Longeso 22

Ku Yishina Yikehe-Yikehe Yika Akulinga ko?

Asoko a ku betele kakukalakala mu yipatulo yeka ni yeka, hanga akwase milimo ya kwambujola sango jipema mu chifuchi chimuwika hanji yinji. Ayo kakukalakala mu yizavu ya akwa kulumbununa, akwo akwa kufambwisa ni kulinga mikanda, akwo akwa kutetela mikanda, akwo akwa kulinga yizulie, hanji kufunga yuma yikwo mu chifuchi.

Chizavu cha usongwelo wa milimo ku chishina chikehe. Chizavu cha Tusongwelo cha kukalakala ni yishina yikehe-yikehe muze muli Yizavu ya Usongwelo (Comissão de Filial) ya makulwana ajama, kakupwa atatu hanji kuhianyisa. Yizavu ya usongwelo yakulweza kuli Chizavu cha Tusongwelo chize milimo yo yinende hanji ni yikwiko ize muyihasa kusoloka mu yifuchi ize ayo anakalakala. Sango jacho, ja kukwasa Chizavu cha Tusongwelo hanga ahase kutesa yikuma ize mahasa kutuhwisa mu mikanda, ni mu Yikungululo hanji mu Yikungululo Yinene-Yinene. Chizavu cha Tusongwelo chakutuma waze anavuluka ngwo tulayi ja yifuchi (zonal) hanga aye ha mashimbu eswe ameneke yishina yikehe-yikehe, ni kukwasa Yizavu ya Usongwelo chize mahasa kusongwela milimo yo. (Yishima 11:14) Kwakupwa nawa chimwe chilulikiso chipema cha malongeso akutakamisa no waze atwama mu chishina chikehe, ha kwiza cha kalayi wa yifuchi.

Ukwaso akuhana ku yikungulwila. Mandumbu waze ali ni yiteli ku chishina chikehe kakutayiza kupwa cha yikungulwila yaha, nawa kakuhana shimbi yakusakula nayo waze mapwa makulwana ni tuvumbi. Mandumbu nawa kakusongwela milimo ya tetekeli, mishionaliu, ni tulayi akumeneka waze akulingila mu chifuchi chize muli chishina chikehe. Ayo kakululieka yikungululo yinene-yinene, ni kusongwela kutunga cha ma Zuwo a Wanangana, nawa ni kunyingika ngwo mikanda yinaheta mu yikungulwila hanga yaakwase ku ize anafupu. Yuma yeswe akulinga ku yishina yikehe yakukwasa kukumbanyisa milimo ya Sango Jipema hanga yende nikulita ni ululikiso.​—1 A-Korindu 14:​33, 40.

▪ Kuchi Yizavu ya Usongwelo a yishina yikehe yakukwasa Chizavu cha Tusongwelo?

▪ Yiteli yika yishina yikehe-yikehe yilinayo?

[Kasha/​Chizulie ha lifwo 25]

NINGIKA NAWA

Twakutambula kanawa ngeji waze akwiza ni kumeneka yishina yetu yikehe-yikehe matangwa eswe, chize Liakasoka ndo Liamatano. Tunakulakenya hanga wize. Muze mwiza ni kumeneka chatamba kuzala ngwe chize wakuzala hakuya mu ukungululo. Yena mukayuka chinji mu ufulielo we ha kutala chihela chize anavuluka ngwo Betele.

[Chizulie ha lifwo 25]

Ilhas Salomão

[Chizulie ha lifwo 25]

Canadá

[Chizulie ha lifwo 25]

Africa do Sul