Yoshua 10:1-43
10 Muze Adonezedeke Mwanangana wa Yerusaleme evwile ngwo, Yoshua kakumbile mbonge ya Ayi ni kuyinongesa, chikwo nawa, yalinga mbonge ya Ayi ni mwanangana wamo ngwe chize alingile mbonge ya Yeriku ni mwanangana wamo, ni kwivwa nawa ngwo, A-Ngibeone kalivwashana ni A-Izalele ni kutwama hamuwika no,
2 iye yevwa woma unji, mumu Ngibeone yapwile mbonge yinene, ngwe mbonge yize te akuyula kuli umwe mwanangana. Chikwo nawa, yapwile yinene chinji kuhiana Ayi, ni malunga jamo eswe kapwile tujita.
3 Kashika, Adonezedeke mwanangana wa mu Yerusaleme, yatuma lusango kuli Hohame mwanangana wa Heprone, kuli Pirame mwanangana wa Yaramuta, kuli Yafia mwanangana wa Lakishi ni kuli Ndebire mwanangana wa Eglone ngwenyi:
4 “Tweyenu hanga nungukwase kwasa jita ni A-Ngibeone, mumu ayo kalivwashana ni Yoshua ni A-Izalele.”
5 Chocho mianangana atano, A-Amore, mwanangana wa mu Yerusaleme, mwanangana wa mu Heprone, mwanangana wa mu Yaramuta, mwanangana wa mu Lakishi ni mwanangana wa mu Eglone, yalichinga hamwe ni maswalale jo, yasa chilombo hanga ase jita ni A-Ngibeone.
6 Mba malunga a mu Ngibeone yatuma kulweza Yoshua, muze te uchili mu chilombo ku Ngilingali ngwo: “Kanda womba nyima tuvumbi je. Tweya kawashi! Tulamwine, tukwase kama, mumu mianangana A-Amore waze atwama ku milundu halichinga ase jita ni yetu.”
7 Hachino, Yoshua yakatuka ku Ngilingali ni maswalale jenyi eswe ni tujita akwo a hamu.
8 Yehova yalweza Yoshua ngwenyi: “Kanda wivwa woma, mumu hinaakunjika mu moko je. Niumwe wa kuli ayo mahasa kukukumba wakuhi.”
9 Muze A-Izalele te henda ufuku weswe kukatuka ku Ngilingali, Yoshua yatungumuna mianangana jacho ni kwalukukila.
10 Yehova yevwisa woma unji mianangana jacho kumeso ja A-Izalele, A-Izalele yashiha anji a kuli ayo ku Ngibeone, yaahangila mu jila yinakanduka ku Mbete-Horone ni kushiha anji mu jila ndo ku Azeka ni Makeda.
11 Muze ayo te anachina A-Izalele ni kupalumuka mulundu wa Mbete-Horone, Yehova yanokesa mawe anene-anene a chiwe hali ayo ndo ku Azeka, ayo yafwa. Kwamba pundu, atu waze afwile ni mawe jacho kapwile anji chinji kuhiana waze A-Izalele ashihile ni katana.
12 Ha tangwa lize Yehova akumbile A-Amore kumeso ja A-Izalele, Yoshua yamba kuli Yehova kulutwe lia A-Izalele ngwenyi:
“Tangwa, mana ha Ngibeone,Ni yena kakweji, mana ha chikulo cha Ajalone!”
13 Chocho, tangwa yilimana ni kakweji kalisungile ndo muze A-Izalele akumbile akwa-kole jo. Chino chinasonewa mu mukanda wa Njasha. Tangwa yilimana mukachi ka malilu, kulianjilile kawashi.
14 Kanda kuchipwa kama tangwa ngwe lize Yehova apanjikile kulemba cha mutu mu jila yacho, mumu Yehova te kanashila A-Izalele jita.
15 Kulutwe lia yino, Yoshua ni A-Izalele eswe yafuna mu chilombo ku Ngilingali.
16 Alioze, mianangana atano yachina, yaya ni kuswama ku chivwenge cha Makeda.
17 Chocho yalweza Yoshua ngwo: “Mianangana atano kaawana, kanaswama ku chivwenge cha Makeda.”
18 Kashika, Yoshua yamba ngwenyi: “Langumunenu mawe anene-anene hanga nujike unjililo wa chivwenge ni kusako tufunga.
19 Alioze, malunga akwo a kuli yenu katambile kumana. Nwatamba kuhanga akwa-kole jenu ni kwashihila mu jila. Kanda nwecha hanga anjile mu mambonge jo, mumu Yehova Zambi yenu, haakunjika mu moko jenu.”
20 Yoshua ni A-Izalele kashihile atu anji, alioze waze achinyine ni kunjila mu mambonge a yipanga e asalile ni mwono.
21 Chocho, malunga A-Izalele yafuna kuli Yoshua mu chilombo ku Makeda. Niumwe yoze wambile yuma yipi hakutwala kuli A-Izalele wakuhi.
22 Hachino, Yoshua yamba ngwenyi: “Azululenu unjililo wa chivwenge, tuhwisenu mianangana atano.”
23 Chocho, yatuhwisa mianangana atano mu chivwenge: Mwanangana wa mu Yerusaleme, wa mu Heprone, wa mu Yaramuta, wa mu Lakishi ni mwanangana wa mu Eglone.
24 Muze atwalile mianangana jacho kuli Yoshua, Yoshua yasanyika malunga eswe A-Izalele, yalweza tupitau a tujita waze ayile nenyi ngwenyi: “Kundamenu. Liatenu ha kota ja mianangana wano.” Chocho, ayo yakundama, yaliata ha kota jo.
25 Yoshua yaalweza nawa ngwenyi: “Kanda nwivwa woma chipwe mwongo. Hamukenu ni kutakama, mumu chino che Yehova makalinga ni akwa-kole jenu eswe waze munulimika no.”
26 Hachino, Yoshua yaashiha, yaasukika ha mitondo yitano ni kwazezelekaho ndo chingoloshi.
27 Muze kwatokele, Yoshua yatuma hanga aachize ha mitondo, yaasa mu chivwenge muze anakaswamina, mba yasa mawe anene-anene ku chivwenge, mawe jacho achiliko ndo musono.
28 Ha tangwa liacho, Yoshua yakumba Makeda, yashiha ni katana mwanangana wamo ni eswe waze apwilemo, niumwe yoze wasalile ni mwono wakuhi. Iye yalinga ni mwanangana wa Makeda yize alingile ni mwanangana wa mu Yeriku.
29 Chocho, Yoshua ni A-Izalele eswe yakatuka ku Makeda, yaya ku Libna. Kokwene yasa jita ni Libna.
30 Yehova yahana mbonge yacho ni mwanangana wamo mu moko ja A-Izalele. A-Izalele yanongesa mbonge ni kushiha ni katana eswe waze apwilemo, niumwe yoze wasalile ni mwono wakuhi. Ayo yalinga ni mwanangana wamo ngwe chize alingile ni mwanangana wa Yeriku.
31 Yoshua ni A-Izalele eswe yakatuka ku Libna, yaya ndo ku Lakishi, yasako chilombo ni kwasa no jita.
32 Yehova yakunjika Lakishi mu moko ja A-Izalele, ayo yayikumba ha tangwa liamuchiali. Yayinongesa ni kushiha ni katana eswe waze apwilemo ngwe chize alingile ni Libna.
33 Horame mwanangana wa Ngezere, yakanduka hanga akwase Lakishi, alioze Yoshua yamushiha hamwe ni atu jenyi, kwakasalile mutu niumwe.
34 Chocho Yoshua ni A-Izalele eswe, yakatuka ku Lakishi ndo ku Eglone, yasako chilombo ni kwasa no jita.
35 Ha tangwa liacho, yayikumba ni kuyinongesa ni katana. Yanongesa eswe waze apwilemo ngwe chize alingile ni mbonge ya Lakishi.
36 Mba Yoshua ni A-Izalele eswe, yakatuka ku Eglone, yaya ndo ku mbonge ya Heprone, yasa no jita.
37 Yayikumba ni kuyinongesa ni katana hamwe ni mwanangana wamo, ni yihunda yamo ni eswe waze apwilemo, kahichikilemo mutu niumwe ni mwono. Yayinongesa ni yeswe yize yapwilemo ngwe chize alingile ni Eglone.
38 Kusulaho, Yoshua yaya ni maswalale eswe A-Izalele hanga ase jita ku Ndebire.
39 Yayikumba hamwe ni mwanangana wamo ni yihunda yamo. Yashiha ni katana ni kunongesa eswe waze apwilemo, kakahichikilemo mutu niumwe ni mwono. Iye yanongesa mbonge ya Ndebire ni mwanangana wamo ngwe chize alingile ni mbonge ya Heprone, Libna ni mwanangana wamo.
40 Yoshua yakumba chifuchi cheswe cha ku milundu, Nengeve, yana ni yikulo ni mianangana jamo eswe, kakahichikilemo mutu niumwe ni mwono. Iye yanongesa akwa-mwono eswe ngwe chize Yehova, Zambi ya A-Izalele amutumine kulinga.
41 Yoshua yaakumba chize ku Kandeshe-Mbania ndo ku Ngaza, ni chifuchi cheswe cha Ngoshone ndo ku Ngibeone.
42 Yoshua yakumba mianangana jacho eswe ni yifuchi yo ha shimbu limuwika, mumu Yehova, Zambi ya A-Izalele, mwe te unashila A-Izalele jita.
43 Mba Yoshua yafuna ni maswalale eswe A-Izalele mu chilombo ku Ngilingali.
