Longeso 13

Tetekeli Iya?

Jina “tetekeli” (pioneiro) linalumbunuka ngwe, yoze wakukilikita mu ngiza ya yihela yaha, ni kutomba jila hanga akwo akaule. Yesu neye te tetekeli, kanakamutuma hano hashi hanga akavumbike akwo, nikuhana mwono wenyi hanga azulule jila ya ulamwino. (Mateu 20:28) Chipwe musono, tumbaji twenyi noo kakumwimbulula ha kupalikisa mashimbu anji hanga ‘apwise tumbaji’ aha. (Mateu 28:19, 20) Eswao anahasa kukilikita chocho, e tunavuluka ngwo tetekeli.

Tetekeli kali yoze wakwambujola sango jipema ha mashimbu eswe. Yela ja Yehova eswe kali akwa kwambujola sango jipema. Alioze, amwe kakululieka mwono wo hanga apwe tetekeli a mashimbu anji (pioneiro regular), ha milimo yo ya sango jipema kakuhana 70 a ola ha kakweji. Kashika akufupa milimo ize yishi kumbata mashimbu anji hanga ahase kulinga mulimo wo wa tetekeli. Akwo kakwasakula hanga atume ngwe tetekeli ahiana (pioneiro especial), mu mambonge muze munahono akwa kwambujola sango jipema ja wanangana, ayo kakuhana 130 hanji kuhianisa a ola ha kakweji mu milimo yo. Matetekeli kakuwahilila chinji ha mwono uze alinawo wa ululi, kakufuliela ngwo Yehova mahasa kwaha yuma yeswe ize ayo anahono ku mwono wo. (Mateu 6:31-33; 1 Timoteu 6:6-8) Waze keshi kuhasa kupwa matetekeli a mashimbu anji, mahasa kupwa matetekeli a mashimbu akehe (pioneiro auxiliar), nyi mahasa kuhana 30 hanji 50 a ola ha kakweji mu milimo ya kwambujola sango jipema.

Tetekeli zango lize alinalio kuli Zambi ni kuli atu lie liakumwaha tachi. Chizechene ngwe Yesu, ni yetwe tunakanyamisa yiswale mu spiritu hanga anyingike Zambi ni upale wenyi. (Marku 6:34) Kashika yetwe tuli ni yinyingi ize muyihasa kwakwasa, nawa ni kwaha chimwe kutalatala cha mwono wo wa miaka yeswe. Zango lia tetekeli kuli enyembo lie liakumukolweza hanga ahane ni mbunge yenyi yeswe, ni tachi ni mashimbu jenyi, hanga akwase akwo anyingike sango jipema. (Mateu 22:39; 1 A-Tesalonika 2:8) Yino ye yakukolesa ufulielo wa tetekeli, mba akundame kuli Zambi, ni kuwana uwahililo unji.​—Yilinga 20:35.

▪ Tetekeli iya?

▪ Yika yakuhana tachi kuli tetekeli wa mashimbu eswe?

[Kasha/​Chizulie ha lifwo 16]

SHIKOLA JIZE MATETEKELI MAHASA KULONGA

Matetekeli a mashimbu anji waze maatayiza, kakunjila mu Shikola ya Milimo ya Tetekeli, ize yakulinga pwoso jaali. Matetekeli waze ali twamishi nawa anajama mahasa kunjila ku Shikola ya Mbimbiliya ya Mandumbu a Twamishi, ya tukweji aali. Nawa mandumbu waze hanalimbata, nyi kanajama noo mahasa kunjila mu Shikola ya Mbimbiliya ya Akwa Kristu waze Hanalimbata. Ni ukwaso wa shikola jino, matetekeli mahasa ‘kumanununa uvumbiko wo.’​—2 Timoteu 4:⁠5.

[Chizulie ha lifwo 16]

Canadá

[Chizulie ha lifwo 16]

Zuwo ni zuwo

[Chizulie ha lifwo 16]

Longeso lia Mbimbiliya

[Chizulie ha lifwo 16]

Longeso lia wika lia Mbimbiliya