SHINA mutu mahasa kununga ni kushishika kuli Yehova nyi mamweseka ndo haze masulila tachi jenyi nawa keshi kuzuka nichimwe ha kushishika? Chihula chino kachilingile ni kuchikumbulula hali umwe lunga avuluka ngwo Yombi.

Muze A-Izalele apwile mu Engitu, Yombi umwe usoko wa Apalahama, yoze watwamine mu chifuchi chize musono anavuluka ngwo Arabia. Tangwa limwe, angelo kalikungulwile kumeso ja Zambi, Satana mwe chihulia kapwile mu kachi ko. Ha kukunguluka chacho cha mu malilu, Yehova kambile yimwe yize yasolwele ngwo kakujikijila hali kavumbi kenyi washishika Yombi. Kwamba umwenemwene, Yehova kambile ngwenyi, kuheshi niumwe hashi washishika ngwe Yombi. Alioze, Satana kambile ngwo Yombi kapwile ni kushishika mumu Yehova kamuwayishile ni kumufunga. Satana kambile nawa ngwenyi, nyi te mamuchiza yeswe yize apwile nayo, Yombi te matuka Zambi.

Zambi kechele hanga Satana achize yikumba, kushiha ana ja Yombi ni kumuyijisa. Chakuhona kunyingika ngwo Satana mwe unamumwesa lamba, Yombi te kanyingikine mumu liaka Zambi atayijile hanga iye apalike mu yeseko yacho. Chipwe chocho, iye kakalimikine ni Zambi.

Masepa atatu a mahuza yaya ni kumeneka Yombi. Ha yuma yinji yize ayo ambile yili mu mukanda wa Yombi, malunga wano kesekele kwonga Yombi ha kwamba ngwo, Zambi kanamwesa Yombi lamba mumu lia shili yize iye alingile mu usweke. Ayo kambile nawa ngwo, Zambi keshi kuwahilila ni tuvumbi twenyi ashishika nawa keshi kwajikijila. Yombi kehukile manyonga jacho api. Ni hamu, iye kambile ngwenyi te mashishika kuli Zambi ndo ha kufwa chenyi!

Alioze, Yombi kalingile chipi ha kweseka kulikalila ku meso ja masepa jenyi. Mukweze Elihu yoze wevwile yeswe yize ayo ambile yaputuka kuhanjika. Elihu kasolwele kuli Yombi ngwenyi, chuma chilemu chili kukalila ulite wa kuyula cha Yehova Zambi kuhiana kulikalila cha mutu mweswawo. Chikwo nawa, kambile kuli masepa a mahuza a Yombi ngwenyi o kapwile ni manyonga api.

Kulutwe, Yehova yahanjika ni Yombi ni kumukwasa kwalumuna manyonga jenyi. Ha kuzachisa chilweza cha upeme ya yitangiwa, Yehova kasolwele kuli Yombi chize atu ali akepe ha kwatesa ni Zambi. Yombi yalikehesa ni kutayiza fumbo lia Zambi. Amu Yehova “iye wa too ni vumbi ni keke” yawuka Yombi ha musongo wenyi, kumwaha yikumba kuhiana yize apwile nayo ni kumuwahisa ni ana kumi. (Tiangu 5:11) Ha kununga ni kushishika kuli Yehova chipwe ngwe kapalikile mu yeseko, ushishiko wa Yombi wasolwele ngwo Satana kali mukwa mahuza muze ambile ngwenyi atu keshi kunuka ni kushishika kuli Zambi ni mapalika mu yeseko.

Lusango kanakatuka ha mukanda wa Yombi.