Asonekene Yoano 21:1-25
21 Hanyima lia yuma yino, Yesu yasoloka cheka kuli tumbaji twenyi, ku Kalunga-lwiji wa Tiperia. Iye yasoloka chino.
2 Kwapwile Semone Petulu, Tomase (yoze te avuluka ngwo Pasa), Natanele wa ku Kena ya Ngalileya, ana ja Zebedeu ni tumbaji twenyi akwo aali, ayo eswe te hamuwika ali.
3 Semone Petulu yaalweza ngwenyi: “Ngunayi ni kuta yishi.” Ayo yamba kuli iye ngwo: “Ni yetu mutuya ni yena.” Chocho yaya, yanjila mu wato, alioze ha ufuku wacho kozele yishi niumwe.
4 Muze hikwacha, Yesu te kali ku sesa lia kalunga-lwiji, alioze tumbaji kakahashile kumumona ngwo te Yesu.
5 Mba Yesu yaahula ngwenyi: “Ana jami, shina nuli ni chimwe chuma cha kulia?” Ayo yakumbulula ngwo: “Ka!”
6 Iye yaalweza ngwenyi: “Kongenu wanda, sali lia utata lia wato, munukwatako kamwe koma.” Kashika yakonga, alioze kahashile kukoka wanda mumu lia kwoka cha yishi.
7 Mba kambaji yoze Yesu te akuzanga yalweza Petulu ngwenyi: “Au kali Mwene!” Muze Semone Petulu hevwa ngwenyi, au kali Mwene, yazala mazalo jenyi, mumu te kali uselesele,* yalikuvula mu kalunga-lwiji.
8 Alioze, tumbaji akwo yeza mu wato ukehe ni kukoka wanda wa too ni yishi, mumu te hakamwihi ali ni ha tunda, kapwile ngwe ha usuku wa 90 a metru.*
9 Muze haheta hatunda, yamona kahia, ni yishi helu lia makala ni mbolo.
10 Yesu yamba kuli ayo ngwenyi: “Nehenu amwe yishi waze nwakwata haliapwila.”
11 Mba Petulu yanjila mu wato, yakoka wanda ha tunda, te unazale too ni yishi, mwapwile yishi anene-anene, 153. Chipwe ngwe mwapwile yishi anji, nihindu wanda kuwakatanukine.
12 Yesu yamba kuli ayo ngwenyi: “Tweyenu nulie.” Niumwe wa kuli tumbaji kapwile ni hamu lia kumuhula ngwenyi: “Yena iya?” Mumu ayo te kananyingika ngwo iye kali Mwene.
13 Yesu yakundama, yanda mbolo, yaaha, yalinga chizechene nawa ni yishi.
14 Chino chili chisuho chamuchitatu chize Yesu asolokele kuli tumbaji twenyi, muze te hamuhindwisa hakachi ka afu.
15 Muze ayo te hahwisa kulia, Yesu yahula Semone Petulu ngwenyi: “Semone, mwana wa Yoano, shina wakunguzanga chinji kuhiana wano?” Iye yamukumbulula ngwenyi: “Ewa Mwene, yena unanyingika ngwe, nakukuzanga.” Yesu yamba kuli iye ngwenyi: “Lisa mapanga jami.”
16 Yamuhula cheka nawa chisuho chamuchiali ngwenyi: “Semone, mwana wa Yoano, shina wakunguzanga?” Iye yamukumbulula ngwenyi: “Ewa Mwene, yena unanyingika ngwe, nakukuzanga.” Yesu yamba kuli iye ngwenyi: “Funga ana-mapanga jami.”
17 Iye yamuhula chisuho chamuchitatu ngwenyi: “Semone, mwana wa Yoano, shina wakunguzanga?” Petulu yevwa chinyengo ha chize Yesu amuhulile ha chisuho chamuchitatu ngwenyi: “Shina wakunguzanga?” Kashika, Petulu yamulweza ngwenyi: “Mwene, yena unanyingika yuma yeswe; unanyingika ngwe, nakukuzanga.” Yesu yamba kuli iye ngwenyi: “Lisa ana-mapanga jami.
18 Pundu ngunakulweze ngwami, muze wapwile mukweze te wakuzala ni kuya kweswako unazange. Alioze, muze mupwa kashinakaji, mukolola moko, mutu mweka makakujika ni kukutwala kuze kuwazangile.”
19 Kambile chino hanga asolole kufwa chize Petulu te mahalisa nacho Zambi. Muze hamba maliji wano, yamba kuli iye ngwenyi: “Nunga ni kungukaula.”
20 Petulu yateuluka, yamona kambaji yoze Yesu te akuzanga kanaakaula, yoze wasenyene mu kondo lia Yesu muze te anali, ni kumuhula ngwenyi: “Mwene, iya makukunjika?”
21 Kashika, muze Petulu hamumona, yamba kuli Yesu ngwenyi: “Mwene, mba yika muyikalingiwa kuli mutu yono?”
22 Yesu yamba kuli iye ngwenyi: “Nyi munguzanga anunge ni mwono ndo muze mungukeza, shina yino yinakutala? Yena nunga ni kungukaula.”
23 Lusango yalimwanga hakachi ka mandumbu ngwo, kambaji wacho te kechi kufwa. Alioze Yesu kakambile ngwenyi, iye te kechi kufwa, alioze kambile ngwenyi: “Nyi munguzanga anunge ni mwono ndo muze mungukeza, shina yino yinakutala?”
24 Kambaji wacho mwe unahanjika yuma yino, ni kuyisoneka, ni yetu tunanyingika ngwetu uchela wenyi uli wamwenemwene.
25 Kwamba pundu, kuli nawa yuma yikwo yinji yize Yesu alingile, nyi te kayisonekene yeswe mu yimako-yimako, ngunanyongo ngwami, chipwe hashi te kuhechi kupwa chihela chinakumbana hanga atulikileho yivungo yacho.
