Yoshua 9:1-27
9 Muze sango ja kukumba jahetele kuli mianangana eswe a ku chivumbuko cha Yordau, waze te atwama mu chifuchi cha milundu ni mu yana ku sesa lia Kalunga-Lwiji Munene, kulutwe lia Lebano, A-Hete, A-Amore, A-Kanana, A-Perize, A-Hevwe, ni A-Yepushe,
2 yalikungulula hanga ase jita ni Yoshua ni A-Izalele.
3 A-Ngibeone no yevwa hakutwala ku yize Yoshua alingile ni mbonge ya Yeriku ni Ayi.
4 Chocho, ayo yalilulieka, yasa kulia mu njeke jikulu yajinangika helu lia yimbulu ni tuku ja vinyu ja tuwika ja kunukanuka.
5 Yazala sapato jize te hijasula ja kunukanuka, yazala nawa yipuzu ya mahina. Mbolo jize ambachile te hijoma chau, jinalipalwokela.
6 Ayo yaya kuli Yoshua mu chilombo ku Ngilingali, yalweza Yoshua ni malunga A-Izalele ngwo: “Kusuku tunakatuka, chifuchi chetu chatwama kusuku chinji. Haliapwila lingenu kama usendo ni yetu.”
7 Alioze, malunga A-Izalele yalweza A-Hevwe ngwo: “Yenu kota hakamwihi nwatwama, mba mumu liaka mutulinga usendo ni yenu?”
8 Ayo yakumbulula Yoshua ngwo: “Yetu tuli tuvumbi je.”
Yoshua yaahula ngwenyi: “Yenu aya, kulihi nunakatuka?”
9 Ayo yamukumbulula ngwo: “Tuvumbi je kakatuka kusuku chinji mumu lia jina lia Yehova Zambi ye, mumu twevwile hakutwala ku lufuma wenyi ni yize alingile mu Engitu.
10 Twevwile yeswe yize alingile kuli mianangana aali A-Amore mu sali lia Yordau, kuli Sahone Mwanangana wa Heshe-Bone ni kuli Oge Mwanangana wa Mbashane yoze te watwama mu Asatarote.
11 Kashika makulwana jetu ni atu eswe a mu chifuchi chetu atulwezele ngwo: ‘Liluliekenu hanga nuye nukaliwane no. Alwezenu ngwenu: “Kumutupwa tuvumbi jenu, kashika lingenu usendo ni yetu.”’
12 Mbolo jino tweza najo muze twakatukile ku chifuchi chetu te jichili ja kahia. Haliapwila ngwe chize nunamona hijoma chau, jinalipalwokela.
13 Tuku jino ja vinyu muze twajizalishile te jichili jaha, haliapwila hijatuwika. Mahina jetu hapwa yipuzu ni sapato jetu nejo hijasula mumu lia wenyi usuku.”
14 Malunga A-Izalele yanda kulia chacho hanga achitale, alioze kakahulile Yehova hakutwala ku chikuma chacho.
15 Chocho, Yoshua yalinga no usendo hanga achine kwashiha, ni akwa-lutwe a chikungulwila yatayiza usendo wacho ni shingo.
16 Ha kupalika cha matangwa atatu, chize ha tangwa lize A-Izalele alingile no usendo, ayo yanyingika ngwo, kumana A-Ngibeone te katwama hakamwihi ni ayo.
17 A-Izalele yakatuka yaya mu mambonge jo, yahetamo ha tangwa liamuchitatu. Mbonge jo japwile Ngibeone, Chefira, Mberote ni Kiriate-Yerimi.
18 Alioze, A-Izalele kakashihile malunga jacho, mumu akwa-lutwe a chikungulwila kalishingile kupalikila mu jina lia Yehova, Zambi ya Izalele. Mumu lia chino, atu yaputuka kulinyenyeta hakutwala kuli akwa-lutwe.
19 Akwa-lutwe yalweza chikungulwila cheswe cha Izalele ngwo: “Amu hitwalishinga mu jina lia Yehova, Zambi ya Izalele, kutwatambile kwashiha.
20 Kashika, tulingenu chino: Kanda twashiha, mumu nyi mutwashiha, Zambi matumwesa lamba mumu lia usendo uze tunakalinga no.”
21 Akwa-lutwe yamba nawa ngwo: “Twechenu ni mwono hanga apwe akwa-kuchaha kunyi ni kutahila A-Izalele eswe meya.” Yino ye akwa-lutwe alakenyene.
22 Chocho Yoshua yasanyika malunga jacho ni kwahula ngwenyi: “Mumu liaka nunakatwonga ha kwamba ngwenu: ‘Kusuku tunakatuka,’ kumana nwatwama hakamwihi ni yetu?
23 Chize musono, kunwashingiwa, kumunukapwa ndungo ku miaka yeswe, ni kulinga mulimo wa kuchaha kunyi ni kutaha meya a ku zuwo lia Zambi yami.”
24 Ayo yamba kuli Yoshua ngwo: “Twalinganga chino mumu twevwile ngwo, Yehova Zambi ye, katumine Mose kavumbi kenyi hanga anwehe yifuchi yino yeswe ni kushiha atu jamo eswe. Te tunevu woma ngwetu munutushiha, kashika twalinga chino hanga tulamwine mwono wetu.
25 Haliapwila tuli mu moko je, linga ni yetu cheswacho chize mumona ngwe chinalite.”
26 Yino ye Yoshua alingile hakutwala kuli ayo: Yaapulwila ku moko ja A-Izalele hanga achine kwashiha.
27 Ha tangwa liacho, Yoshua yaapwisa akwa-kuchaha kunyi ni kutaha meya a mu chikungulwila ni a ku chilumbilo cha Yehova ku chihela kuze iye te masakula. Ayo machinunga ni kuchilinga ndo musono.
