Yoshua 7:1-26
7 Alioze, A-Izalele yavulumuna kuli Zambi ha kwanda yuma yize te atamba kunongesa. Akane, mwana wa Kame, mwana wa Zapati, mwana wa Zera, wa ku munyachi wa Yunda kanjile yuma yize te atamba kunongesa. Hamukunda wa chino, ufwatulo wa Yehova yiwiza hali A-Izalele.
2 Yoshua yatuma malunga kukatuka ku Yeriku hanga aye ku mbonge ya Ayi, yize yatwama hakamwihi ni Mbete-Avene ni ku chivumbuko cha Mbetele, yaalweza ngwenyi: “Yeenu nukendese chifuchi.” Mba malunga yaya, yendesa chifuchi cha Ayi.
3 Muze ayo ahilukile kuli Yoshua yamulweza ngwo: “Kanda utumako malunga eswe. Malunga 2,000 hanji 3,000 mahasa kukumba Ayi. Kanda uhongesa atu eswe ha kwatumako, mumu mu Ayi muli atu akehe.”
4 Chocho, Yoshua yatumako malunga 3,000, alioze, ayo yachina malunga a ku Ayi.
5 Malunga a ku Ayi, yashiha malunga 36 A-Izalele, akwo yaahanga chize haze lia chikolo ndo ku Shebarimi ni kwashiha ha kupalumuka. Kashika atu yevwa woma unji, mbunge jo yijisangunuka, yijipwa ngwe meya.
6 Yoshua yasuwa mazalo jenyi, yafulamana kulutwe lia Mushete wa Yehova ndo ha ufuku iye ni makulwana a mu Izalele. Chikwo nawa, ayo yalihinjila mavu ha mitwe.
7 Yoshua yamba ngwenyi: “Lwangu mama yami, Yehova Zambi, mumu liaka wazawisa atu wano Yordau? Shina wachilinga wahane kuli A-Amore hanga aanongese? Kachi chapemene chinji nyi twanungine kwetu mu sali lia Yordau!
8 Ngukonekene Yehova, yika munguhasa kwamba haliapwila se A-Izalele hachina akwa-kole jo?
9 Muze A-Kanana ni atu eswe atwama mu chifuchi chino manyingika lusango yono, ayo matujingilika ni kujimuna jina lietu hashi, mba yika mulinga hakutwala ku jina lie linene?”
10 Yehova yakumbulula Yoshua ngwenyi: “Katuka! Mumu liaka unafulamana?
11 A-Izalele kavulumuna, kafungile usendo wami, kanda yuma yize te atamba kunongesa ni kuyisweka mukachi ka yikumba yo.
12 Kashika, A-Izalele kechi kahasa kukumba akwa-kole jo. Makachina akwa-kole jo mumu halikunjika ku unongeso. Chichi kanukwasa nawa ndo muze munuchiza mukachi kenu chuma chize nwatamba kunongesa.
13 Katuka, pwisa atu asandu! Alweze ngwe: ‘Hamene lipwisenu asandu, chocho anambe Yehova Zambi ya Izalele ngwenyi: “Mukachi kenu, muli chuma chize nwatamba kunongesa, yenu A-Izalele. Kunuchi kuhasa kukumba akwa-kole jenu ndo muze munuchiza mukachi kenu chuma chize nwatamba kunongesa.
14 Katamba kulisolola chimene munyachi ni munyachi. Munyachi uze Yehova masakula muukundama, usoko ni usoko. Usoko uze Yehova masakula muukundama, zuwo ni zuwo ni akwa-zuwo waze Yehova masakula makundama, lunga ni lunga.
15 Yoze mawana ni chuma chize te atamba kunongesa katamba kumwocha, iye ni yikumba yenyi yeswe mumu kafungile usendo wa Yehova, kalinga chuma cha sonyi mu Izalele.”’”
16 Mukwachako, Yoshua yahinduka chimene, yalweza A-Izalele hanga alisolole munyachi ni munyachi, chocho munyachi wa A-Yunda yausakula.
17 Yalweza asoko ja A-Yunda hanga alisolole, mba usoko wa A-Zera yausakula. Yalweza usoko wa A-Zera hanga ulisolole, lunga ni lunga. Zapati yamusakula.
18 Kusulaho, yalweza akwa-zuwo lia Zapati hanga alisolole, lunga ni lunga. Akane mwana wa Kame, mwana wa Zapati, mwana wa Zera, wa ku munyachi wa A-Yunda, yamusakula.
19 Yoshua yamba kuli Akane ngwenyi: “Lisesa mwanami, halisa Yehova, Zambi ya Izalele, mulweze yize walinga. Lisesa, ngulweze yize walinga. Kanda unguswekela chuma nichimwe.”
20 Akane yakumbulula Yoshua ngwenyi: “Yami mwe navulumuna kuli Yehova, Zambi ya Izalele, chuma nalinganga chili chino:
21 Muze namonanga hakachi ka yikwata ya kupupa, chikuto chipema chinji, 200 ja shekele ja prata ni chipinji cha oru cha 50 a shekele, yinguyizanga mba yinguyanda. Yuma yacho yili ya kusweka mu mbalaka yami, yili ya kuvumbika, mbongo jili kwishi.”
22 Hazehene Yoshua yatumako tunganda, yanjila mu mbalaka, mba yawana chikuto chipema cha kusweka hamuwika ni mbongo jize te jili kwishi.
23 Chocho yanda yuma yeswe yize yapwile mu mbalaka, yayitwala kuli Yoshua ni kuli A-Izalele eswe, yayitumbika kumeso ja Yehova.
24 Hachino, Yoshua ni A-Izalele eswe yakwata Akane mwana wa Zera, hamuwika ni prata, chikuto chipema, chipinji cha oru, ana jenyi a malunga ni a mapwo, ngombe jenyi, yimbulu jenyi, mapanga jenyi, mbalaka yenyi ni yikumba yenyi yeswe, yayitwala ku chikulo cha Akore.
25 Yoshua yamba ngwenyi: “Mumu liaka watunehena lamba lipwahaha? Musono Yehova makulamba.” Chocho, A-Izalele eswe yamwasa mawe, yamwocha hamwe ni asoko jenyi ni yikumba yenyi yeswe. Hachino, ayo eswe yaasa mawe.
26 Yalumbika mulumba wa mawe hali iye, mulamba wacho wa mawe uchiliko ndo musono. Hachino, ufwatulo wa Yehova yiutepuluka. Kashika chihela chacho akuchisanyika ngwo, chikulo cha Akore ndo musono.
