Asonekene Yoano 7:1-52
7 Hanyima lia yino, Yesu yanunga mu wenyi ku Ngalileya, kakazangile kwendela mu Yunda, mumu A-Yunda te kanafupu kumushiha.
2 Alioze, Chiwanyino cha A-Yunda cha Yisakila te chinakundama.
3 Mba ana-kwo yamulweza ngwo: “Katuka kuno, yako ku Yundeya hanga tumbaji twe no amone milimo yize unalingi.
4 Mutu nyi mazanga hanga mbunga amunyingike, keshi kulingila yuma ku tenga. Nyi unalinga yuma yino, lisolole kuli akwa-hashi.”
5 Kwamba pundu, ana-kwo te keshi kumufuliela.
6 Kashika Yesu yaalweza ngwenyi: “Ola yami kanda yichiheta, alioze kuli yenu yeswayo ola yinapeme.
7 Akwa-hashi kechi kuhasa kunuvwila kole, alioze kakunguvwila yami kole, mumu nakuhana uchela hali ayo ngwami, yitanga yo yipi.
8 Yenu kandukenu ku chiwanyino; yami chichi kuyako haliapwila, mumu shimbu liami kanda lichiheta.”
9 Mba muze haalweza yuma yino, Yesu yanunga mu Ngalileya.
10 Alioze, muze ana-kwo hakanduka ku Chiwanyino, neye yakanduka, hi kumeso ja atu ko, alioze ku tenga.
11 Kashika, A-Yunda yaputuka kumufupa ha chiwanyino ni kwamba ngwo: “Mutu auze kulihi ali?”
12 Mbunga te kanalinyenyeta chinji hakutwala kuli iye. Amwe hakachi ko te kanambe ngwo: “Iye mutu mupema.” Akwo ngwo: “Ka. Iye kanapiangula mbunga.”
13 Alioze, niumwe te keshi kuhasa kuhanjika hakutwala kuli iye ha mbunga, mumu te kanevu woma wa A-Yunda.
14 Muze chiwanyino chahetele hakachi, Yesu yakanduka, yanjila mu tembele yaputuka kulongesa.
15 A-Yunda yaputuka kukomoka ni kwamba ngwo: “Kuchi mutu yono ali ni chinyingi chipwahaha cha Yisoneko, se kakalilongesele ku shikola?”
16 Chocho Yesu yaakumbulula ngwenyi: “Yize nakulongesa hi ya yami ko, alioze ya yoze wangutumine.
17 Nyi kachi umwe mazanga kulinga upale Wenyi, manyingika nyi malongeso wano kali a Zambi nyi kanakatuka kuli yami.
18 Mutu yoze mahanjika yuma yize yinakatuka kuli iye mwene, kanafupu lufuma wenyi mwene; alioze yoze mafupa lufuma wa yoze wamutumine, mwenawo wamwenemwene, muli iye uhenge kuushimo.
19 Ngwami Mose kanuhele Shimbi, hi chocho ko? Alioze niumwe wa kuli yenu wakwononokena Shimbi yacho wakuhi. Mumu liaka nunazange kungushiha?”
20 Mbunga yakumbulula ngwo: “Yena uli ni ndemoniu. Iya unazange kukushiha?”
21 Yesu yaakumbulula ngwenyi: “Nalinga wika chuma chimuwika, alioze yenu eswe nunakomoka.
22 Kashika, nyongenu hachino: Mose kanuhele ungalami—kuchapwile ngwe wakatukile kuli Mose alioze kuli tulamba—mba yenu nwakupwisa mutu ngalami ha tangwa lia Sambata.
23 Nyi mutu kakumupwisa ngalami ha tangwa lia Sambata, hanga ahone kutangula Shimbi ya Mose, mumu liaka nunanguvwila uli ha kuuka mutu ha tangwa lia Sambata?
24 Litwaminenu kupatwila atu kulita ni chize anasoloka,* alioze patulenu kulita ni ululi.”
25 Kashika, atu amwe waze atwama mu Yerusaleme yaputuka kwamba ngwo: “Ngwami au kali mutu yoze nunafupu kushiha?
26 Talenu, kanahanjika ha mbunga, nihindu ayo keshi kumwamba nichimwe. Shina akwa-kuyula jetu kananyongo lume ngwo iye mwe Kristu?
27 Yetu tunanyingika kuze mutu yono anakatuka; alioze muze Kristu makeza, mutu niumwe kechi kanyingika kuze makakatuka.”
28 Muze Yesu te analongesa mu tembele, yakololoka ngwenyi: “Yenu nunangunyingika, nunanyingika kuze yami ngunakatuka, chalijilile yami mwene, alioze Yoze wangutumine kali wamwenemwene, yenu kunwamunyingikine.
29 Yami ngunamunyingika mumu neza mu jina lienyi, Iye mwe wangutumine.”
30 Kashika, ayo yafupa kumukwata, alioze niumwe kahashile kumukwata, mumu ola yenyi te kanda yichiheta.
31 Alioze, atu anji hakachi ka mbunga yafuliela muli iye ni kwamba ngwo: “Muze Kristu makeza shina makalinga yilayi yinji kuhiana yize mutu yono analingi?”
32 A-Fwariseu yevwa mbunga kanalinyenyeta yuma yino hakutwala kuli iye, kashika asasendote a lutwe ni A-Fwariseu yatuma tufunga hanga amukwate.
33 Mba Yesu yamba ngwenyi: “Mungutwama ni yenu hakehe wika, shimbu kanda nguchiya kuli Yoze wangutumine.
34 Yenu munukangufupa, alioze kunuchi kanguwana, kuze mungukaya, yenu kunuchi kuhasa kuyako.”
35 Kashika, A-Yunda yamba kuli umwe ni mukwo ngwo: “Mutu yono kulihi anambe kuya mba tuhone kumuwana? Shina kanambe kuya kuli A-Yunda waze amwanganyine hakachi ka A-Ngresia ni kulongesa A-Ngresia?
36 Yika anambe kwamba ni maliji wano ngwenyi: ‘Yenu munukangufupa alioze kunuchi kanguwana, chikwo nawa ngwenyi kuze munguya yenu kunuchi kuhasa kuyako’?”
37 Ha tangwa lia kasula, tangwa linene lia chiwanyino, Yesu yamana, yakololoka ngwenyi: “Nyi umwe kali ni pwila ya meya, eze kuli yami hanga anwe.
38 Mweswawo mafuliela muli yami, ngwe chize Chisoneko chinambe ngwo: ‘Muchima lienyi ngiji ja meya a mwono mujipukumuka.’”
39 Ha kwamba maliji wano, iye te kanahanjika hakutwala ku spiritu yize waze akufuliela muli iye makatambula; mumu ha mashimbu jacho spiritu te kuyishiko, Yesu te kanda achimufumanyisa.
40 Amwe waze apwile ha mbunga, muze hevwa maliji wano yamba ngwo: “Yono chamwenemwene kali Profeta.”
41 Akwo yamba ngwo: “Au mwe Kristu.” Alioze eka ngwo: “Shina ku Ngalileya mukuhasa kukatuka Kristu?
42 Ngwami Yisoneko yakwamba ngwo, Kristu makeza ku munyachi wa Ndawichi ku Mbeteleme, chihunda chize Ndawichi apwile?”
43 Chocho mbunga yalihandununa mumu lia iye.
44 Amwe a kuli ayo yazanga kumukwata, alioze niumwe kahashile kumukwata.
45 Kashika, tufunga yahiluka kuli asasendote a lutwe ni kuli A-Fwariseu, mba ayo yaahula ngwo: “Mumu liaka kunwejile nenyi?”
46 Tufunga yakumbulula ngwo: “Niumwe mutu kanda achihanjika kama chichize nilimwe tangwa!”
47 Mba A-Fwariseu yamba ngwo: “Shina ni yenu kanupiangula?
48 Shina umwe wa kuli akwa-kuyula jetu hanji A-Fwariseu, kafuliela muli iye?
49 Alioze mbunga yino kuyanyingikine Shimbi, kali atu akushingiwa.”
50 Nikondemu, umwe wa kuli ayo, yoze wayile kuli Yesu ha shimbu limwe, yamba kuli ayo ngwenyi:
51 “Shina Shimbi yetu, yakulianga kupatwila mutu, shimbu kanda achimwivwa ni kunyingika yize analingi?”
52 Ayo yamukumbulula ngwo: “Shina ni yena uli wa ku Ngalileya nyi? Hengwola, muumona ngwo, ku Ngalileya kushi kukatuka profeta niumwe.”
Footnotes
^ Hanji “chize akusoloka ku meso.”
