Longeso 5

Kuchi Yikungululo Yetu Muyikukwasa?

Atu anji kanalitwamina kuya ku ma ingeleja mumu kasokuwanamo ukwaso ni ufulielo upema. Mba mumu liaka yena chatamba kuya ku yikungululo ize analulieka kuli yela ja Yehova? Yika mukawanamo?

Chiseke hakupwa mukachi ka atu akulifunga ni zango. Ha sekulu yitangu, Akwa Kristu te kakwete yikungulwila, ayo nawa te kakulikungulula hanga awayile Zambi, ni kulilongesa Yisoneko, ni kulikwasa umwe ni mukwo. (A-Hepreu 10:24, 25) Ayo te kakulitambula ni zango ni kwivwa ngwo tuli mukachi ka masepa a umwenemwene- e mandumbu a mu ufulielo. (2  A-Tesalonika 1:3; 3  Yoano 14) Ni yetwe tunakaula chizechene ngwe ayo te apwile ni kulinga, chiseke chize te apwile ni kwivwa ni yetwe che twakwivwa.

Kuyuka ha kulilongesa ni kukaula shimbi ja mu Mbimbiliya. Ngwe ku mashimbu ashakulu, ni musono atata, ni amama, ni twanuke eswe kakupwa hamuwika. Alongeshi ajama kakulongesa shimbi ja mu Mbimbiliya hanga tuhase kujikaula ku mwono wetu ha tangwa ni tangwa. (Shimbi Yamuchali 31:12; Nehemia 8:8) Eswe mahasa kukumbulula mu longeso, ni kwimba miaso, hanga tusolole kutalatala chetu cha mwono wa mutolo.​—A-Hepreu 10:23.

Yiwape yakwiza ha kukolesa ufulielo we kuli Zambi. Postolo Paulu yamba ha chimwe chikungulwila cha ha matangwa jenyi, ngwenyi, “Mumu usona ngunevu kunumona, . . . hanga nukajikize; Ngwami, Hanga tukaliwahise hamuwika, mweswe ku ufulielo wa mukwo; ufulielo wa yenu ni wa yami.” (A-Roma 1:11, 12) Kulikata ni mandumbu jetu mu yikungululo ha mashimbu eswe cha kukolesa ufulielo wetu, hanga tupwe ni tachi ja kwenda mu jila ya Kristu.

Yika unachina kutayiza chilakenyo chakwiza ku ukungululo wetu hanga umone yena mwene? Nyi weza mutukutambula kanawa. Kunjila mu ukungululo chili chawana​-tushi kwitamo mbongo.

▪ Aya tunakaula ha kulikungulula chetu mu chikungulwila?

▪ Kuchi mutuyuka ni twatayiza kulikungulula ni Yela ja Yehova?

[Kasha/​Chizulie ha lifwo 8]

NINGIKA NAWA

Nyi unazange kunyingika Zuwo lia Wanangana hanga ulikungulule ni yetwe, hula umwe chela wa Yehova hanga akutwaleko.

[Chizulie ha lifwo 8]

Argentina

[Chizulie ha lifwo 8]

Serra Leoa

[Chizulie ha lifwo 8]

Bélgica

[Chizulie ha lifwo 8]

Malásia