Asonekene Yoano 20:1-31
20 Ha tangwa litangu lia poso, Maria Ka-Mandala yaya ku fuka chimenemene, shimbu te kuchili milima, yamona ngwenyi liwe halichiza ku fuka.
2 Kashika yazomboka yaya kuli Semone Petulu, ni kuli kambaji mukwo yoze Yesu te akuzanga, yaalweza ngwenyi: “Mwene hamuchiza mu fuka, kutwanyingikine kuze amusa.”
3 Mba Petulu ni kambaji mukwo yaya ku fuka.
4 Eswe aali yaputuka kuzomboka chimuwika, alioze kambaji mukwo yazomboka chinji kuhiana Petulu, yalianga kuheta ku fuka.
5 Muze hanonokamo, yamona mahina a linyu, alioze kanjililemo.
6 Mba Semone Petulu yoze te unamukaula neye yaheta, yanjila mu fuka yawanamo wika mahina a linyu.
7 Hina lize asele ku mutwe wenyi, te kulishi hamuwika ni mahina akwo, alioze te lili lia kuvunga ukawalio.
8 Hohene, kambaji mukwo yoze waliangile kuheta ku fuka neye yanjila, yamona yatayiza.
9 Mumu Chisoneko chize te chakwamba ngwo, chamutamba kuhinduka hakachi ka afu, te kanda chichaalumbunuka.
10 Chocho, tumbaji yahiluka ku mazuwo jo.
11 Alioze, Maria yasala haze lia fuka ni kulila, hakamwihi ni fuka. Shimbu te machilila yanonoka mu fuka,
12 yamonamo angelo aali kanazala mazalo atoma, kanatwama ha chihela chize asele mujimba wa Yesu, umwe ku mutwe mukwo ku molu.
13 Ayo yamuhula ngwo: “Pwo, mumu liaka unalila?” Iye yakumbulula ngwenyi: “Mwene wami haya nenyi, chanyingikine kuze amusa.”
14 Muze hamba maliji wano, yateuluka yamona Yesu kanamana, alioze kahashile kunyingika ngwenyi, kali Yesu.
15 Yesu yamuhula ngwenyi: “Pwo, mumu liaka unalila? Iya unafupu?” Amu pwo anyongene ngwe kali njimi, yamba kuli iye ngwenyi: “Mwata nyi yena wamuchiza hano ngulweze kuze wamusa, hanga nguye ni kumwanda.”
16 Yesu yamusanyika ngwenyi: “Maria!” Muze hateuluka kuli iye, pwo yamba mu limi lia Hepreu ngwenyi: “Rabonai!” (linalumbunuka ngwo, “Longeshi!”)
17 Yesu yamba kuli iye ngwenyi: “Echa kungukakaminya, mumu kanda nguchiya kuli Tata. Alioze, yako kuli mandumbu jami waalweze ngwo: ‘Munguya kuli Tata kanda Tatenu, Zambi yami kanda Zambi yenu.’”
18 Maria Ka-Mandala yaya yalweza tumbaji lusango ngwenyi: “Yami namona Mwene!” Yaalweza yuma yeswe yize iye amulwezele.
19 Te hikwatoka, liapwile tangwa litangu lia poso, yikolo ya zuwo lize tumbaji apwile te yakuyika, mumu te woma wa A-Yunda anevu. Yesu yasoloka mukachi ko, mba yamba kuli ayo ngwenyi: “Sambukila yipwe ni yenu.”
20 Muze hamba maliji wano, yaasolwela moko jenyi ni mu pachi. Mba tumbaji yawahilila ha kumona Mwene.
21 Yesu yamba cheka nawa kuli ayo ngwenyi: “Sambukila yipwe ni yenu. Ngwe chize Tata angutumine, ni yami ngunanutumu.”
22 Muze hamba maliji wano, yaafujila mwiku yamba kuli ayo ngwenyi: “Tambulenu spiritu yisandu.
23 Nyi nwakonekena shili ya umwe mutu, hamukonekenayo kulu; nyi kunwakonekenene shili ya mutu, kechi kuyikonekena.”
24 Alioze Tomase, umwe wa kuli e Kumi ni Aali, yoze te avuluka ngwo Pasa, te keshiho muze Yesu asolokele.
25 Mba tumbaji akwo yamulweza ngwo: “Yetu twamona Mwene!” Alioze iye yamba kuli ayo ngwenyi: “Nyi chamwene chimbandu cha mbambo ku moko jenyi ni kukwata mu pachi jenyi, chichi kutayiza chipwe hakehe.”
26 Muze te hikwapalika matangwa nake, tumbaji twenyi te kanakunguluka cheka, Tomase neye te he ali, chipwe ngwe yikolo te yakuyika, Yesu yasoloka mukachi ko, yamba ngwenyi: “Sambukila yipwe ni yenu.”
27 Mba Yesu yamba kuli Tomase ngwenyi: “Sako munwe we hano, tala moko jami, zoza kwoko lie kwata mu pachi jami, litwamine kuyambashana, fuliela.”
28 Tomase yamba ngwenyi: “Mwene wami, Zambi yami!”
29 Yesu yamba kuli iye ngwenyi: “Watayiza mumu wangumona nyi ngwami? Kawaha waze chipwe ngwe kamwene nihindu kakufuliela.”
30 Kwamba pundu, Yesu kalingile yilayi yikwo yinji kumeso ja tumbaji twenyi, yize kuyishi yakusoneka mu mukanda uno.
31 Alioze yuma yino kayisonekene hanga nufuliele ngwenu, Yesu mwe Kristu, Mwana wa Zambi, muze munufuliela hanga nupwe ni mwono kupalikila mu jina lienyi.
