Yoshua 16:1-10
16 Chifuchi chize ahanyine ku munyachi wa Yosefwe, chakatukile chize ku Yordau hakamwihi ni Yeriku ndo ku meya ku chivumbuko cha Yeriku, yichiya mu puya yize yinakanduka ku Yeriku, yichinunga ndo ku chifuchi cha ku mulundu wa ku Mbetele.
2 Yichiya chize ku Mbetele ya ku Luze, yichinunga ndo mu njiza ya A-Arke ku Atarote.
3 Mba yichipalumuka ku chitokelo mu njiza ya A-Yafele ndo mu njiza ya Mbete-Horone ya ku Mwanda ni Ngezere, yichisulila ku kalunga-lwiji.
4 Chocho, Manase ni Eframe, a ku munyachi wa Yosefwe, yatambula chihinga cho.
5 Yino ye yapwile njiza ya chifuchi cha munyachi wa Eframe kulita ni usoko wo: Njiza ya chihinga cho ya ku chivumbuko, yayile chize ku Atarote-Andare ndo ku Mbete-Horone ya ku Tunda,
6 yiyilitanda ndo ku kalunga-lwiji. Mikameta yapwile ku sango, mba njiza yamo yiyitalikisa ku chivumbuko ndo ku Tanata-Shilo, yiyiya ku chivumbuko ndo ku Njanoa.
7 Mba yiyipalumuka ku Njanoa, yiyiya ku Atarote ni ku Nara, yiyiheta ku Yeriku ni kuya ndo ku Yordau.
8 Ku Tapua, njiza yiyinunga ku chitokelo ndo ku chikulo cha Kana, yiyisulila ku kalunga-lwiji. Chino chapwile chihinga cha munyachi wa Eframe, kulita ni usoko wo.
9 Munyachi wa Eframe watambwile nawa ngwe chihinga mambonge ni yihunda yeswe yize yapwile mukachi ka chihinga cha ana ja Manase.
10 Ayo kakahangile A-Kanana waze te atwama mu Ngezere. A-Kanana kananungu ni kutwama mukachi ka A-Eframe ndo musono. Alioze, hanaapwisa ndungo.
