Asonekene Yoano 3:1-36
3 Hakachi ka A-Fwariseu hapwile umwe lunga avuluka ngwo Nikondemu, mukwa-kuyula wa A-Yunda.
2 Iye yeza kuli Yesu ufuku, yamulweza ngwenyi: “Longeshi, tunanyingika ngwetu weza ngwe longeshi wa kuli Zambi, mumu kukushi mutu niumwe mahasa kulinga yilayi yize yenu nunalingi, nyi Zambi keshi hamwe ni iye.”
3 Yesu yamukumbulula ngwenyi: “Ngunakulweze pundu ngwami, nyi mutu kasemukine cheka, kechi kuhasa kumona Wanangana wa Zambi.”
4 Nikondemu yamuhula ngwenyi: “Kuchi mutu yoze hapwa mukulwana mahasa kusemuka? Shina mahiluka mu jimo lia naye hanga asemuke cheka?”
5 Yesu yamukumbulula ngwenyi: “Pundu ngunakulweze ngwami: Nyi mutu kasemukine mu meya ni mu spiritu, kechi kuhasa kunjila mu Wanangana wa Zambi.
6 Chize chakusemuka ku musunya, chili cha musunya, chize chakusemuka ku spiritu, chili cha spiritu.
7 Kanda ukomoka muze nakulweza ngwami: Yenu nwatamba kusemuka cheka.
8 Fuji yakupekumukina kweswako yinazange, nwakwivwa zungo liayo, alioze kunwanyingikine kuze yakukatuka, chipwe kuze yakuya. Che chakupwa kuli mutu yoze wakusemuka mu spiritu.”
9 Mba Nikondemu yamuhula ngwenyi: “Kuchi yuma yino muyihasa kulingiwa?”
10 Yesu yamukumbulula ngwenyi: “Ngwami uli longeshi mu Izalele, nihindu kuwanyingikine yuma yino?
11 Pundu ngunakulweze ngwami: Yetu twakuhanjika yize tunanyingika, twakuhana uchela wa yize hitunamono, alioze yenu kunushi kutayiza uchela uze twakunwaha.
12 Yami nanulweza yuma ya hashi, chipwe chocho kunwatayijile, mba kuchi munutayiza nyi mungunulweza yuma ya mwilu?
13 Chikwo nawa, niumwe mutu kanda achiya mwilu, shina wika yoze wakatukile mwilu, mwe Mwana-mutu.
14 Ngwe chizechene Mose azezelekele kapela mu puya, ni Mwana-mutu neye che makamuzezeleka,
15 hanga mweswawo mafuliela muli iye akapwe ni mwono wa mutolo.
16 “Mumu Zambi yazanga chinji akwa-hashi, kashika atumine Mwanenyi wa wika, hanga mweswawo mafuliela muli iye kechi kamunongesa alioze akapwe ni mwono wa mutolo.
17 Mumu Zambi kakatumine Mwanenyi hanga asopese akwa-hashi, alioze hanga akwa-hashi akaalamwine kupalikila muli iye.
18 Yoze wakufuliela muli iye kechi kamusopesa. Yoze kafulielele hanamusopesa, Mumu kafulielele mu jina lia Mwana wa wika wa Zambi.
19 Chino che chishina cha usopelo: mumu pangu liejile hashi, alioze atu yazanga milima shimbu azange pangu, mumu yitanga yo yapwile yipi.
20 Mumu yoze wakulinga yuma yipi, keshi kuzanga pangu, keshi kukundama ku pangu hanga yitanga yenyi yipi achine kuyisolola.
21 Alioze, yoze wakulinga yuma yipema, kakukundama ku pangu hanga yitanga yenyi yisolole ngwo, yinalite ni upale wa Zambi.”
22 Ha kupalika cha mashimbu, Yesu ni tumbaji twenyi yaya ku yihunda ya Yundeya, kuzekwene yatwama no amwe mashimbu ni kupapachisa atu.
23 Alioze, Yoano neye te kanapapachisa atu ku Enone, hakamwihi ni Salini, mumu ku chihela chacho kwapwile meya anji, e atu te kakuya kuli iye mba maapapachisa;
24 ha shimbu liacho, Yoano te kanda achimusa mu zuwo lia ususu.
25 Hazehene, tumbaji twa Yoano yalihangujola ni umwe Ka-Yunda hakutwala ku chikuma cha kulipemesa.
26 Ayo yaya ni kulweza Yoano ngwo: “Longeshi, mutu yoze te uli nenyi mu sali lia Yordau, yoze yena watulwezanga sango jenyi, kanapapachisa, atu eswe kuli iye anayi.”
27 Yoano yakumbulula ngwenyi: “Mutu kechi kuhasa kutambula chuma nichimwe nyi kamuhelecho kwilu.
28 Yenu ene nuli yela ja maliji waze nambile ngwami: ‘Yami hi nguli Kristu ko, alioze kangutumine kulutwe lienyi.’
29 Yoze uli ni ndungi mwe sandungi, alioze muze sepa lia sandungi mamana hamwe nenyi ni kumupanjika, kakuwahilila chinji ha kwivwa liji lia sandungi. Kashika, uwahililo wami hiwakumbana.
30 Iye katamba kuya kulutwe, alioze yami natamba kukokoloka.”
31 Yoze unakatuka mwilu, kanahiana eswe. Yoze unakatuka hashi, kali mukwa-hashi, kakuhanjika yuma ya hashi. Yoze unakatuka mwilu, kanahiana eswe.
32 Iye kanahana uchela wa yuma yize amwene ni yize evwile, alioze niumwe kasolo kutayiza uchela wenyi.
33 Yoze wakutayiza sango jenyi, kali ni shindakenyo ngwenyi Zambi kali wamwenemwene.
34 Mumu yoze Zambi atumine, kakwambujola maliji ja Zambi, mumu iye keshi kuhana spiritu yenyi yakuzonga.*
35 Tata kakuzanga Mwana, kashika hanakunjika yuma yeswe mu moko jenyi.
36 Yoze wakufuliela muli Mwana, kali ni mwono wa mutolo, yoze keshi kwononokena Mwana kechi kapwa ni mwono, alioze ufwatulo wa Zambi uli hali iye.
Footnotes
^ Hanji “ndambu-ndambu.”
