Asonekene Yoano 8:12-59
8 12 Mba Yesu yamba cheka kuli ayo ngwenyi: “Yami nguli pangu lia hashi. Yoze mangukaula, kechi kenda mu milima, alioze makapwa ni pangu lia mwono.”
13 Chocho A-Fwariseu yamba kuli iye ngwo: “Yena wakuhana uchela hakutwala kuli yena mwene; kashika uchela we hi wamwenemwene ko.”
14 Yesu yaakumbulula ngwenyi: “Chipwe ngwe munguhana uchela wa yami mwene, nihindu uchela wami uli wamwenemwene, mumu ngunanyingika kuze nakatukile ni kuze ngunayi. Alioze yenu kunwanyingikine kuze nakatukile, chipwe kuze ngunayi.
15 Yenu nwakusopesa kulita ni musunya; alioze yami chishi kusopesa mutu niumwe.
16 Chipwe ngwe mungusopesa umwe mutu, usopeso wami uli wamwenemwene, mumu chishi ukawami, alioze Tata, yoze wangutumine, kali hamwe ni yami.
17 Chipwe mu Shimbi yenu, hanasonekamo ngwo: ‘Uchela wa atu aali wapwa wamwenemwene.’
18 Yami nakuhana uchela hakutwala kuli yami mwene, ni Tata yoze wangutumine kakuhana uchela hakutwala kuli yami.”
19 Mba ayo yamuhula ngwo: “Tatenu kulihi ali?” Yesu yaakumbulula ngwenyi: “Yenu kunwangunyingikine, chipwe Tata kunwamunyingikine. Nyi te nunangunyingika, kachi mununyingika nawa Tata.”
20 Yesu kahanjikile maliji wano muze te ali ha chihela haze hatwama mishete ya milambu, muze te analongesa mu tembele. Alioze niumwe kamukwachile, mumu ola yenyi te kanda yichiheta.
21 Cheka nawa, iye yamba kuli ayo ngwenyi: “Yami munguya kwami, yenu munukangufupa, alioze munukafwa mu shili yenu. Kuze yami munguya, yenu kunuchi kuhasa kuyako.”
22 Mba A-Yunda yaputuka kwamba ngwo: “Shina malishiha nyi? Mumu kanambe ngwenyi: ‘Kuze yami munguya, yenu kunuchi kuhasa kuyako.’”
23 Yesu yamba nawa ngwenyi: “Yenu nuli akwa-hashi; Yami nguli mukwa-mwilu. Yenu nuli akwa-hashi; Yami hi nguli mukwa-hashi ko.
24 Kashika nanulweza ngwami, munukafwa mu shili yenu. Mumu nyi kunwafulielele ngwenu, yami nguli mutu yoze ngunanulweze, munufwa mu shili yenu.”
25 Mba ayo yamuhula ngwo: “Yena uli iya?” Yesu yaakumbulula ngwenyi: “Mumu liaka ngunanungu ni kuhanjika ni yenu?
26 Nguli ni yuma yinji ya kwamba hakutwala kuli yenu ni kunusopesa. Kwamba pundu, Yoze wangutumine kali wamwenemwene, yuma yize nevwile kuli iye, nakuyamba kuli akwa-hashi.”
27 Ayo te kanyingikine ngwo kanaalweza hakutwala kuli Tata.
28 Mba Yesu yaalweza ngwenyi: “Muze munukahata Mwana-mutu ha mutondo, mba munukanyingika ngwenu, yami nguli iye, nawa ngwo, chishi kulinga chuma nichimwe cha ku nyonga lia yami mwene; alioze nakwamba yize Tata angulongesele.
29 Yoze wangutumine kali hamwe ni yami; kanguhichikile ukawami, mumu mashimbu eswe nakulinga yuma yize yakumupemena.”
30 Muze hamba yuma yino, atu anji yafuliela muli iye.
31 Mba Yesu yamba kuli A-Yunda waze afulielele muli iye ngwenyi: “Nyi munununga ni kwononokena maliji jami, nuli lume tumbaji twami,
32 munukanyingika umwenemwene, mba umwenemwene, muukanutusula.”
33 Ayo yamukumbulula ngwo: “Yetu tuli munyachi wa Apalahama, nilimwe tangwa kanda tuchipwa ndungo ya mutu niumwe. Mba kuchi unambe ngwe: ‘Munukatusuka’?”
34 Yesu yaakumbulula ngwenyi: “Pundu ngunambe kuli yenu ngwami, mutu mweswawo wa kuvulumuna, kali ndungo ya shili.
35 Chikwo nawa, ndungo keshi kutwama ku zuwo ndo ku miaka yeswe; alioze mwana kakutwama ku miaka yeswe.
36 Kashika, nyi Mwana manutusula, munukatusuka chamwenemwene.
37 Ngunanyingika ngwami nuli munyachi wa Apalahama. Alioze nunafupu kungushiha, mumu kunwatayijile maliji jami.
38 Yami nakuhanjika yize namwene muze napwile ni Tata, alioze yenu nwakulinga yize nwevwile kuli tatenu.”
39 Ayo yamukumbulula ngwo: “Apalahama mwe tata.” Yesu yaamba ngwenyi: “Nyi nuli ana ja Apalahama, kachi nwakulinga milimo ya Apalahama.
40 Nanulweza umwenemwene uze nevwile kuli Zambi, chipwe chocho nunafupu kungushiha, Apalahama kakalingile chocho.
41 Yenu nwakulinga milimo ya tatenu.” Ayo yamba kuli iye ngwo: “Yetu kutwasemukine mu utanji. Tuli ni tata umuwika, iye Zambi.”
42 Yesu yamba kuli ayo ngwenyi: “Nyi te Zambi kali Tatenu, kachi nwakunguzanga, mumu nakatukile kuli Zambi, kashika nguli hano. Chejile ku nyonga lia yami mwene, alioze Iye mwe wangutumine.
43 Mumu liaka yize ngunambe kuyanulumbunukine? Mumu kunushi kuhasa kwivwa maliji jami.
44 Yenu nuli ana ja tatenu Ndiapu, nunazange kulinga upale wa tatenu. Iye wapwile mukwa-kushiha atu chize ku uputukilo, kakanungine mu umwenemwene, mumu umwenemwene kuushi muli iye. Muze akuhanjika mahuza, kakuhanjika kulita ni manyonga jenyi mwene, mumu kali mukwa-mahuza, ni tato ya mahuza.
45 Chikwo nawa, chipwe ngwe ngunanulweze umwenemwene, nihindu kunushi kungufuliela.
46 Iya mukachi kenu mahasa kungwamba ngwenyi nguli chivulumunyi? Nyi ngunahanjika umwenemwene, mumu liaka kunushi kungufuliela?
47 Mweswawo wa kuli Zambi, kakwivwa maliji ja Zambi. Kashika yenu kunushi kwivwa, mumu hi nuli a kuli Zambi ko.”
48 A-Yunda yamukumbulula ngwo: “Shina kutwahanjikile umwenemwene muze twambanga ngwetu: ‘Yena uli Ka-Samaria, ndemoniu uli nenyi’?”
49 Yesu yakumbulula ngwenyi: “Yami chishi ni ndemoniu niumwe, alioze, nakulemesa Tata, yenu nwakungulelesa.
50 Alioze, chishi kufupa uhenya wa yami mwene; kuli mutu yoze wakuufupa, iye mwe wakusopesa.
51 Pundu ngunanulweze ngwami, nyi umwe mononokena maliji jami, kechi keza kafwa nilimwe tangwa.”
52 A-Yunda yamwamba ngwo: “Haliapwila mba hitwanyingika lume ngwetu uli ni ndemoniu, Apalahama hanafu, aprofeta no hanafu, alioze yena unambe ngwo: ‘Nyi mutu mononokena maliji jami, kechi keza kafwa nilimwe tangwa.’
53 Shina yena unahiana tata Apalahama yoze hanafu? Aprofeta no hanafu. Unanyongo ngwe uli iya?”
54 Yesu yakumbulula ngwenyi: “Nyi mungulifumanyisa yami mwene, lufuma wami kali wamokomoko. Alioze Tata mwe unangufumanyisa, yoze yenu nunambe ngwenu, kali Zambi yenu.
55 Yenu kunwamunyingikine, alioze yami ngunamunyingika. Nyi namba ngwami kuchamunyingikine, mungupwa mukwa-mahuza ngwe yenu. Alioze, yami ngunamunyingika, nakwononokena liji lienyi.
56 Tatenu Apalahama kanakawahilila chinji ni chilakenyo cha kumona tangwa liami, chocho yalimona, yawahilila.”
57 Mba A-Yunda yamwamba ngwo: “Yena chipwe miaka 50 kanda uchipwa nayo, kuchi wamwene Apalahama?”
58 Yesu yamba kuli ayo ngwenyi: “Pundu ngunambe kuli yenu ngwami, shimbu Apalahama te kanda achisemuka, yami te kunguli.”
59 Chocho yanda mawe hanga amwase, alioze Yesu yaswama, yatuhuka mu tembele.
