Longeso 17

Tulayi Akumeneka Yikungulwila Kuchi Akutukwasa?

Mu Yisoneko ya Akwa Kristu mu limi lia Ngregu yinavuluka chinji Mbarnabe ni postolo Paulu. Malunga jacho te tulayi akwa kumeneka yikungulwila. Mumu liaka? Ayo te kakunyonga ni zango lieswe hali mandumbu ni kutwama cho chipema mu ufulielo. Paulu yamba ngwenyi ngunazange hanga “tuhilukenu, tukameneke mandumbu” hanga tukatale chize ali. Iye te kakwenda kama ja tununu a (km) hanga aye ni kukolesa mandumbu. (Yilinga 15:​36) Tulayi akumeneka yikungulwila (superitendente viajante) musono noo che akulinga.

Ayo kakwiza hanga atutakamise mu ufulielo. Kalayi wa mbonge (circuito) kakumeneka 20 a yikungulwila hanji kuhianyisa, kakulinga pwoso yimuwika mu chikungulwila, ha mwaka kaali keswe. Kalayi wa mambonge (distrito) kakumeneka kumi lia mambonge hanji kuhianyisa, iye kakumeneka yikungulwila, nawa kakupwa kasongwelo mu ukungululo wa mbonge, kamuwika ha mwaka. Yetwe mutuhasa kuyuka ku yitanga ya mandumbu wano, nawa nyi hanambata mutuhasa kuyuka ku yitanga ya amama jo. Ayo kakusa tachi hanga anyingike akweze ni makulwana, nawa kakuzanga chinji kukalakala ni yetwe ha kwambujola sango jipema, ni kuya kuli malongi jetu a Mbimbiliya. Tulayi wano hamuwika ni makulwana a mu yikungulwila kakutufunga ni kutakamisa ufulielo wetu, ayo kakutukolesa mu ukungululo ni mu yikungululo yinene-yinene.​—Yilinga 15:35.

Ayo kakusolola zango kuli eswe. Tulayi akumeneka, kakunyonga chinji ufulielo wa yikungulwila. Ayo kakulikungulula ni makulwana ni tuvumbi a mu yikungulwila hanga atale kutatuka cha yikungulwila mba ehe yiyulo ize muyakwasa ku milimo yo. Ayo kakukwasa tetekeli chize malinga kanawa milimo yo ya sango jipema, nawa kakwivwa chiseke hakulichinga ni kunyingika mandumbu akwo, ni kwivwa kutatuka cho mu ufulielo. Mandumbu jacho kakulihana ayo ene ngwe ‘akwa milimo hali yetwe’. (2 A-Korindu 8:​23) Yetwe chatutamba kwimbulula ufulielo wo ni kulihana cho kuli Zambi.​—Hepreu 13:⁠7.

▪ Mumu liaka tulayi akumeneka yikungulwila?

▪ Kuchi twakuyuka muze ayo akumeneka chikungulwila?

[Kasha/​Chizulie ha lifwo 20]

NINGIKA NAWA

Soneka ha mukanda we tangwa lize kalayi wa mbonge meza ni kumeneka chikungulwila, nyi walinga chocho uchi kavulama ­tangwa lize makeza ni kulongesa mu Zuwo lia Wanangana. Yena nyi unazange ngwo iye hanji ­mukwo pwo eze ha longeso lie lia Mbimbiliya ha pwoso yacho, ­hanjika ni longeshi we.

[Chizulie ha lifwo 20]

Malawi

[Chizulie ha lifwo 20]

Chizavu cha milimo

[Chizulie ha lifwo 20]

Milimo ya sango jipema

[Chizulie ha lifwo 20]

Kulingungulula cha makulwana