Yoshua 1:1-18
1 Muze Mose kavumbi ka Yehova te hafwa, Yehova yalweza Yoshua* mwana wa Nune, chikwashi cha Mose ngwenyi:
2 “Mose kavumbi kami hafwa, haliapwila lilulieke hanga uzauke Yordau yena ni atu wano hanga nuye mu chifuchi chize nalakenyene kuhana kuli A-Izalele.
3 Mungunwaha yihela yeswe yize mununjila ngwe chize nalakenyene kuli Mose.
4 Njiza yenu muyilitanda chize ku puya ndo ku Lebano ni ku lwiji munene Ufrateze, mu chifuchi cheswe cha A-Hete ndo ku Kalunga-Lwiji Munene ku chitokelo.
5 Niumwe yoze mahasa kukukumba wakuhi. Mungukapwa ni yena ngwe chize napwile ni Mose. Chichi kakuhichika chipwe kukwehuka.
6 Hamuka, takama, mumu yena mwe mukatwala atu wano mu chifuchi chize mungukaaha ngwe chize nalakenyene kuli tulamba jo.
7 “Takama wika, pwako ni hamu linji ni kukaula kanawa shimbi jeswe jize Mose kavumbi kami akutumine. Kanda ulitwamina kwononokena shimbi jino hanga ukahase kusolola mana mu yuma yeswe kweswako kuze muoya.
8 Mukanda uno wa shimbi kanda ukatuka mu kanwa lie,* utange mwalwa ni ufuku ni liji mushi,* hanga umanunune kanawa yeswe yize yinasonewamo. Nyi walinga chocho, yuma yeswe ku mwono we muyenda kanawa, chikwo nawa mukalinga yuma ni mana.
9 Ngunakulweze cheka nawa ngwami, hamuka, takama, kanda wivwa mwongo chipwe woma, mumu Yehova Zambi ye kumapwa hamwe ni yena kweswako kuze muoya.”
10 Mba Yoshua yalweza miata ja atu ngwenyi:
11 “Yeenu mu chilombo cheswe hanga nulweze atu eswe ngwenu: ‘Luliekenu kulia, mumu kwasala matangwa atatu hanga nuzauke Yordau ni kuya mu chifuchi chize Yehova Zambi yenu manwaha ngwe chihinga.’”
12 Kuli A-Rupene, A-Ngate ni kuli chihanda cha munyachi wa Manase, Yoshua yamba ngwenyi:
13 “Iwulukenu maliji waze Mose kavumbi ka Yehova anwambile ngwenyi: ‘Yehova, Zambi yenu, kananwehe chifuchi chino hanga nutwamemo ni sambukila.
14 Mapwo jenu, ana jenu ni yimuna jenu, yenweswe munukatwama mu chifuchi chize Mose anuhele sali lino lia Yordau. Alioze, yenweswe tujita a ndundo, nwatamba kuzauka ni mata jenu kulutwe lia mandumbu jenu. Nwatamba kukwasa
15 mandumbu jenu ndo muze Yehova maaha uhwimino ni kuhinga chifuchi chize Yehova Zambi yenu mahaa, ngwe chize alinga kuli yenu. Muze munulinga chino, mba munuhiluka mu chifuchi chize nunakatambula ni kutwamamo, mu chifuchi chize Mose kavumbi ka Yehova anuhele ku sali lia chivumbuko cha lwiji Yordau.’”
16 Ayo yakumbulula Yoshua ngwo: “Mutulinga yeswe yize watulweza ni kuya kweswako kuze mututuma.
17 Mutukupanjika ngwe chize twapanjikile Mose. Chikwo nawa, Yehova Zambi ye, apwe hamwe ni yena ngwe chize apwile ni Mose.
18 Mutu mweswawo malimika ni shimbi je, ni kulituna yeswe yize muwamba, mamushiha. Hamuka wika ni kutakama.”
Footnotes
^ Lize linalumbunuka “Yehova iye chilamwina.”
^ Hanji “kanda ulitwamina kuhanjika hakutwala ku mukanda uno wa shimbi.”
^ Hanji “kuupukuna.”
