Longeso 2

Mumu Liaka Akutuvuluka Ngwo Yela ja Yehova?

Atu anji akunyonga ngwe Yela ja Yehova lili jina lia ingeleja yaha. Alioze, ha kupalika cha miaka ya 2.700, tuvumbi a Zambi umuwika wamwenemwene, te kakwavuluka ngwo, “Yela” jenyi. (Izaia 43:10-12) Chize ha mwaka wa 1931, yetwe te kanatunyingika ni jina lia Akwa kulilongesa Mbimbiliya. Mumu liaka tuli ni jina Yela ja Yehova?

Ali jina lie linatunyingikisa Zambi yetu. Nyi twatala mu yisoneko yitangu, jina lia Zambi, Yehova, linasolokamo mu wunji wa tununu a tununu mu Mbimbiliya. Mu Mbimbiliya jinji jina liacho hanalichizamo hanasalakanyisamo jina lieka, ngwe Mwene hanji Zambi. Alioze Zambi wamwenemwene kanakalisolola iye mwene kuli Mose, ni jina lia Yehova, ngwenyi: “Lino lie jina liami ndo ku miaka ya mutolo.” (Kutuhuka 3:15) Jina lino, lie linamuhandununa ni tuzambi akwo amahuza. Yetwe tunawahilila chinji kupwa ni jina lisandu lia Zambi.

Jina lino lie linalumbununa milimo yetu. Ku mashimbu a shakulu, yimwe mbunga ya atu chize kuli Abele mutu mukwa ululi, ayo kanakasolola ushindakenyo wa ufulielo wo kuli Yehova. Kulutwe lia matangwa yikwiza nawa Noe, ni Apalahama, ni Sara, ni Mose, ni Ndawichi, ni mbunga yikwo yinene “ya yela.” (A-Hepreu 11:4-12:1) Ngwe chize umwe mutu mahasa kupwa chela mu upatwilo hali mutu yoze keshi chitela, ni yetwe tunahamuka ni kunyingikisa umwenemwene wa Zambi yetu.

Yetwe tunembulula Yesu. Mbimbiliya yinamuvuluka ngwo “chela wamwenemwene keshi mahuza.” (Usolwelo 3:14) Yesu kanakamba ngwenyi, ‘nakusolola jina lia Zambi’ ni ‘kushindakenya ha umwenemwene’ wa Zambi. (Yoano 17:26; 18:37) Tumbaji aumwenemwene a Kristu noo ndo chaatamba kwambujola jina lia Yehova ni kulisolola kuli atu. Yenayo Yela ja Yehova analinga tangwa ha tangwa.

▪ Mumu liaka akwa kulilongesa Mbimbiliya anaavuluka ngwo Yela ja Yehova?

▪ Ha mashimbu aka Yehova anakaputuka kupwa ni yela hano hashi?

▪ Chela munene wa Yehova iya?

[Kasha/​Chizulie ha lifwo 5]

NINGIKA NAWA

Nyi walitakana ni amwe yela waze ali hakamwihi ni chikungulwila chetu, ameneke hanga wanyingike kanawa. Ahule ngwo: “Mumu liaka yenwe nunapu yela ja Yehova?”

[Chizulie ha lifwo 5]

Noe

[Chizulie ha lifwo 5]

Apalahama ni Sara

[Chizulie ha lifwo 5]

Mose

[Chizulie ha lifwo 5]

Yesu Kristu