Asonekene Yoano 19:1-42
19 Mba Pilatu yatwala Yesu, yatuma hanga amulambe ni shikote.
2 Maswalale yayinda chipangula cha mbimbo, yamujikacho ku mutwe, yamujika hina lichiuluka.
3 Yaputuka kukundama kuli iye ni kumwamba ngwo: “Tunakumeneka, Mwanangana wa A-Yunda!” Ni kumulamba mahushi ku meso.
4 Pilatu yatuhuka cheka, yamba kuli atu ngwenyi: “Panjikenu! Mungumutuhwisa haze hanga nunyingike ngwenu, chamwene chitela muli iye chakumusumina mulonga.”
5 Mba Yesu yatuhuka, kanazala chipangula cha mbimbo ni hina lia chiuluka, Pilatu yamba kuli ayo ngwenyi: “Talenu mutu yono!”
6 Alioze, muze asasendote a lutwe ni tufunga amumwene, yakololoka ngwo: “Muhatenu ha mutondo! Muhatenu ha mutondo!” Pilatu yamba kuli ayo ngwenyi: “Mutwalenu yenu ene hanga numuhate ha mutondo, mumu yami chamwene chitela nichimwe muli iye cha kumusumina mulonga.”
7 A-Yunda yamukumbulula ngwo: “Yetu tuli ni yimwe shimbi, katamba kufwa kulita ni shimbi, mumu halipwisa mwana wa Zambi.”
8 Muze Pilatu evwile yize ayo te anambe, yevwa woma unji.
9 Yanjila cheka mu zuwo lia nguvulu, yamba kuli Yesu ngwenyi: “Kulihi unakatuka?” Alioze Yesu kamukumbulwile nichimwe.
10 Chocho Pilatu yamba kuli iye ngwenyi: “Kusolo kuhanjika ni yami? Kuwanyingikine ngwo yami nguli ni ndundo ja kukutusula ni ndundo ja kukuhata ha mutondo?”
11 Yesu yamukumbulula ngwenyi: “Kunuchi kuhasa kupwa ni ndundo hali yami nyi te kanuhelejo kukatuka mwilu. Kashika, mutu yoze wangukunjika kuli yenu kali ni shili yinene.”
12 Kashika, Pilatu yaputuka kufupa jila ya kumutusula, alioze A-Yunda yakololoka ngwo: “Nyi watusula yono lunga, hi uli sepa lia Sesare ko. Mweswe wakulipwisa mwanangana kakulimika ni Sesare.”
13 Mba muze Pilatu hevwa maliji wano, yatwala Yesu haze, yatwama ha chitwamo cha upatwilo, ha chimwe chihela avuluka ngwo, Hakwala Mawe, mu limi lia Hepreu ngwo, Ngapata.
14 Liapwile tangwa lia Kululieka Chizomboka; ha ola yamuchisambano. Pilatu yamba kuli A-Yunda ngwenyi: “Talenu mwanangana wenu!”
15 Alioze, ayo yakololoka ngwo: “Mushihenu! Mushihenu! Muhatenu ha mutondo!” Pilatu yaahula ngwenyi: “Natamba kuhata mwanangana wenu ha mutondo?” Asasendote a lutwe yakumbulula ngwo: “Kutushi ni mwanangana mukwo shina wika Sesare.”
16 Kashika, Pilatu yahana Yesu kuli ayo hanga amushihile ha mutondo wa lamba.
Chocho ayo yanda Yesu, yaya nenyi.
17 Iye mwene yambata mutondo wa lamba, yatuhuka, yaya ku chimwe chihela avuluka ngwo, Kola lia Mutwe, mu limi lia Hepreu ngwo, Ngolongota.
18 Kuzekwene yamuhata ha mutondo hamwe ni malunga aali, umwe sali lia utata, mukwo sali lia umama, Yesu mukachi.
19 Pilatu yasoneka nawa chimwe chisoneko, yachisa ha mutondo. Hapwile hakusoneka ngwo: “Yesu Ka-Nazare, Mwanangana wa A-Yunda.”
20 A-Yunda anji katangile chisoneko chacho, mumu ha chihela haze ahachile Yesu te hakamwihi ni mbonge, kachisonekene mu limi lia Hepreu, Latim, ni Ngregu.
21 Alioze, asasendote a lutwe ja A-Yunda, yamba kuli Pilatu ngwo: “Kanda usoneka ngwo, Mwanangana wa A-Yunda, alioze ngwo, iye kambile ngwenyi: ‘Yami nguli Mwanangana wa A-Yunda.’”
22 Pilatu yakumbulula ngwenyi: “Chize hinasoneka, nachisoneka kulu.”
23 Mba muze hahata Yesu ha mutondo wa lamba, maswalale yanda mazalo jenyi, yaateta mu yihanda yiwana, swalale mweswe yanda chihanda chimuwika, yanda nawa chikuto chenyi cha mukachi. Chikuto chacho chakapwile cha kunuka, alioze chapwile chimuwika, chize kwilu ndo kwishi.
24 Kashika, ayo yamba kuli umwe ni mukwo ngwo: “Kanda tulipula, alioze tutenu chela hanga tumone yoze masala nalio.” Chino chinakalingiwa hanga chisoneko chimanunuke, chinambe ngwo: “Yalitetela mazalo jami, ni kuta chela ha hina liami.” Chenacho lume maswalale alingile.
25 Alioze, naye ya Yesu ni mwana-kwo ya naye, te kanamana hakamwihi ni mutondo wa lamba wa Yesu; ni Maria pwo lia Keleopa, ni Maria Ka-Mandala.
26 Alioze, muze hamona naye ni kambaji yoze te azanga kali hakamwihi, Yesu yamba kuli naye ngwenyi: “Pwo, tala! Mwane au!”
27 Mba yamba kuli kambaji wacho ngwenyi: “Tala! Au mwe noko!” Chize ha tangwa liacho, kambaji yamutwala ku zuwo lienyi.
28 Ha kupalika cha yino yuma, muze Yesu hanyingika ngwenyi yuma yeswe hiyalingiwa, hanga chisoneko chimwe chimanunuke, Yesu yamba ngwenyi: “Pwila ngunevu.”
29 Kuzekwene, kwapwile umwe mulondo wa too ni vinyu yapangaminya. Ayo yanda shiponja, yayichupika mu vinyu yapangaminya, yayipachika ku chishachi, yayizoza ndo ku kanwa lienyi.
30 Muze Yesu hapaka* vinyu yapangaminya, yamba ngwenyi: “Yeswe hiyamanunuka!” Yahetamisa mutwe, yafwa.*
31 Kashika, amu liapwile tangwa lia Kululieka yuma, mba mijimba yichine kununga ya kuzezeleka ku mitondo ha Sambata (mumu Sambata yacho yapwile yilemu chinji), A-Yunda yeta kuli Pilatu hanga amakune molu ja atu waze azezelekele ku mitondo, ni kuchiza mijimba yo ku mitondo.
32 Chocho maswalale yamakuna molu ja lunga mutangu, ni molu ja lunga mukwo yoze te uli ha mutondo sali lienyi.
33 Alioze, muze ahetele hali Yesu, yamona ngwo hafwa kulu, kashika kamumakwine molu.
34 Mba umwe wa kuli maswalale yamutuwa ni kunga lienyi ha pachi, hazehene yihatuhuka manyinga ni meya.
35 Mutu yoze wamwene yuma yino, kanahana uchela, uchela wenyi uli wamwenemwene, iye kananyingika ngwenyi, kanahanjika umwenemwene hanga ni yenu nufuliele.
36 Kwamba pundu, yino yuma yeswe yinakalingiwa, hanga chisoneko chimanunuke, chinambe ngwo: “Nichimwe chifwaha chenyi kechi kachimakuna.”
37 Ni chisoneko chikwo chinambe ngwo: “Kumakatala yoze atuwile kunga.”
38 Muze yuma yino yeswe hiyapalika, Yosefwe wa ku Arimatea, yoze wapwile kambaji ka Yesu alioze ku tenga, mumu te kakwivwa woma wa A-Yunda, yeta kuli Pilatu hanga achize mujimba wa Yesu ha mutondo, Pilatu yatayiza. Chocho yaya ni kuuchiza.
39 Nikondemu, yoze wayile kuli iye ha chisuho chitangu ufuku, neye yatwala mira yakuchinga ni aloa, yize te yakulema unji wa kilu* lukama.
40 Ayo yanda mujimba wa Yesu, yauvunga ha mahina a linyu, hamuwika ni yitumbo ya vumba lipema, kulita ni chize A-Yunda apwile ni kululieka mujimba mba aufunde.
41 Ku chihela kuze amuhachile ha mutondo, kwapwile umwe munda, mu munda wacho mwapwile limwe fuka liaha, te kanda achifundamo mutu niumwe.
42 Amu liapwile tangwa lia Kululieka Yuma lia A-Yunda, fuka liacho te lili hakamwihi, kashika yasamo Yesu.
