Asonekene Yoano 18:1-40
-
Yundase kanakunjika Yesu (1-9)
-
Petulu yatomona njangu (10, 11)
-
Yesu yamutwala kuli Anase (12-14)
-
Petulu yalikala Yesu ha chisuho chitangu (15-18)
-
Yesu kali kumeso ja Anase (19-24)
-
Petulu yalikala Yesu ha chisuho chamuchiali ni cha muchitatu (25-27)
-
Yesu kali kumeso ja Pilatu (28-40)
-
“Wanangana wami hi wa hano hashi ko” (36)
-
18 Muze Yesu hamba yuma yino, yatuhuka ni tumbaji twenyi, yaya mu sali lia mungulunga wa Kendrone; kwapwile umwe munda, kashika Yesu ni tumbaji twenyi yanjila mu munda wacho.
2 Yundase yoze te mamukunjika neye te kananyingika ku chihela chacho, mumu Yesu kapwile ni kukungulukilako ni tumbaji twenyi yisuho yinji.
3 Chocho Yundase yaya ni chizavu cha maswalale ni tufunga waze asasendote a lutwe ni A-Fwariseu atumine, yahetako ni masoka, ndeya ni yitwa.
4 Kashika, muze Yesu te hanyingika yuma yeswe yize te muyilingiwa kuli iye, yasenya kulutwe, yaahula ngwenyi: “Iya nunafupu?”
5 Ayo yamukumbulula ngwo: “Yesu Ka-Nazare.” Iye yaamba ngwenyi: “Yami uno.” Yundase mukwa-kukunjika te kali hamwe no.
6 Alioze, muze Yesu hamba kuli ayo ngwenyi, “Yami uno,” ayo yahiluka unyime-nyime, yalimbuka hashi.
7 Mba yaahula cheka nawa ngwenyi: “Iya nunafupu?” Ayo yamukumbulula ngwo: “Yesu Ka-Nazare.”
8 Yesu yaakumbulula ngwenyi: “Nanulweza ngwami yami uno. Kashika nyi yami nunafupu, echenu wano atu aye kwo.”
9 Chino chinakalingiwa hanga maliji waze iye ambile amanunuke, anambe ngwo: “Chatokesele niumwe wa kuli waze wanguhele.”
10 Kashika, Semone Petulu yatomona katana* yoze apwile nenyi, yateta twitwi lia utata lia ndungo wa mwata wa asasendote a lutwe. Jina lia ndungo wacho te Malaku.
11 Alioze Yesu yalweza Petulu ngwenyi: “Funyisa katana mu chindalo. Shina chatambile kunwa musenge uze Tata angwaha nyi?”
12 Mba maswalale ni kapitau hamuwika ni tufunga twa A-Yunda, yakwata Yesu, yamukasa.
13 Ayo yamutwala chitangu kuli Anase, mumu iye te uko wa Kayafwa, yoze wapwile mwata wa asasendote a lutwe ha mwaka wacho.
14 Kayafwa mwe wambile kuli A-Yunda ngwenyi, chili chipema mutu umuwika kufwila atu eswe.
15 Semone Petulu ni kambaji mukwo, te kanakaula Yesu. Kambaji wacho te kanamunyingika kuli mwata wa asasendote a lutwe, yanjila ni Yesu mu zuwo* lia mwata wa asasendote a lutwe,
16 alioze Petulu yamana haze ku chikolo, mba kambaji mukwo yoze te anyingika kuli mwata wa asasendote a lutwe, yatuhuka, yahanjika ni pwo mukwa-kufunga chikolo, mba yanjisa Petulu.
17 Mwana-pwo mukwa-kufunga chikolo yahula Petulu ngwenyi: “Ni yena ngwami uli umwe wa kuli tumbaji twa lunga yono?” Iye yakumbulula ngwenyi: “Hi yami ko.”
18 Ndungo ni tufunga te kanoto kahia kaze awikile, mumu te kuli chishika. Petulu neye te kanamana hamwe no ni kwota kahia.
19 Mba sasendote wa lutwe yahula Yesu hakutwala kuli tumbaji twenyi ni malongeso jenyi.
20 Yesu yamukumbulula ngwenyi: “Napwile ni kulongesela ha mbunga, mu masunangonga, mu tembele ni ku yihela kuze A-Yunda eswe te akukungulukila, chakahanjikile nichimwe chuma ku tenga.
21 Mumu liaka unanguhula? Hula waze hanevu yize nahanjikile kuli ayo. Pundu lume, ayo kananyingika yize nambile.”
22 Muze Yesu hahwisa kwamba yuma yino, umwe wa kuli tufunga yoze wapwileho, yalamba Yesu hushi, yamba ngwenyi: “Chenacho unakumbulula sasendote wa lutwe?”
23 Yesu yamukumbulula ngwenyi: “Nyi namba chuma chipi, ngulwezecho, alioze nyi chuma namba chinalite, mumu liaka wangulamba?”
24 Mba Anase yamutuma wa kukasa kuli Kayafwa, mwata wa asasendote a lutwe.
25 Semone Petulu kapwileho, te kanoto kahia. Mba Ayo yamuhula ngwo: “Ni yena ngwami uli umwe wa kuli tumbaji twenyi?” Iye yalikala, yamba ngwenyi: “Hi nguli kambaji kenyi ko.”
26 Umwe wa kuli ndungo ja mwata wa asasendote a lutwe, usoko wa mutu yoze Petulu apatwile twitwi, yahula ngwenyi: “Ngwami nakumonanga mu munda wa Ngetesemane hamwe ni iye?”
27 Alioze, Petulu yalikala cheka nawa, hazehene ndemba yasanyika.
28 Chocho, yachiza Yesu kuli Kayafwa, yamutwala ku zuwo lia nguvulu. Te chimenemene. Alioze ayo kakanjilile mu zuwo lia nguvulu hanga achine kulichisa, ahase kulia Chizomboka.
29 Kashika, Pilatu yaya ni kulitakana no, yaahula ngwenyi: “Mulonga uka nunasumu lunga yono?”
30 Yamukumbulula ngwenyi: “Nyi te mutu yono keshi kulinga yuma yipi, kachi twamunehene kuli yena.”
31 Mba Pilatu yamba kuli ayo ngwenyi: “Mutwalenu yenu ene, numusopese kulita ni shimbi yenu.” Chocho A-Yunda yamukumbulula ngwo: “Kulita ni shimbi yetu, kutushi ni ulite wa kushiha mutu niumwe.”
32 Yuma yino yalingiwile hanga maliji waze Yesu ambile amanunuke, ni kusolola mutapu wa kufwa chize mafwa.
33 Kashika, Pilatu yanjila cheka nawa mu zuwo lia nguvulu, yasanyika Yesu, yamuhula ngwenyi: “Yena uli Mwanangana wa A-Yunda nyi?”
34 Yesu yamba ngwenyi: “Ayi unanguhula, yinakatuka kuli yena mwene, nyi akwenu akulwezayo hakutwala kuli yami?”
35 Pilatu yamukumbulula ngwenyi: “Shina yami nguli Ka-Yunda nyi? Vungu lie ni asasendote a lutwe e akukunjika kuli yami. Yika walinga?”
36 Yesu yakumbulula ngwenyi: “Wanangana wami hi wa hano hashi ko. Nyi te Wanangana wami uli wa hano hashi, kachi tumbaji twami kasa jita hanga ahone kungukunjika kuli A-Yunda. Alioze umwenemwene uli ngwo, Wanangana wami hi wa hano hashi ko.”
37 Mba Pilatu yamuhula ngwenyi: “Nyi chocho, yena uli mwanangana nyi?” Yesu yakumbulula ngwenyi: “Yena mwene unachambe ngwe, nguli mwanangana. Ha chikuma chino nasemukine, ha chikuma chino nejile hanga nguhane uchela hakutwala ku umwenemwene. Mweswawo uli sali lia umwenemwene, kakupanjika liji liami.”
38 Pilatu yamba kuli iye ngwenyi: “Umwenemwene yika?”
Muze hamba chino, yaya cheka kuli A-Yunda, yamba kuli ayo ngwenyi: “Chamwene chitela chize mungumusumina mulonga.
39 Chikwo nawa, yenu nukwete chako ngwo natamba kutusula mutu umuwika ha mashimbu a Chizomboka. Kashika nunazange hanga ngutusule Mwanangana wa A-Yunda?”
40 Ayo yakololoka cheka nawa ngwo: “Ka, lunga au ka, tunazange Mbarapa!” Mbarapa wacho kapwile chilianyi.
