Yoshua 18:1-28
18 Mbunga yeswe ya Izalele yiyilikungulwila ku Shilo. Yasako mbalaka ya chikungulwila, mumu te hakumba chifuchi.
2 Alioze, te kuchili minyachi shimbiali ya A-Izalele yize te kanda yichitambula chihinga cho.
3 Chocho Yoshua yahula A-Izalele ngwenyi: “Yika nunashimbwila mba nuye ni kutambula chifuchi chize Yehova Zambi ya tulamba twenu anuhele?
4 Ku munyachi ni munyachi sakulenuko malunga atatu hanga ngwatume, ayo katamba kuya ni kwendesa chifuchi ku tunda ni ku mwanda ni kusoneka chize chifuchi chapwa hanga achitete kulita ni chihinga cha munyachi ni munyachi. Mba mahiluka kuli yami.
5 Ayo katamba kuteta chifuchi mu yihanda shimbiali. Yunda katamba kununga ni chifuchi chenyi cha ku uto, akwa-munyachi wa Yosefwe katamba kununga ni chifuchi cho cha ku sango.
6 Nukasoneka chize chifuchi chapwa ni kuchiteta mu yihanda shimbiali, mba munungunehena yize munusoneka. Yami mungunutela chela kumeso ja Yehova Zambi yetu.
7 A-Levi kechi kutambula chihinga nichimwe cha chifuchi mukachi kenu, mumu Yehova hanaasakula hanga alinge mulimo wa usasendote. Alioze, A-Ngate, A-Rupene ni chihanda cha munyachi wa A-Manase hanatambula chihinga cho mu sali lia Yordau ku chivumbuko, chize Mose kavumbi ka Yehova aahele.”
8 Malunga waze te maya ni kutala chifuchi yalilulieka hanga aye, Yoshua yaalweza ngwenyi: “Yeenu nutale chifuchi ni kusoneka chize chapwa mba munwiza kuli yami. Yami mungukanutela chela kumeso ja Yehova kuno ku Shilo.”
9 Chocho malunga yaya, yatala chifuchi ku tunda ni ku mwanda ni kusoneka chize chapwa. Ayo yachiteta mu yihanda shimbiali kulita ni mambonge, yasoneka yuma yeswe mu mukanda. Mba yahiluka kuli Yoshua mu chilombo ku Shilo.
10 Yoshua yaatela chela kumeso ja Yehova mu Shilo. Kuzekwene, Yoshua yatetela A-Izalele chifuchi, kulita ni chihanda cha munyachi ni munyachi.
11 Chela yichiholokela hali munyachi wa A-Mbenjamine, kulita ni usoko wo. Chifuchi chize aahele kulita ni chela chapwilile mukachi ka munyachi wa Yunda ni wa Yosefwe.
12 Ku sango, njiza yo yiyiputukila ku Yordau, yiyikanduka mulundu wa ku sango lia Yeriku. Mba yiyikanduka ni kutalikisa ku chitokelo ndo mu puya ya Mbete-Avene.
13 Njiza yiyinunga ndo ku Luze, ku chikulo cha Luze, chekwamba, Mbetele; njiza yacho yiyipalumuka ndo ku mbonge ya Atarote-Andare, ku mulundu wa ku uto ya Mbete-Horone ya ku mwanda.
14 Njiza yiyilitanda ku chitokelo ni kutalikisa ku uto, chize ku mulundu uze uli kulutwe lia Mbete-Horone, ku uto. Yiyisulila ku Kiriate-Mbale, che kwamba, Kiriate-Yerimi, yimwe mbonge ya Yunda. Yino ye yapwile njiza ya ku chitokelo.
15 Njiza ya ku uto te yakuputukila ku songo lia mbonge ya Kiriate-Yerimi, yiyiya ndo ku chitokelo; yiyiya ndo ku shima lia meya a Nefatoa.
16 Njiza te yakupalumuka ndo ku sesa lia mulundu uze wapwile kulutwe lia chikulo cha mwana wa Hinome, ku sango lia chikulo cha Refane. Mba yiyipalumuka ndo mu chikulo cha Hinome, ni ku mulundu wa ku uto ya A-Yepushe, ni kupalumuka ndo ku shima lia meya Ene-Rogele.
17 Mba njiza yiyitalikisa ku sango ndo ku Ene-Shemeshe, yiyiheta mu chifuchi cha Ngelilote, chize chapwile kulutwe lia mulundu wa Andumime ni kupalumuka ndo ku liwe lia Mbohane mwana wa Rupene.
18 Yiyinunga ndo ku sango, kulutwe lia mulundu wa Arapa, yiyipalumuka ndo ku Arapa.
19 Njiza yiyinunga ndo ku sango lia mulundu wa ku Mbete-Hogala, yiyisulila mu chikulo cha Kalunga-Lwiji wa Mungwa ku sango, ku songo lia lwiji Yordau ku uto. Yino ye yapwile njiza ya ku uto.
20 Ku chivumbuko, Yordau mwe wapwile njiza. Yino ye yapwile njiza yeswe ya chihinga cha munyachi wa Mbenjamine, kulita ni usoko wo.
21 Mambonge a munyachi wa Mbenjamine, kulita ni usoko wo kapwile wano: Yeriku, Mbete-Hogala, Emeke-Kezize,
22 Mbete-Arapa, Zemaraime, Mbetele,
23 Avimi, Para, Ofra,
24 Chefari-Amoni, Ofini ni Ngeba. Mambonge wano eswe kapwile 12 ni yihunda yamo.
25 Ngibeone, Rama, Mberote,
26 Mizepa, Chefira, Moza,
27 Rekeme, Iripiele, Tarala,
28 Zela, Elefe, Yepushe, chekwamba, Yerusaleme, Ngibia ni Kiriate-Yerimi—mambonge wano eswe kapwile 14 ni yihunda yamo.
Mambonge wano e apwile chihinga cha munyachi wa Mbenjamine kulita ni usoko wo.
