Yoshua 13:1-33
13 Yoshua te hapwa kashinakaji, te hakola chinji. Chocho, Yehova yamulweza ngwenyi: “Hiwapwa kashinakaji, hiwakola chinji; alioze kuchili chifuchi chinene chize watamba kukumba.
2 Chino che chifuchi chize chasala kukumba: Yihela yeswe ya A-Filistea ni ya A-Ngeshure,
3 (chize ku lwiji yoze te wakunjila mu lwiji Nilu* wapwile ku chivumbuko cha Engitu ndo mu njiza ya Ekrone ku sango, yize yapwile njiza ya A-Kanana) kuchingaho yifuchi ya manguvulu atano A-Filistea, ya A-Ngaza, ya Ashedode, ya Asekalone, ya Ngate, ya Ekrone ni chifuchi cha A-Avimi,
4 ku uto; chifuchi cheswe cha A-Kanana; Miara, chifuchi cha A-Sendone ndo ku Afeke, ni kuheta mu njiza ya A-Amore;
5 ni ku chifuchi cha Ngebale ni ku Lebano yeswe ya ku chivumbuko, chize ku Mbale-Ngate mu chikulo cha mulundu wa Hermone ndo ku Hamate;
6 ni atu eswe a ku chifuchi cha ku mulundu, chize ku Lebano ndo ku Miserefote-Maime ni A-Sendone eswe. Yami mungwahuma kumeso ja A-Izalele. Chuma watamba kulinga wika, chili kutetela A-Izalele chifuchi ngwe chihinga, kulita ni chize nakulwezele.
7 Kashika, teta chifuchi chino ni kuchihana ngwe chihinga kuli minyachi livwa ni kuli chihanda cha munyachi wa A-Manase.”
8 Chihanda chikwo cha munyachi wa A-Manase, A-Rupene ni A-Ngate, ayo hanatambula chihinga chize Mose ahele mu sali lia Yordau ku chivumbuko, ngwe chize Mose kavumbi wa Yehova aahele:
9 Chize ku Aroere ya ku sesa lia chikulo cha Amone, ni mbonge ya mukachi ka chikulo ni chifuchi cheswe cha ku tunda ya Medeba ndo ku Ndibone;
10 ni mambonge eswe a Sahone, Mwanangana wa A-Amore yoze wayulile mu Heshe-Bone ndo ku njiza ya A-Amone;
11 ni Ngiliate ni chifuchi cheswe cha A-Ngeshure ni cha A-Makata ni mulundu weswe wa Hermone, Mbashane yeswe ndo ku Saleka;
12 chifuchi cheswe cha wanangana wa Oge mu Mbashane, yoze wayulile mu Asatarote ni mu Endreya. (Kuli A-Refane iye wika mwe wasalile.) Mose kakumbile eswe ni kwahuma.
13 Alioze, A-Izalele kakahumine A-Ngeshure ni A-Makata, ayo katwama hakachi ka A-Izalele ndo musono.
14 Mose kakahanyine chihinga kuli A-Levi, mumu milambu ya kahia yize atu te mahana kuli Yehova Zambi ya Izalele, ye te muyipwa chihinga cho ngwe chize Zambi ambile.
15 Mose yahana chihinga kuli munyachi wa A-Rupene kulita ni usoko wo,
16 njiza yo yiyilitanda chize ku mbonge ya Aroere yize yili ku sesa lia chikulo cha A-Amone, ni mbonge ya mukachi ka chikulo ni chihela cheswe cha kutunda ya Medeba;
17 Heshebone ni mambonge jamo eswe waze atwama kutunda, ngwe, Ndibone, Mbamote-Mbale ni Mbete-Mbale-Meone,
18 Yahaze, Kedemote, Mefata,
19 Kiriataime, Sibima, Zerete-Shahale ha mulundu wa mu chikulo,
20 Mbete-Peore ni yihela ya ku mwanda wa Pisga ni Mbete-Jeshimote,
21 mambonge eswe a kutunda ni wanangana weswe wa Sahone, Mwanangana wa A-Amore, yoze wayulile mu Heshebone. Mose yakumba mwanangana wacho ni alemu ja A-Mindiane, Evi, Rekeme, Zure, Hure ni Reba, e yilolo ja Sahone waze te atwama mu chifuchi.
22 Hakachi ka atu waze ashihile kuli A-Izalele ni katana hapwile Mbalau tahi, mwana wa Mbeore.
23 Njiza ya chifuchi cha A-Rupene yapwile Yordau; njiza yacho hamuwika ni mambonge jamo ni yihunda yamo yapwile chihinga cha A-Rupene kulita ni usoko wo.
24 Mose yahana nawa chihinga kuli munyachi wa A-Ngate, kulita ni usoko wo.
25 Njiza ya chifuchi cho yahetele nawa ku Yazere ni mambonge eswe a Ngiliate ni ku chihanda cha chifuchi cha A-Amone ndo ku mbonge ya Aroere yatwama kulutwe lia mbonge ya Raba;
26 yichiya chize ku Heshebone ndo ku Ramate-Mizepa ni Mbetonime, chize ku Mahaneme ndo ku chifuchi cha Ndebire.
27 Mu chikulo mwapwile mbonge ya Mbete-Arame, Mbete-Nimera, Sukote ni Zafone, wano eswe kapwile mambonge a mu wanangana wa Sahone, Mwanangana wa Heshe-Bone. Chikulo chacho te chakuputukila kulutwe lia Yordau ndo ku Kalunga-Lwiji Chinerote, ku chivumbuko cha Yordau.
28 Chino che chapwile chihinga cha A-Ngate kulita ni usoko wo, ni mambonge jo ni yihunda yo.
29 Chikwo nawa, Mose yahana chihinga kuli chihanda cha munyachi wa A-Manase, kulita ni usoko wo.
30 Njiza yo te yakuputukila ku Mahaneme ni kuya ndusu ku Mbashane, mu wanangana weswe wa Oge, Mwanangana wa Mbashane, ni yihunda yeswe ya Njaire mu Mbashane. Mambonge eswe kapwile 60.
31 Chihanda cha Ngiliate, Asatarote ni Endreya, ni mambonge a mu wanangana wa Oge mu Mbashane; yino yeswe yayihana kuli A-Makire, mwana wa Manase, kulita ni usoko wo.
32 Yino ye yihinga yize Mose aahele muze apwile mu chana cha Moape, mu sali lia lwiji Yordau ku chivumbuko cha Yeriku.
33 Alioze Mose kakahanyine chihinga nichimwe kuli A-Levi. Yehova Zambi ya Izalele iye mwe chihinga cho, ngwe chize ambile kuli ayo.
Footnotes
^ Hanji “Shihore.”
