Yoshua 23:1-16
23 Ha kupalika cha mashimbu anji, chize haze Yehova ahanyine uhwimino kuli A-Izalele, ha kukumba akwa-kole jo eswe, muze Yoshua te hapwa kashinakaji, miaka yenyi te hiyoka chinji,
2 Yoshua yasanyika A-Izalele eswe, makulwana, akwa-lutwe, ngaji ni tupitau a maswalale, yamba kuli ayo ngwenyi: “Hinapwa kashinakaji, miaka yami hiyoka chinji.
3 Yenwene hinwamona yeswe yize Yehova Zambi yenu alinga kuli mavungu wano mumu lia yenu, Yehova Zambi yenu, mwe wanwashila jita.
4 Talenu, hinahuma atu eswe waze te atwama mu chifuchi cha ku chitokelo cha Yordau ndo ku Kalunga-Lwiji Munene. Chifuchi chacho nanwahacho ngwe chihinga kupalikila mu kuta chela. Chipwe ngwe mu chifuchi chacho muchili akwa-mavungu, nihindu nichenu.
5 Yehova Zambi yenu, mwe waahangile kumeso jenu. Iye mwe waahangile mumu lia yenu hanga nutambule chifuchi ni kutwamamo ngwe chize Yehova Zambi yenu anulakenyene.
6 “Haliapwila, hamukenu chinji hanga nwononoke ni kukaula yeswe yize yinasonewa mu mukanda wa Shimbi ya Mose. Kanda nupianguka mu jila yino.
7 Nilimwe tangwa kanda nulichinga ni akwa-mavungu waze asala mukachi kenu, chipwe kuvuluka majina ja tuzambi jo, chipwe kulishinga mu majina jo. Chikwo nawa, nilimwe tangwa kanda nwawayila chipwe kufulamana kumeso jo.
8 Alioze, likwachililenu kuli Yehova Zambi yenu, ngwe chize nwakulinga ndo musono.
9 Mumu Yehova makahanga kumeso jenu mavungu anene ni a tachi; ndo musono, niumwe lunga wahasa kunukumba wakuhi.
10 Lunga umuwika hakachi kenu kumakahanga kanunu ka akwa-kole, mumu Yehova Zambi yenu mwe unanwashila jita ngwe chize anulakenyene.
11 Kashika, zangenu Yehova Zambi yenu, nyi nwachilinga, munukanyama mashimbu eswe.
12 “Alioze, nyi nwapianguka ni kulikata ni akwa-mavungu waze asala mukachi kenu ni kulinga no umbachiso ni kulichinga no,
13 nyingikenu ngwenu, Yehova Zambi yenu, kechi kununga ni kuhanga mavungu wano mumu lia yenu. Ayo mapwa muheto, kambwila, shikote mu nyima lienu ni mbimbo mu meso jenu ndo muze yenu munukuwa mu chifuchi chize Yehova Zambi yenu anwaha.
14 “Talenu! Kwasala hakehe hanga ngufwe, alioze nunanyingika kanawa ni mbunge yenu yeswe, ni mwono wenu weswe ngwenu, nilimwe liji lia ku yilakenyo yeswe yipema yize Yehova Zambi yenu anulakenyene liahona liakuhi. Yeswe yamanunuka kuli yenu, nichimwe kuchahonene.
15 Alioze, ngwe chizechene yilakenyo yeswe yipema yize Yehova Zambi yenu anulakenyene yamanunuka, chizechene nawa Yehova kumakaneha lamba lieswe lize alakenya hali yenu ni kununongesa mu chifuchi chino chipema chize Yehova Zambi yenu anwaha.
16 Nyi munwehuka usendo wa Yehova Zambi yenu, uze anutumine kufunga, nyi munuwayila tuzambi akwo ni kufulamana kumeso jo, ufwatulo wa Yehova kumuwiza hali yenu mba makanukuwisa mu chifuchi chino chipema anwaha.”
