Yoshua 14:1-15
14 Chino che chihinga A-Izalele atambwile mu chifuchi cha Kanana, chize aahele kuli sasendote Eleazare, Yoshua mwana wa Nune ni kuli akwa-lutwe a minyachi ya Izalele.
2 Chihinga cha minyachi livwa ni chipinji kaahelecho ha kuta chela ngwe chize Yehova aatumine kupalikila muli Mose.
3 Mose kahanyine chihinga ku minyachi yikwo yaali ni chipinji mu sali lia Yordau. Alioze, A-Levi kakahele chihinga nichimwe.
4 Ana ja Yosefwe kaalwile ngwe minyachi yiali: Manase ni Eframe. A-Levi kakatambwile chifuchi ngwe chihinga, katambwile wika mambonge muze te matwama ni yihela yamo yakulishila yimuna ni kutulikila upite.
5 Chocho, A-Izalele yalitetela chifuchi ngwe chize Yehova atumine Mose kulinga.
6 Malunga A-Yunda yeza kuli Yoshua ku Ngilingali, mba Kalemba, mwana wa Yefune, Ka-Kenaze yamba kuli iye ngwenyi: “Unanyingika kanawa yize Yehova ambile kuli Mose, mutu wa Zambi wamwenemwene hakutwala kuli yami ni yena ku Kandeshe-Mbania.
7 Napwile ni miaka 40 muze Mose kavumbi ka Yehova angutumine ku Kandeshe-Mbania, hanga nguye ni kwendesa chifuchi, mba yingufuna ni lusango wamwenemwene.
8 Chipwe ngwe waze nayile no kevwishile atu yinyengo, nihindu, yingukaula Yehova Zambi yami ni mbunge yami yeswe.
9 Ha tangwa liacho Mose yalishinga ngwenyi: ‘Chifuchi chize muliata muchipwa chihinga che cha mutolo, cha yena ni ana je, mumu hiwakaula Yehova Zambi yami ni mbunge ye yeswe.’
10 Yehova kangufunga ni mwono ha miaka 45 ngwe chize alakenyene, chize haze Yehova alingile chilakenyo chino kuli Mose muze A-Izalele te achili mu puya. Musono nguli hano ni miaka 85.
11 Nguchili ni tachi ngwe jize napwile najo ha tangwa lize Mose angutumine. Nguli ni tachi ngwe jize napwile najo ha shimbu liacho, tachi ja kuya mu jita ni ja kulinga milimo yikwo.
12 Kashika, ngwehe chifuchi cha ku milundu, chize Yehova alakenyene ha tangwa liacho. Chipwe ngwe ha tangwa liacho wevwile ngwo, kwapwile A-Anake ni mbonge jinene-jinene ja kukolesa, nguli ni shindakenyo ngwami Yehova kumapwa hamwe ni yami, mungwahanga ngwe chize Yehova alakenyene.”
13 Chocho, Yoshua yawahisa Kalemba, mwana wa Yefune ni kumwaha mbonge ya Heprone ngwe chihinga.
14 Kashika Heprone yili ya Kalemba mwana wa Yefune, Ka-Kenaze ngwe chihinga ndo musono, mumu iye kakawile Yehova, Zambi ya A-Izalele ni mbunge yenyi yeswe.
15 Ku mashimbu a kunyima, jina lia Heprone liapwile Kiriate-Arpa (Arpa kapwile umwe lunga mulemu chinji wa A-Anake.) Mba chifuchi chapwile ni sambukila.
