Yoshua 22:1-34
22 Chocho, Yoshua yasanyika A-Rupene, A-Ngate ni chihanda cha munyachi wa Manase,
2 yaalweza ngwenyi: “Nwalinga yeswe yize Mose kavumbi ka Yehova anutumine, nwakaula liji liami ha kulinga yeswe yize nanutumine.
3 Ha mashimbu eswe awa, kunwehukile mandumbu jenu ndo ha tangwa lia musono, nwakaula shimbi ya Yehova, Zambi yenu.
4 Haliapwila, Yehova Zambi yenu, hahana uhwimino kuli mandumbu jenu ngwe chize alakenyene. Kashika, munuhasa kufuna mu mbalaka jenu mu chifuchi chize Mose kavumbi ka Yehova, anuhele ngwe chihinga mu sali lia Yordau.
5 Chuma nwatamba kulinga wika, chili kufunga kanawa shimbi ni usongwelo uze Mose kavumbi ka Yehova anuhele, ha kuzanga Yehova Zambi yenu, kwenda mu majila jenyi eswe, kufunga usongwelo wenyi, kulikwachilila kuli iye ni kumulingila ni mbunge yenu yeswe ni mwono wenu weswe.”
6 Chocho, Yoshua yaawahisa, yecha hanga aye, mba ayo yafuna mu mbalaka jo.
7 Mose kahanyine chihinga mu Mbashane ku chihanda cha munyachi wa Manase, mba Yoshua yahana chifuchi mu sali lia chitokelo cha Yordau ku chihanda chikwo cha munyachi, hakamwihi ni mandumbu jo. Muze Yoshua aatumine kuhiluka mu mbalaka jo, iye yaawahisa,
8 yaalweza ngwenyi: “Funenu ku mbalaka jenu ni upite unji ni yimuna anji kuhiana, ni prata, oru, unengu, utale ni mahina anji. Litetelenu ni mandumbu jenu upite wa akwa-kole jenu.”
9 Kulutwe lia yino, A-Rupene, A-Ngate ni chihanda cha munyachi wa Manase, yahichika A-Izalele akwo mu Shilo mu chifuchi cha Kanana, yafuna ku Ngiliate chifuchi chize atambwile hanga atwamemo, kulita ni shimbi ya Yehova yize ahanyine kupalikila muli Mose.
10 Muze ahetele ku lwiji Yordau mu chifuchi cha Kanana, A-Rupene, A-Ngate ni chihanda cha munyachi wa Manase, yatunga chilumbilo hakamwihi ni Yordau. Chilumbilo chacho chapwile chinene chinji.
11 Muze A-Izalele akwo achinyingikine, yamba ngwo: “Talenu! A-Rupene, A-Ngate ni chihanda cha munyachi wa Manase katunga chilumbilo mu njiza ya Kanana, mu wambika wa Yordau, mu chihela cha A-Izalele.”
12 Muze A-Izalele eswe achivwile, chikungulwila cheswe cha Izalele yichilikungulula mu Shilo hanga aye ni kwasa no jita.
13 Chocho, A-Izalele yatuma Finehase mwana wa sasendote Eleazare, kuli A-Rupene, A-Ngate ni ku chihanda cha munyachi wa Manase, waze te atwama mu chifuchi cha Ngiliate.
14 Finehase yaya hamuwika ni akwa-kuyula kumi. Mu minyachi yeswe ya A-Izalele kanjilemo mukwa-kuyula umuwika, yoze wapwile mukwa-lutwe wa munyachi wa atato hakachi ka A-Izalele anji.
15 Muze ahetele kuli A-Rupene, A-Ngate ni ku chihanda cha munyachi wa Manase mu chifuchi cha Ngiliate, yamba kuli ayo ngwo:
16 “Chikungulwila cheswe cha Yehova chinambe ngwo: ‘Mumu liaka nwavulumuna kuli Zambi ya Izalele? Musono nwecha kukaula Yehova ha kulitungila yenwene chilumbilo ni kulimika ni Yehova.
17 Shina hinwavulama chize twavulumwine ku Peore nyi? Ni haliapwila tunamono lamba mumu lia musongo uze wejile mu chikungulwila cha Yehova.
18 Yenu nunazange kwecha kulingila Yehova nyi? Nyi nwalimika ni Yehova, iye mapihilila ni chikungulwila cheswe cha Izalele.
19 Nyi nunamono ngwenu, chifuchi chize nwatambwile chili cha luchisa, zaukenu mu sali likwo, mu chifuchi cha Yehova, muze muli tabernakulu ya Yehova hanga nutwame mukachi ketu. Alioze, kanda nulimika ni Yehova chipwe kutupwisa yihulia ha kutunga chilumbilo chize hi cha Yehova ko, Zambi yetu.
20 Muze Akane, mwana wa Zera avulumwine ha kwanda yuma yize te atamba kunongesa, ngwami Zambi kevwilile kupiha chikungulwila cheswe cha Izalele! Hi Akane wika ko wafwile mumu lia uhenge wenyi.’”
21 Chocho, A-Rupene, A-Ngate ni chihanda cha munyachi wa Manase, yakumbulula akwa-lutwe waze asakwile hakachi ka Izalele ngwo:
22 “Yehova, Zambi wa tuzambi! Yehova, Zambi wa tuzambi! Iye kananyingika, ni A-Izalele no makachinyingika. Nyi hitwalimika ni Yehova ni kuvulumuna kuli iye, kanda atuvwila keke ha tangwa lino.
23 Nyi chamwenemwene lume twatunga chilumbilo hanga tweche kulingila Yehova, hanga tulambwileho milambu ya kwocha, milambu ya mbuto ni milambu ya sambukila, Yehova atushihe.
24 Yetu twatunga chilumbilo chino, mumu twevwa woma ngwetu, ‘kulutwe lia matangwa, ana jenu makahula ana jetu ngwo: “Ulite uka nuli nawo wa kuwayila Yehova, Zambi ya Izalele hamuwika ni yetu?*
25 Yehova hanase Yordau ngwe njiza hakachi ka yetu ni yenu, yenu A-Rupene ni A-Ngate. Yenu kunushi ni usepa niumwe ni Yehova.” Ana jenu makakwika ana jetu kuwayila Yehova.’
26 “Kashika, yitwamba ngwetu: ‘Tutungenu haliapwila chimwe chilumbilo, kutuchi kulambwilaho milambu ya kwocha chipwe yitapo,
27 alioze, chikapwe chela hakachi ka yetu ni yenu, hakachi ka munyachi wetu ni munyachi wenu. Chikasolole ngwo, mutukalingila Yehova kumeso jenyi ni kulambula milambu ya kwocha, milambu ya sambukila ni milambu yikwo, hanga ana jenu akachine kwamba kuli ana jetu ngwo: “Yenu kunushi ni usepa niumwe ni Yehova.”’
28 Mumu lia chino yitwamba ngwetu: ‘Nyi kulutwe mamba yuma yino kuli yetu ni ku munyachi wetu, mutukakumbulula ngwetu: “Talenu! Tulamba jetu katungile chilumbilo chino chalifwa ni cha Yehova, hi chakulambwilaho milambu ya kwocha ni yitapo ko, alioze hanga chipwe chela hakachi ka yetu ni yenu.”’
29 Kashika, chikapwe kusuku ni yetu kulimika ni Yehova hanji kulitwamina kulingila Yehova, ha kutunga chilumbilo cha milambu ya kwocha, milambu ya mbuto ni yitapo, mumu chilumbilo cha Yehova Zambi yetu chili kulu ku tabernakulu yenyi!”
30 Muze sasendote Finehase, akwa-kuyula ni akwa-lutwe waze asakwile mukachi ka Izalele evwile maliji waze ambile minyachi ya A-Rupene, A-Ngate ni A-Manase, yawahilila chinji.
31 Chocho, Finehase mwana wa sasendote Eleazare, yamba ku minyachi ya A-Rupene, A-Ngate ni A-Manase ngwenyi: “Musono hitwanyingika ngwetu, Yehova kali mukachi ketu, mumu kunwalimikine ni Yehova, haliapwila, hinwalamwina A-Izalele ku moko ja Yehova.”
32 Mba Finehase, mwana wa sasendote Eleazare, ni akwa-kuyula yahichika A-Rupene ni A-Ngate mu chifuchi cha Ngiliate, yahiluka mu chifuchi cha Kanana ni kutwala lusango kuli A-Izalele akwo waze asalile.
33 A-Izalele yawahilila chinji ni lusango yoze atambwile. Kusulaho, A-Izalele yahalisa Zambi, kahanjikile nawa hakutwala ku kwasa jita ni A-Rupene ni A-Ngate ni kunongesa chifuchi chize apwile.
34 Chocho A-Rupene ni A-Ngate yaluka chilumbilo chacho jina,* mumu chilumbilo chino chili “chela hakachi ka yetu ni yenu ngwo, Yehova kali Zambi wamwenemwene.”
Footnotes
^ Chize Alisonekene, “enu te chimwe chuma nuli nacho ni Yehova, Zambi ya Izalele?”
^ Kulita ni yize ayo ambile, kota chilumbilo chacho kachisanyikine ngwo, chilumbilo cha uchela.
