Longeso 24

Kuchi Mulimo Wetu wa Hashi Heswe Anaukwasa?

Ululikiso wetu wa kufambwisa ni kuhana kama ja tununu a Mbimbiliya, ni mikanda yikwo yaha ha miaka yeswe. Twakutunga ni kufunga Mazuwo a Wanangana ni yishina yikehe-yikehe. Twakukwasa tununu ja Betelita, ni Mamishionaliu, nawa twakuhana ukwaso ha matangwa a luyinda. Hanji yena mukomoka ngwe ‘Kulihi mbongo jineza mba alinge yuma yeswe ai?’

Yetwe tushi kwita mbongo, hanji kutesa ndando. Chipwe ngwe milimo yetu ya Sango Jipema yakuhwisa upite unji, alioze yetwe tushi kwita mbongo. Chize ku sekulu ya kunyima mukanda wa A Sentinela unakamba ngwo yetu twakufuliela kuli Yehova ngwe chikwashi chetu, nawa yetwe “tuchikeza kwita ukwaso kuli mutu niumwe”​—tuchi keza kachilinga!​—Mateu 10:⁠8.

Milimo yetu kakuyikwasa ni milambu. Atu anji kakuzanga milimo yetu ya longeso lia Mbimbiliya, kashika ayo akuhana milambu hanga milimo yacho yisenye kulutwe. Yela ja Yehova ayo ene kakuwahilila chinji ha kusa mashimbu, ni tachi, ni upite wo, ni yuma yikwo hanga alinge upale wa Zambi hano hashi. (1 Sango ja Mianangana 29:⁠9) Mu Zuwo lia Wanangana muli mishete ize akusa milambu kuli eswe waze anazange kulambula. Chihanda cha mbongo jikwo Jakwiza kuli atu a mbunge yipema, ngwe umwe twamishi chiswale yoze Yesu anakamba ngwo, walambwile tumbongo tukepe twaali mu mushete wa mu tembele. (Luka 21:​1-4) Kashika mweswao mahasa “kutumbika chimwe chihanda chinalita” hanga alambule “nikulita ni chize hanapale mu mbunge yenyi.”​—1 A-Korindu 16:2; 2 A-Korindu 9:⁠7.

Yetwe tunatayiza ngwo Yehova manunga ni kuwahisa mbunge ja waze anazange ‘kumulemesa ni yikumba yo yilemu’ hanga akwase milimo ya sango jipema ja Wanangana, mba upale wenyi umanunuke.​—Yishima 3:⁠9.

▪ Mumu liaka ululikiso wetu unalituchika ni mangeleja?

▪ Milambu ya mbunge yipema yika akulinga nayo?

[Kasha ha lifwo 27]

MBONGO KULIHI JAKUYA?

Milambu ya Chikungulwila Chetu yili yakulikwasa nayo mu chikungulwila ha ize anahono, nawa kakutuma yikwo ku chishina chikehe hanga akwase kutunga hanji kululieka Zuwo lia Wanangana. Milambu ya Milimo ya Hashi Heswe kakuyituma ku chishina chikehe hanga akwase nayo ha ize yinahono mu chishina, nawa milambu yize yakusalaho kakukwasa nayo yifuchi yikwo ha ize anahono.

[Chizulie ha lifwo 27]

Nepal

[Chizulie ha lifwo 27]

Togo

[Chizulie ha lifwo 27]

Grã-Bretanha