Yoshua 4:1-24
-
Mawe yapwa ngwe chilayi (1-24)
4 Muze vungu lieswe liazaukile Yordau, Yehova yamba kuli Yoshua ngwenyi:
2 “Sakula malunga 12 mukachi ka atu, ku munyachi ni munyachi musakulako mutu umuwika.
3 Alweze ngwe: ‘Andenu mawe 12 mukachi ka Yordau ha chihela haze asasendote te anamana, twalenu mawe jacho nukase haze munukapombela.’”
4 Chocho, Yoshua yasanyika malunga 12 waze atongwele hakachi ka A-Izalele, ku munyachi ni munyachi lunga umuwika.
5 Mba Yoshua yaalweza ngwenyi: “Palikenu kulutwe lia Mushete wa Yehova, Zambi yenu, ndo mukachi ka Yordau, mutu ni mutu wa kuli yenu katamba kusa liwe limuwika ha chipaya kulita ni kwalula cha minyachi ya A-Izalele,
6 hanga chikapwe chilayi mukachi kenu. Kulutwe, nyi ana jenu makanuhula ngwenu: ‘Mumu liaka mawe wano ali hano?’
7 Nwatamba kwakumbulula ngwenu: ‘Mawe wano kali hano mumu meya a Yordau kamanyine kulutwe lia mushete wa usendo wa Yehova. Muze mushete wazaukile Yordau, meya a Yordau yamana. Mawe wano makapwa chilayi kuli A-Izalele ku miaka yeswe.’”
8 Kashika, A-Izalele yalinga kulita ni chize Yoshua atumine. Ayo yanda mawe 12 mukachi ka Lwiji Yordau ngwe chize Yehova aatumine kupalikila muli Yoshua. Liwe limuwika ku munyachi ni munyachi wa A-Izalele, yaatwala ku chihela kuze te mapombela.
9 Chikwo nawa, Yoshua yasa mawe 12 mukachi ka Yordau ha chihela haze aliachile asasendote waze te anambata mushete wa usendo. Mawe jacho achiliko ndo musono.
10 Asasendote waze te anambata Mushete yanunga ni kumana mukachi ka Yordau ndo muze alingile yuma yeswe yize Yehova atumine Yoshua hanga alweze atu, kulita ni yeswe yize Mose atumine Yoshua kulinga. Muze te machilinga yuma yacho, atu yazauka kawashi-washi.
11 Muze atu eswe te hazauka, mba asasendote waze te anambata Mushete wa Yehova no yazauka kumeso ja atu.
12 A-Rupene, A-Ngate ni chihanda cha munyachi wa A-Manase, yazauka ni mata jo yaya kulutwe lia A-Izalele akwo, ngwe chize Mose aatumine.
13 Unji wa maswalale 40,000 waze apwile ni mata jo, yazauka kumeso ja Yehova yaya mu yana ya Yeriku.
14 Ha tangwa liacho, Yehova yanangamisa Yoshua kumeso ja A-Izalele eswe. Mba A-Izalele yamusa vumbi matangwa eswe a mwono wenyi, ngwe chize te akuvumbika Mose.
15 Mba Yehova yalweza Yoshua ngwenyi:
16 “Lweza asasendote waze anambata mushete wa Uchela* hanga atuhuke mu lwiji Yordau.”
17 Chocho, Yoshua yalweza asasendote ngwenyi: “Tuhukenu mu lwiji Yordau.”
18 Muze asasendote waze te anambata mushete wa usendo wa Yehova atuhukile mukachi ka lwiji Yordau ni muze aliachile hashi homu, meya a Yordau yahiluka mu chihela cho ni kusupwokela ku sesa lia lwiji ngwe chize te akulinga.
19 A-Izalele kakatukile ku Yordau ha tangwa kumi lia kakweji mutangu, yatulila mu mbonge ya Ngilingali, mu njiza ya ku chivumbuko cha Yeriku.
20 Yoshua yatwala ku Ngilingali mawe 12 waze anjile mu Yordau.
21 Mba iye yalweza A-Izalele ngwenyi: “Kulutwe lia matangwa, muze ana makahula yisemi jo ngwo: ‘Yika mawe wano analumbunuka?’
22 Yenu munukakumbulula ana jenu ngwenu: ‘A-Izalele kazaukile Yordau hashi homu
23 muze Yehova Zambi yenu omishine meya a lwiji Yordau kumeso jo ndo muze azaukile, ngwe chize Yehova Zambi yenu omishine Kalunga-Lwiji Muchila kumeso jetu hanga tuzauke.
24 Iye kalingile chino hanga mavungu eswe anyingike ndundo ja kwoko lia Yehova, hanga ni yenu nuvwile Yehova Zambi yenu woma ku miaka yeswe.’”
Footnotes
^ Hanji “Mushete wa usendo.”
