Asonekene Yoano 2:1-25
2 Ha tangwa liamuchitatu, yikupwa umbachiso mu Kena ya mu Ngalileya, naye ya Yesu te hwali.
2 Yesu ni tumbaji twenyi no yaasanyika ha chiwanyino chacho.
3 Muze vinyu te yinayi ni kuhwa, naye ya Yesu yamulweza ngwenyi: “Ayo keshi nawa ni vinyu.”
4 Alioze Yesu yamukumbulula ngwenyi: “Mama,* kuchi yino yinatutala? Ola yami kanda yichiheta.”
5 Naye yalweza tuvumbi waze te anakalakala ngwenyi: “Lingenu yize manulweza.”
6 Ha chihela chacho, hapwile milondo ya mawe yisambano ya meya, yize asele hanga asane ku moko shimbu kanda achilia kulita ni ndako ya A-Yunda, mulondo umuwika te muuhasa kunjila litru 44 hanji 66.*
7 Yesu yamba kuli ayo ngwenyi: “Zalisenu milondo ni meya.” Ayo yayizalisa ndo ha mukomo.
8 Mba Yesu yaalweza ngwenyi: “Switenu ndambu hanga nutwale kuli kasongo wa umbachiso.” Mba ayo yachilinga.
9 Muze kasongo wa umbachiso* hapanjika meya waze alumukine vinyu, chakuhona kunyingika kuze kwakatuka vinyu, kasongo yasanyika sandungi (alioze tuvumbi waze aswichile meya te kananyingika),
10 yamba kuli iye ngwenyi: “Atu eswe chitangu kakuhana vinyu yipema, muze atu mazengewa, mba mahana vinyu yize kuyapemene. Alioze yena hiwatulika vinyu yipema ndo haliapwila.”
11 Yesu kalingile chino mu Kana ya Ngalileya ngwe uputukilo wa yilayi yenyi, yasolola uhenya wenyi, tumbaji twenyi yamufuliela.
12 Kulutwe lia yino yuma, iye, naye, ana-kwo ni tumbaji twenyi yapalumuka ku Kafwanaume, alioze kakatwamineko matangwa anji.
13 Chizomboka cha A-Yunda te chinakundama, kashika Yesu yakanduka ku Yerusaleme.
14 Iye yawana mu tembele akwa-kulanjisa ngombe, mapanga, membe ni akwa-kusumbakenya mbongo, kanatwama ha yitwamo yo.
15 Mba muze hahosa shikote ya mihipu, yahanga atu mu tembele ni mapanga ni ngombe, yamwanga mbongo ja akwa-kusumbakenya ni kulimbula mesa jo.
16 Yamba kuli akwa-kulanjisa membe ngwenyi: “Chizenu yuma yino hano! Kanda nutenga zuwo lia Tata ngwe zuwo lia mingoso!”
17 Tumbaji twenyi yewuluka chize chinasonewa ngwo: “Kulihana chinji ku zuwo lie muchikangulia.”
18 Mba A-Yunda yamuhula ngwo: “Chilayi chika muhasa kutusolwela hanga tunyingike ngwetu, uli ni ulite wa kulinga yuma yino?”
19 Yesu yaakumbulula ngwenyi: “Puzulenu tembele yino, mba ha matangwa atatu munguyitungulula.”
20 Mba A-Yunda yamba ngwo: “Tembele yino kayitungile ha miaka 46, kafwa yena muyitungulula ha matangwa atatu?”
21 Alioze, tembele yize Yesu te anambe, yapwile mujimba wenyi.
22 Muze amuhindwishile hakachi ka afu, tumbaji twenyi yeuluka ngwo, iye kapwile ni kwamba yuma yino, mba ayo yafuliela ha Yisoneko ni ha yize yeswe Yesu ambile.
23 Alioze, muze iye apwile mu Yerusaleme, ha chiwanyino cha Chizomboka, atu anji yafuliela ha jina lienyi ha kumona yikomokeso yize iye apwile ni kulinga.
24 Chipwe chocho, Yesu te keshi kufuliela chinji hali ayo, mumu te kanaanyingika eswe,
25 te keshi kufupa ukwaso wa mutu niumwe hanga amulweze chize atu apwa, mumu te kanyingika yize yili mu mbunge ja atu.
