Yoshua 17:1-18
17 Chocho, chela yichiholokela ku munyachi wa Manase, mumu kapwile mwana mutangu wa Yosefwe. Amu Makire, mwana mutangu wa Manase, tato ya Ngiliate apwile kajita, yatambula Ngiliate ni Mbashane.
2 Mba chela yichiholokela kuli waze asalile a ku munyachi wa Manase, kulita ni usoko wo: Ana ja Abieza, ana ja Heleke, ana ja Asariele, ana ja Shekeme, ana ja Hefere ni ana ja Shemida. Wano kapwile a ku munyachi wa Manase mwana wa Yosefwe, malunga kulita ni usoko wo.
3 Alioze, Zelofehade mwana wa Hefere, mwana wa Ngiliate, mwana wa Makire, mwana wa Manase, kakapwile ni ana a malunga, kapwile wika ni ana a mapwo. Majina ja ana jenyi a mapwo kapwile wano: Mala, Noa, Hogala, Milika ni Tiriza.
4 Chocho, ayo yaya kuli sasendote Eleazare, Yoshua mwana wa Nune ni kuli akwa-kuyula, yamba kuli ayo ngwo: “Yehova mwe wahanyine shimbi kuli Mose hanga atwehe chihinga hakachi ka mandumbu jetu.” Kashika, kulita ni shimbi ya Yehova, Yoshua yaaha chihinga hakachi ka mandumbu ja tato.
5 Manase yamwaha yihanda kumi ya chifuchi, helu lia chifuchi cha Ngiliate ni Mbashane yize yapwile mu sali lia Yordau.
6 Mba ana-mapwo a Manase yatambula chihinga hamwe ni ana jenyi a malunga. Chocho chifuchi cha Ngiliate, yichipwa cha munyachi ukwo wa Manase.
7 Njiza ya Manase yaputukile chize ku Ashe ndo ku Mikameta, yize yapwile kulutwe lia Shekeme, yiyinunga ku uto ndo mu chifuchi muze te mwatwama akwa-Ene-Tapua.
8 Chifuchi cha Tapua yichipwa cha Manase, alioze mbonge ya Tapua, haze hasulila njiza ya Manase, yiyipwa ya munyachi wa Eframe.
9 Njiza yiyipalumuka ndo mu chikulo cha Kana, ku uto. Kwapwile mambonge a Eframe mukachi ka mambonge a Manase. Njiza ya Manase yapwile ku sango ya chikulo, yiyisulila ku kalunga-lwiji.
10 Chifuchi cha ku uto chapwile cha Eframe, chifuchi cha ku sango chapwile cha Manase. Mba kalunga-lwiji mwe wapwile njiza yo. Chifuchi cha Manase chahetele ndo ku Ashe, ku sango, yichiheta nawa ndo ku Yisaka, ku chivumbuko.
11 Mu chifuchi cha Yisaka ni Ashe, Manase kasalile ni sali lia Mbete-Shiane ni yihunda yamo, ni Ibliame ni yihunda yamo, ni atu a ku Ndole ni yihunda yamo, ni atu a mu Endore ni yihunda yamo, ni atu a mu Tanaka ni yihunda yamo, ni atu a mu Megidu ni yihunda yamo, yifuchi yitatu yapwile ya ku milundu.
12 Alioze, munyachi wa Manase kuwakahashile kutambula mambonge jacho, mumu A-Kanana kakazangile kukatuka mu chifuchi chacho.
13 Chipwe muze A-Izalele atakamine, nihindu kakahashile kuhuma A-Kanana eswe, alioze yaapwisa ndungo jo.
14 Akwa-munyachi wa Yosefwe yamba kuli Yoshua ngwo: “Mumu liaka watwaha chihanda chimuwika cha chifuchi ngwe chihinga? Yetu tuli anji, mumu Yehova hanatuwahisa ndo musono.”
15 Yoshua yakumbulula ngwenyi: “Nyi nuli anji chinji, yeenu ku mushitu, luliekenuko chimwe chihela mu chifuchi cha A-Perize ni cha A-Refane mumu chifuchi cha ku mulundu wa Eframe chili chikehe chinji kuli yenu.”
16 Mba akwa-munyachi wa Yosefwe yamba ngwo: “Chifuchi cha ku mulundu chili chikehe chinji kuli yetu, chikwo nawa, A-Kanana eswe waze atwama ku chifuchi cha ku chikulo, chipwe waze atwama ku Mbete-Shiane ni yihunda yamo ni waze ali ku chikulo cha Yezerele, kali ni matemba a jita waze ali ni makunga a utale.”
17 Chocho Yoshua yamba kuli akwa-munyachi wa Yosefwe, chekwamba, Eframe ni Manase ngwenyi: “Yenu nuli atu anji, nuli ni tachi jinji. Kashika, kunuchi kutambula wika chihanda chimuwika cha chifuchi,
18 alioze ni chifuchi cha ku mulundu necho muchipwa nichenu. Chipwe ngwe chili wika mushitu, yenu munukachilulieka mba muchikapwa chihanda cha njiza yenu. Munukahanga A-Kanana chipwe ngwe kali yitakame ni matemba a jita waze ali ni makunga a utale.”
