Yoshua 20:1-9
-
Mambonge a uchinyino (1-9)
20 Yehova yalweza Yoshua ngwenyi:
2 “Lweza A-Izalele ngwo: ‘Sakulenu mukachi kenu mambonge a uchinyino, ngwe chize nanulwezele kupalikila muli Mose,
3 hanga yoze mashiha mutu chakuhona kumuhalila hanji kumuvwila kole achinyinemo. Mambonge jacho makanufunga ku moko ja mukwa-kukala manyinga.
4 Iye katamba kuchinyina mu yimwe ya ku mambonge jacho, mba mamana mu chikolo cha mbonge, mambulula mulonga wenyi kuli makulwana a mu mbonge yize. Ayo katamba kumutambula mu mbonge ni kumwaha chihela cha kutwama.
5 Nyi mukwa-kukala manyinga* mamukaula, kunwatambile kumwaha mutu wacho. Mumu iye kashiha mwenyembo wenyi chakuhona kumuhalila chipwe kumuvwila kole.
6 Iye katamba kutwama mu mbonge yacho ndo muze masoloka kumeso ja chikungulwila hanga amusopese. Chikwo nawa, katamba kutwamamo ndo muze sasendote wa lutwe yoze unakalakala ha mashimbu jacho mafwa. Hachino, mutu yoze washihile mukwo, mahasa kufuna mu mbonge yenyi ni kutwama mu zuwo lienyi.’”
7 Chocho, ayo yahandununa Kendeshe mu Ngalileya ku chifuchi cha ku mulundu cha Napatali, Shekeme, ku chifuchi cha ku mulundu cha Eframe ni Kiriate-Arpa, chekwamba, Heprone, ku chifuchi cha ku mulundu cha A-Yunda.
8 Sali lia Yordau, ku chivumbuko cha Yeriku, mu puya, ku tunda, yasakulako mbonge ya Mbezere ya munyachi wa Rupene, ya Ramote mu Ngiliate ya munyachi wa Ngate ni Ngolane mu Mbashane ya munyachi wa Manase.
9 Wano e mambonge waze asakwile hanga A-Izalele eswe ni yilambala waze te atwama mukachi ko achinyinemo nyi umwe wa kuli ayo mashiha mutu chakuhona kumuhalila, nawa hanga achine kumushiha kuli mukwa-kukala manyinga shimbu kanda achisoloka kumeso ja chikungulwila hanga amusopese.
Footnotes
^ Hanji, “mukwa-kufwetesa”
