Asonekene Yoano 4:1-54
4 Muze Yesu* hanyingika ngwenyi, A-Fwariseu hevwa ngwo iye kanapapachisa tumbaji anji kuhiana Yoano,
2 chipwe ngwe Yesu mwene te keshi kupapachisa atu, alioze tumbaji twenyi wika e apwile ni kupapachisa atu,
3 iye yakatuka mu Yundeya, yaya cheka ku Ngalileya.
4 Alioze te chamutamba kupalika mu Samaria.
5 Chocho yaheta mu chimwe chihunda cha mu Samaria, avuluka ngwo Saika, hakamwihi ni munda uze Yakomba ahanyine kuli mwanenyi Yosefwe.
6 Kwenako kwapwile shima lia meya lia Yakomba. Amu Yesu te anahongo mumu lia wenyi, yatwama hakamwihi ni shima lia meya. Yapwile ngwe ha ola yamuchisambano.
7 Chocho, umwe pwo Ka-Samaria yeza hanga atahe meya. Yesu yamulweza ngwenyi: “Ngwehe kama ndambu ya meya hanga ngunwe.”
8 (Tumbaji twenyi te haya mu mbonge ni kulanda kulia.)
9 Mba Ka-Samaria yamba kuli iye ngwenyi: “Yena uli Ka-Yunda, kuchi unangwichi meya, yami pwo Ka-Samaria?” (Mumu A-Yunda te keshi kulivwashana ni A-Samaria.)
10 Yesu yamukumbulula ngwenyi: “Nyi te unanyingika chawana cha Zambi, ni kunyingika yoze wakulweza ngwenyi: ‘Ngwehe kama ndambu ya meya ngunwe,’ kachi yena te muwita kuli iye, mba iye makwaha meya a mwono.”
11 Pwo yamulweza ngwenyi: “Mwene, kushi ni chikashi nichimwe cha kuswita nacho meya, lie shima lisuku. Mba meya jacho a mwono kulihi mwawana?
12 Shina yena uli munene kuhiana kalamba ketu Yakomba, yoze watuhele shima lino, wanwinemo ni ana jenyi ni yimuna jenyi?”
13 Yesu yamukumbulula ngwenyi: “Mweswawo manwa meya wano, kumakevwa nawa pwila.
14 Yoze manwa meya waze yami mungumwaha, kechi kevwa nawa pwila, alioze meya waze mungumwaha mapwa muli iye shima lia meya lize liakuvwelwoka hanga akapwe ni mwono wa mutolo.”
15 Pwo yamulweza ngwenyi: “Mwene, ngwehe kama meya jacho hanga nguhone kwivwa pwila, chipwe kwiza nawa kuno ni kutaha meya.”
16 Iye yamulweza ngwenyi: “Yako usanyike mukwenu-lunga hanga nwize kuno.”
17 Pwo yamukumbulula ngwenyi: “Chishi ni lunga.” Yesu yamulweza ngwenyi: “Wamba umwenemwene hakwamba ngwe: ‘Chishi ni lunga.’
18 Mumu kakumbachile kuli malunga atano, alioze lunga yoze uli nenyi hapwila, hi mukwenu-lunga ko. Kashika wahanjika umwenemwene.”
19 Pwo yamulweza ngwenyi: “Mwene, ngunamono ngwami uli profeta.
20 Tulamba twetu kanakawayila Zambi ha mulundu uno, alioze atu je kakwamba ngwo, kuze atu atamba kuwayila Zambi ku Yerusaleme.”
21 Yesu yamulweza ngwenyi: “Pwo, tayiza yize ngunakulweze, ola muyiza, muze kunuchi kawayila Tata chipwe ha mulundu uno chipwe ku Yerusaleme.
22 Yenu nwakuwayila chize kunwanyingikine; yetu twakuwayila chize twanyingika, mumu ulamwino unakatuka kuli A-Yunda.
23 Alioze, ola muyiza chipwe haliapwila hiyaheta, muze akwa-kuwayila amwenemwene, makawayila Tata mu spiritu ni mu umwenemwene, mumu Tata kanafupa atu wano hanga amuwayile.
24 Zambi kali Spiritu, kashika waze mamuwayila katamba kumuwayila mu spiritu ni mu umwenemwene.”
25 Pwo yamba kuli iye ngwenyi: “Yami ngunanyingika ngwami Mesaya makeza, yoze avuluka ngwo Kristu. Muze meza, matulweza zwalala yuma yeswe.”
26 Yesu yamba kuli iye ngwenyi: “Yami ngunahanjika ni yena mwe iye.”
27 Hazehene, tumbaji twenyi yaheta, yakomoka, mumu iye te kanahanjika ni umwe pwo. Alioze, niumwe kamuhulile ngwo: “Yika unafupu kuli iye?” hanji ngwo: “Mumu liaka unahanjika nenyi?”
28 Chocho pwo yahichika mulondo* wenyi wa meya, yaya mu mbonge yalweza atu ngwenyi:
29 “Tweyenu numone umwe lunga wangulweza yuma yeswe hingunalingi. Kota yono kali Kristu?”
30 Ayo yatuhuka mu mbonge, yaya kuli iye.
31 Ha shimbu liacho, tumbaji te kanamulembejeka ngwo: “Longeshi, liako kama.”
32 Alioze iye yaalweza ngwenyi: “Nguli ni chimwe kulia chize yenu kunwanyingikine.”
33 Hachino, tumbaji yamba kuli umwe ni mukwo ngwo: “Shina umwe wamunehena chimwe kulia nyi?”
34 Yesu yaalweza ngwenyi: “Kulia chami, chili kulinga upale wa yoze wangutumine ni kuhwisa mulimo wenyi.
35 Yenu kunushi kwamba ngwenu, hikwasala tukweji awana hanga kuhela mbuto chiputuke? Ivwenu! Ngunambe kuli yenu ngwami: Hetulenu meso nutale minda, mbuto hiyahia hanga ayihele. Haliapwila,
36 mukwa-kuhela kanatambula fweto ni kukunga mihuko ya mwono wa mutolo, hanga mukwa-kukuwa ni mukwa-kuhela awahilile hamuwika.
37 Mumu ha chikuma chino, maliji waze akwamba ngwo: Umwe makuwa mukwo mahela, kali amwenemwene.
38 Hingunanutumu hanga nuhele yize kunwalimine. Akwenu kakalakalile chinji, alioze yenu nunayuku ha yuma yize ayo akalakalile.”
39 A-Samaria anji a mu mbonge yacho yafuliela muli iye mumu lia uchela uze pwo ahanyine, ha kwamba ngwenyi: “Iye kangulweza yuma yeswe yize hingunalingi.”
40 Kashika, muze A-Samaria ayile kuli iye, yamwita hanga atwame no, mba iye yatwamamo matangwa aali.
41 Chocho, atu anji yafuliela mumu lia yize ambile,
42 mba ayo yamba kuli pwo ngwo: “Kutwafulielele wika ha yize watulwezanga, mumu chipwe yetwene hitwevwa ni kunyingika ngwo, lunga yono kali chilamwina wa akwa-hashi.”
43 Ha kupalika cha matangwa aali, iye yakatukako yaya ku Ngalileya.
44 Alioze, Yesu mwene te kakwamba ngwenyi, profeta keshi kumulemesa mu chifuchi chenyi.
45 Kashika, muze ahetele ku Ngalileya, A-Ngalileya yamutambula kanawa, mumu kamwene yuma yeswe yize iye alingile mu Yerusaleme ha chiwanyino, mumu no kayile ha chiwanyino chacho.
46 Mba Yesu yaya cheka ku Kena ya Ngalileya, kuze alumwine meya hanga apwe vinyu. Kwapwile umwe chilolo ku Kafwanaume yoze te uli ni mwana wa lunga unayiza.
47 Muze lunga wacho hevwa ngwo, Yesu hakatuka ku Yundeya kanayi ku Ngalileya, yaya kuli iye ni kumwita hanga auke mwanenyi, mumu te kanambe kufwa.
48 Alioze Yesu yamwamba ngwenyi: “Nyi kunwamwene yilayi ni yikomokeso kunuchi kufuliela.”
49 Chilolo yamba ngwenyi: “Mwene, tweya kama, shimbu mwanami kanda achifwa.”
50 Yesu yamulweza ngwenyi: “Muhasa kuya, mwane hahinduka.” Lunga wacho yafuliela ha maliji ja Yesu, chocho yaya kwenyi.
51 Muze te anapalumuka, ndungo jenyi yeza ni kumupatwiza, yamulweza ngwo, mwane hahinduka.
52 Mba iye yahula ola yize mwanenyi ahindukanga. Ayo yamukumbulula ngwo: “Kachiki kahwanga zau, ha ola yitangu* ya chingoloshi.”
53 Kashika tato yanyingika ngwenyi, ola yacho ye anakamulweza kuli Yesu ngwenyi: “Mwane hahinduka.” Chocho iye ni akwa-zuwo lienyi eswe yafuliela.
54 Chino chili chisuho chamuchiali chize Yesu alingile chilayi, muze akatukile ku Yundeya hanga aye ku Ngalileya.
