli yenu; alioze nyi naya, mungunutuminayo.
8 Muze meza, makahana shindakenyo kuli akwa-hashi ya shili, ya ululi ni ya usopeso:
9 Chitangu, ya shili, mumu kafulielele muli yami;
10 mba hanyima, ya ululi, mumu munguya kuli Tata, yenu kunuchi kangumona nawa;
11 mba ku songo, ya usopeso, mumu mwata wa hano hashi, hamusopesa.
12 “Nguchili ni yuma yinji ya kunulweza, alioze haliapwila, yichi kuhasa kunulumbunuka.
13 Muze chikwashi meza, ye spiritu ya umwenemwene, makanusongwela mu umwenemwene weswe, mumu kechi kahanjika kulita ni manyonga jenyi mwene, alioze makahanjika yuma yize mevwa, ni kunwambulwila yuma yize makamona.
14 Makanguhalisa, mumu makatambula yuma yami ni kunulwezayo.
15 Yuma yeswe yize Tata ali nayo, ya yami. Kashika nanulweza ngwami, makatambula yuma yami ni kunulwezayo.
16 Kwasala hakehe kunuchi kangumona, cheka nawa, kwasala hakehe, munukangumona.”
17 Chocho, amwe a kuli tumbaji twenyi, yamba umwe kuli mukwo ngwo: “Yika amba kwamba muze amba ngwenyi: ‘Kwasala hakehe kunuchi kangumona, cheka nawa, kwasala hakehe munukangumona,’ ni ‘mumu munguya kuli Tata’?”
18 Kashika, ayo yamba ngwo: “Yika anambe kwamba muze amba ngwenyi, ‘kwasala hakehe’? Kutwanyingikine yize anambe.”
19 Yesu te kananyingika ngwenyi ayo kanafupu kumuhula, mba yamba kuli ayo ngwenyi: “Nunalihula umwe ni mukwo hakutwala ku chikuma chino mumu nanulweza ngwami: ‘Kwasala hakehe kunuchi kangumona, cheka nawa, kwasala hakehe munukangumona?’
20 Pundu ngunambe kuli yenu ngwami, munukalila ni kulinyenga, alioze akwa-hashi makawahilila; munukevwa chinyengo, alioze chinyengo chenu muchikalumuka uwahililo.
21 Muze pwo anashita, kakwivwa yikola mumu ola yenyi hiyaheta; alioze muze mwana hasemuka, iye kechi kwiuluka nawa yikola, mumu lia uwahililo wa kusemuka cha mutu hano hashi.
22 Chizechene nawa, haliapwila yenu nunanenganyana, alioze, mungukanumona cheka, mbunge jenu mujikawahilila, niumwe mutu kechi kanuchiza uwahililo wenu.
23 Ha tangwa liacho, kunuchi kanguhula chihula nichimwe, pundu ngunambe kuli yenu ngwami, nyi munwita chuma cheswacho kuli Tata mu jina liami, iye kumakanwahacho.
24 Ndo haliapwila, kanda nuchita chuma nichimwe mu jina liami. Etenu, kumunukatambula, hanga uwahililo wenu ukalumbame.
25 “Nanulweza yuma yino kupalikila mu yilweza. Ola muyiza, muze chichi kahanjika ni yenu kupalikila mu yilweza, alioze mungukahanjika ni yenu zwalala hakutwala kuli Tata.
26 Ha tangwa liacho, munuketa kuli Tata mu jina liami; chino kuchalumbunukine ngwo yami mungukanwichila kuli Tata.
27 Mumu Tata kakunuzanga, mumu ni yenu nwakunguzanga, nwakufuliela ngwenu Zambi wangutumine.
28 Kangutumine kuli Tata, yingwiza hashi. Haliapwila ngunahichika hashi, ngunayi kuli Tata.”
29 Tumbaji twenyi yamba ngwo: “Mba kwivwa! Haliapwila unahanjika zwalala, hi mu yilweza ko.
30 Haliapwila tunanyingika ngwetu, unanyingika yuma yeswe, atu katambile kukuhula. Kashika twakufuliela ngwetu unakatuka kuli Zambi.”
31 Yesu yaakumbulula ngwenyi: “Mba haliapwila hinwafuliela?
32 Panjikenu, ola muyiza, pundu lume, hiyaheta kulu, muze munukalimwanga mutu mweswe ku zuwo lienyi, munukanguhichika ukawami. Alioze chishi ukawami, mumu Tata kali ni yami.
33 Nanulweza yuma yino hanga nupwe ni sambukila kupalikila muli yami. Munukapwa ni yipikalo hano hashi, alioze hamukenu! Yami hinakumba hashi.”
