Yoshua 11:1-23
11 Muze Jabini mwanangana wa Hazore evwile yuma yino, yatuma tunganda kuli Jobaba mwanangana wa Madone, kuli mwanangana wa Shimerone, kuli mwanangana wa Akasafa,
2 kuli mianangana a ku chifuchi cha milundu ku sango, kuli mianangana a ku yikulo ya ku chivumbuko cha Chinerote, kuli mianangana a ku yana ya Nafo-Ndole ku chitokelo,
3 kuli A-Kanana ku chivumbuko ni ku chitokelo, kuli A-Amore, kuli A-Hete, kuli A-Perize, kuli A-Yepushe ku yihela ya ku milundu ni kuli A-Hevwe ku mwanda wa Hermone mu chifuchi cha Mizepa.
4 Mianangana wano eswe, yakatuka hamwe ni tujita jo, kapwile mbunga yinene ngwe masekeseke a ku sesa lia kalunga-lwiji, kapwile nawa ni tuvwalu anji ni matemba a jita.
5 Mianangana wano eswe yatayiza kulichinga, yasa chilombo cho hakamwihi ni shima lia meya a Merome hanga ase jita ni A-Izalele.
6 Chocho, Yehova yalweza Yoshua ngwenyi: “Kanda wevwila woma, mumu hamene ha ola yino mungukakunjika mianangana wano eswe mu moko ja A-Izalele akushiha kulu. Patula mijipa ya tuvwalu jo ni kwocha matemba jo a jita.”
7 Mba Yoshua ni tujita jenyi eswe yatungumuna akwa-kole jo hakamwihi ni shima lia meya a Merome, yasa no jita.
8 Yehova yakunjika mianangana jacho mu moko ja A-Izalele. Ayo yakumba ni kwahanga ndo ku Sendone Yinene, ku Miserefote-Maime ni ku chikulo cha Mizepa ku chivumbuko, ayo yashiha eswe kahichikile mutu niumwe ni mwono.
9 Yoshua yalinga ngwe chize Yehova amulwezele, yapatula mijipa ya tuvwalu ni kwocha matemba jo a jita.
10 Yoshua yahiluka, yakumba Hazore, yashiha mwanangana wamo ni katana, mumu Hazore yapwile mbonge yilemu ya mianangana wano eswe.
11 Ayo yashiha ni katana eswe waze apwilemo ni kwanongesa. Kumwakasalile chuma nichimwe ni mwono. Mba yocha mbonge ya Hazore.
12 Yoshua yatambula mambonge eswe a mianangana wano, yakumba mianangana jamo ni kwashiha ni katana. Yaanongesa ngwe chize Mose kavumbi ka Yehova amutumine kulinga.
13 Alioze A-Izalele kakochele mbonge niyimwe yize yapwile ku milundu, Yoshua kochele wika mbonge ya Hazore.
14 A-Izalele yanda yuma yeswe yize yapwile mu mbonge hamwe ni yimuna, alioze yashiha ni katana atu eswe. Kahichikilemo mutu niumwe ni mwono.
15 Chizechene ngwe Yehova atumine Mose kavumbi kenyi, chocho Mose yatuma Yoshua, mba Yoshua yachilinga. Yoshua kalingile yuma yeswe yize Yehova atumine Mose kulinga.
16 Yoshua yatambula chifuchi chino cheswe, chifuchi cha ku milundu, Nengeve yeswe, chifuchi cheswe cha Ngoshone, yifuchi ya ku milundu, Arapa ni chifuchi cha ku milundu mu Izalele,
17 chize ku mulundu wa Halaka unakatuka ku Sere ndo ku Mbale-Ngate mu chikulo cha Lebano ku mwanda wa mulundu wa Hermone. Iye yakwata mianangana jamo eswe, yakumba ni kwashiha.
18 Yoshua kashile jita ni mianangana wano eswe ha mashimbu anji.
19 Kumwakapwile mbonge niyimwe yize yalivwashanyine ni A-Izalele, kuchizako wika A-Hevwe waze te atwama mu Ngibeone. Mbonge jikwo jeswe kajitambwile ha kwasa jita.
20 Yehova mwe wechele mianangana jacho akalise mbunge jo hanga ase jita ni A-Izalele ni kwanongesa chakuhona kwevwila keke. Ayo te katamba kwanongesa ngwe chize Yehova atumine Mose kulinga.
21 Ha mashimbu jacho, Yoshua yanongesa A-Anake a ku chifuchi cha ku milundu, cha Heprone, cha Ndebire, cha Anape, ni a ku chifuchi cheswe cha ku milundu ya Yunda, ni a ku chifuchi cheswe cha milundu cha A-Izalele. Yoshua yanongesa eswe hamwe ni mbonge jo.
22 Kukwakasalile niumwe wa kuli A-Anake mu chifuchi cha Izalele. Waze asalile kapwile mu Ngaza, mu Ngata ni mu Ashedode.
23 Chocho, Yoshua yatambula chifuchi cheswe ngwe chize Yehova alakenyene kuli Mose. Mba Yoshua yachihana kuli A-Izalele ngwe chihinga hanga alitetelecho kulita ni minyachi yo. Chocho, chifuchi yichipwa ni ukulungunga.
