Yoshua 5:1-15
5 Mianangana eswe A-Amore waze apwile ku chitokelo cha Yordau ni mianangana eswe A-Kanana waze te atwama hakamwihi ni kalunga-lwiji, yevwa ngwo, Yehova komishine meya a Yordau kumeso ja A-Izalele ndo muze azaukile. Muze ayo achivwile, kakapwile ni tachi ni hamu mumu lia A-Izalele.
2 Ha shimbu liacho, Yehova yalweza Yoshua ngwenyi: “Linga poko ja mawe hanga upwise malunga A-Izalele ngalami.”*
3 Chocho, Yoshua yalinga poko ja mawe, yapwisa malunga A-Izalele ngalami ku Ngibeata-Halaloto.
4 Yoshua kapwishile malunga A-Izalele ngalami mumu lia chino: Malunga eswe waze akatukile ku Engitu, waze apwile ni miaka ya kuya mu jita, kafwile mu puya muze akatukile ku Engitu.
5 Waze eswe akatukile ku Engitu te hanaapwisa ngalami, alioze, eswe waze asemukinyine mu puya mu wenyi wa kukatuka ku Engitu te achili yilima.
6 A-Izalele kendele miaka 40 mu puya ndo muze vungu lieswe liafwile, chekwamba, tujita waze akatukile ku Engitu, waze kakononokene liji lia Yehova. Yehova yalishinga ngwenyi, te kechi kwecha hanga anjile mu chifuchi chize alakenyene tulamba two, chifuchi cha yamwa ni uchi.
7 Kashika, mu chihela cho yasalakanyisamo ana jo waze Yoshua apwishile ngalami mumu ana jacho te achili yilima ha mashimbu a wenyi.
8 Muze vungu lieswe alipwishile ngalami, ayo yatwama mu yihela yo mu chilombo ndo muze yilonda yayile.
9 Yehova yalweza Yoshua ngwenyi: “Musono nanuchiza sau lia mu Engitu.” Kashika chihela chacho akuchivuluka ndo musono ngwo, Ngilingali.
10 A-Izalele yanunga mu chilombo ku Ngilingali. Ha chingoloshi cha tangwa 14 lia kakweji, yalinga chiwanyino cha Chizomboka mu chana cha Yeriku.
11 Muze Chizomboka te hichapalika, ayo yaputuka kulia kulia cha mu chifuchi ngwe, mbolo kuyishi futunwiso ni tiliku ya kwocha.
12 Muze ayo aputukile kulia kulia chimwe cha mu chifuchi, manaa yapatuka, A-Izalele te kechi kulia nawa manaa. Ha mwaka wacho, o yaputuka kulia mbuto ja mu chifuchi cha Kanana.
13 Muze Yoshua te ali hakamwihi ni Yeriku, yahetula meso jenyi, yamona umwe lunga unamana kulutwe lienyi kali ni katana ku kwoko. Yoshua yamukundama, yamuhula ngwenyi: “Shina uli sali lietu nyi uli sali lia akwa-kole jetu?”
14 Iye yakumbulula ngwenyi: “Yami nguli hano ngwe kapitau wa tujita ja Yehova.” Mba Yoshua yafulamana hashi ni kwamba ngwenyi: “Yika mwene wami unazange kulweza yami kavumbi ke?”
15 Kapitau wa tujita ja Yehova yalweza Yoshua ngwenyi: “Zula sapato mumu ha chihela haze unaliate hali hasandu.” Hazehene, Yoshua yazula sapato.
Footnotes
^ Chize Alisonekene, “upwise
