Mukanda wa Yundase 1:1-25
1 Yami Yundase, ndungo wa Yesu Kristu, alioze ndumbu ya Tiangu, ngunasonekena yenu waze hanatambika, waze Zambi Tata akuzanga, waze nawa anatulikila Yesu Kristu:
2 Keke, sambukila ni zango yilumbame kuli yenu.
3 Akwetu a zango, chipwe ngwe nasa tachi ngunusonekene hakutwala ku ulamwino uze yetu eswe tuli nawo, alioze namona ngwami, chili chipema kunusonekena hanga ngunutakamise, nuhase kwasa jita yikalu mumu lia ufulielo uze ahanyine kuli asandu kamuwika kunahu.
4 Chikuma ngunanusonekena chili ngwo, amwe atu api hanjila ni kuliomba hakachi kenu, waze Yisoneko yaliangile kulu kusolola usopeso uno. Kali atu api, kakwalumuna chawana cha keke ya Zambi chipwe ngwe jila* yakulingilamo yitanga ya sonyi, kakuhanjika yuma yipi hali mwata wetu umuwika kanda Mwene wetu Yesu Kristu.
5 Chipwe ngwe nunanyingika kanawa yuma yino yeswe, ngunazange kunwiwulula ngwami, Yehova* kanakalamwina atu mu chifuchi cha Engitu, alioze kulutwe yanongesa waze kakasolwele ufulielo.
6 Ni angelo waze kakafungile milimo yo yize Zambi aahele mwilu, alioze yahichika yihela yo yipema, iye hanaakase mu malenge ku miaka yeswe mu milima yinji hanga akaasopese ha tangwa linene.
7 Che chimuwika nawa ni atu a mu Sondome ni Ngomora, ni yihunda yikwo yize te yasulanga nayo, waze alihanyine chinji ku utanji ni kukaula usolo weswe upi wa musunya; ayo kali utowezo kuli yetu, mumu lia upatwilo uze atambwile wa kahia ka mutolo.
8 Chipwe chocho, atu wano kakunyonga yuma yipi mashimbu eswe, kakupihisa mijimba ni yitanga yipi, kakulelesa wata ni kuhanjika yuma yipi hali atu waze Zambi akulemesa.
9 Alioze, muze Mikele mungelo wa lutwe, alimikine ni kulitachika ni Ndiapu mumu lia mujimba wa Mose, kakanyongene ngwenyi iye kali ni ulite wa kumusopesa, alioze yamba ngwenyi: “Yehova* akusopese.”
10 Kwamba pundu, atu wano kakuhanjika upi ha yuma yize kanyingikine. Kashika, yuma yeswe yize akulinga ngwe tushitu waze keshi kunyonga, ye yakwanongesa.
11 Lamba lio, mumu hakaula jila ya Kene, ni chilweza chipi cha Mbalau mumu lia fweto, hanalinehena ene unongeso ha kukaula maliji a pami a Kora!
12 Atu wano anali ni yenu ha yiwanyino yenu ya zango yize nwakulinga, kali ngwe mawe anaswama kushi lia meya, kali tufunga waze akulilisa ene chakuhona woma; malelwa waze keshi meya akuhungumuna kuli fuji sali ni sali; kali mitondo ya lushiho yize kuyishi kwima mihuko chipwe ngwe hiyaheta ha mashimbu a kwima mihuko, hiyinafu kaali, hanayitukula ni miji yawo;
13 kali ngwe mikanya yipi ya kalunga-lwiji, yize yakutuhwisa fulufulu ya sonyi jo; kali ngwe tutongonoshi waze hanatoko jila, hanaatulikila milima yinji ya mutolo.
14 Enoke mutu wamuchishimbiali chize kuli Alama, neye kaprofetezele hakutwala kuli ayo muze ambile ngwenyi: “Talenu! Yehova* heza ni mbunga* yinene ya asandu jenyi,
15 hanga asopese atu eswe, ni kuhisa yingulungulu eswe, ha yitanga yo yipi yize alingile ni ha yuma yeswe yipi yize atu api ambile ya kulimika ni Zambi.”
16 Atu wano kali akwa-kulinyenyeta, keshi kuwahilila ni yuma yize ali nayo, kakukaula usolo wo, kakuhanjika maliji a kulisuta, aku machichimieka akwo hanga azukeko yimwe.
17 Hakutwala kuli yenu, akwetu a zango, iwulukenu maliji waze nwevwile kunyima kuli apostolo ja Mwene wetu Yesu Kristu,
18 muze ambile kuli yenu ngwo: “Ha matangwa akusula, akwa-kukekuna anji makasoloka, makalinga yuma kulita ni usolo wo upi.”
19 Atu jacho e akuhandununa akwo, kakulinga yuma ngwe atu a musunya,* hi ngwe atu ko a ku spiritu.
20 Alioze yenu, akwetu a zango, litakamisenu mu ufulielo wenu usandu, lembenu ni ukwaso wa spiritu yisandu,
21 hanga nununge mu zango lia Zambi, muze nunashimbwila keke ya Mwene Yesu Kristu ni mwono wa mutolo.
22 Chikwo nawa, nungenu ni kuvwila keke waze akuyambashana;
23 alamwinenu ha kwachangumuna mu kahia. Akwo, nungenu ni kwevwila keke, alioze nwatamba kukeya ha kuchilinga, ni kuvwila lwaji chipwe mazalo waze anapiha ni yitanga* yo yipi.
24 Yoze uli ni uhashi wa kunufunga hanga nuhone kutalinga, ni kunumanyisa nguu, chakuhona kapalia, kulutwe lia uhenya wenyi, ni chiseke chinji,
25 kuli Zambi umuwika Chilamwina chetu, kupalikila muli Yesu Kristu, Mwene wetu; uhenya, unene, ndundo, wata, yikapwe kuli iye chize ku miaka ya mutolo ndo miaka yeswe ya mutolo. Amene.
Footnotes
^ Hanji “kaliongelo.”
^ Tala Apendice A5.
^ Tala Apendice A5.
^ Tala Apendice A5.
^ Hanji “yihuji yinji.”
^ Chize Alisonekene, “ngwe tushitu.”
^ Hanji “yitanga ya musunya.”
