Yena unamono amwe malunga ha chizulie?— Ayo kali Mateu, Marku, Luka, Yoano, Petulu, Tiangu, Yunda ni Paulu. Malunga wano kapwile ha mashimbu amuwika ni Yesu, nawa ayo kasonekene hakutwala kuli Yesu. Tulilongesenu hakutwala kuli ayo.

Atatu a kuli ayo te apostolo waze te akwambujola sango lipema hamwe ni Yesu. Yena unaanyingika eswe ni atatu?— Kali Mateu, Yoano ni Petulu. Apostolo Mateu ni Yoano kanyingikine kanawa Yesu, nawa eswe aali kasonekene  mikanda hakutwala ku mwono wa Yesu. Postolo Yoano kasonekene nawa mukanda wa Usolwelo ni mikanda yikwo yitatu yize anavuluka ngwo mukanda Utangu wa Yoano, Wamuchiali wa Yoano ni Wamuchitatu wa Yoano. Postolo Petulu kasonekene mikanda yiali yize yili mu Mbimbiliya. Mikanda yacho kakuyivuluka ngwo mukanda Utangu wa Petulu ni Wamuchiali wa Petulu. Ha mukanda wenyi wamuchiali, Petulu kasonekene hakutwala ku mashimbu waze Yehova ahanjikile mu malilu ni kwamba ngwo: ‘Yono kali mwanami. Yami nakumuzanga chinji nawa ngunawahilila hali iye.’

Malunga akwo waze ali ha chizulie chino kanatulongesa nawa hakutwala kuli Yesu mu mikanda yize ayo asonekene. Umwe wa kuli ayo kali Marku. Iye kota kapwile ha mashimbu waze akwachili Yesu nawa kamwene yuma yeswe yize yapwileko. Mukwo kali Luka. Iye te ndotolo nawa kota kapwile mukwa Kristu muze te Yesu hafwa kulu.

Malunga akwo aali asonekene mikanda ya mu Mbimbiliya waze unamono ha chizulie te ana-kwo ja Yesu. Yena unanyingika majina jo?— Majina jo kali Tiangu ni Yundase. Ha uputukilo ayo te keshi kufuliela Yesu. Nawa ayo te kakunyonga ngwo Yesu te kakwete mahesuhesu. Alioze hakupalika cha matangwa ayo yafuliela Yesu nawa yapwa akwa Kristu.

Mukwa kusoneka mikanda ya mu Mbimbiliya wakasula yoze unamono ha chizulie kali Paulu. Muze iye te kanda achipwa mukwa Kristu, te kakumuvuluka ngwo Saulu. Iye te kakuvwila akwa Kristu kole nawa te kakwaamwesa lamba. Yena unanyingika chize chapwile mba Paulu apwe mukwa Kristu?— Limwe tangwa, muze Paulu te anayi mu wenyi, susumuku yevwa umwe mutu mu malilu kanahanjika nenyi. Mutu wacho te Yesu! Iye yahula Paulu ngwenyi: ‘Mumu liaka yena unamwesa tumbaji twami lamba?’ Hakupalika cha yino yuma Paulu yalumuna yitanga yenyi nawa yapwa mukwa Kristu. Paulu kasonekene mikanda ya mu Mbimbiliya 14, chitangu yasonekena A-Roma mba hi A-Hepreu.

Shina twakutanga Mbimbiliya matangwa eswe nyi?— Nyi twatanga Mbimbiliya matangwa eswe, mutulilongesa Yuma yinji hakutwala kuli Yesu. Unazange kunyingika nawa hakutwala kuli Yesu?—