Tulilongesenu hakutwala kuli umwe mukweze yoze unakalamwina natu. Mukweze wacho te muhwa wa postolo Paulu. Yetwe tuso kunyingika jina lia mukweze wacho, alioze tunanyingika ngwo iye kalingile chimwe chuma cha hamu. Unazange kunyingika yize iye alingile?—

Paulu te kali mu zuwo lia ususu mu Yerusaleme. Kamukwachile ha mukunda wa kwambujola sango hakutwala kuli Yesu. Amwe malunga api waze te akuvwila Paulu kole, yalitesa hanga amulinge upi. Ayo yamba ngwo: ‘Twitenu kuli kapitau hanga maswalale jenyi anehe Paulu ku upatwilo. Mutukaswama mu jila muze Paulu mapalika, hanga tukamushehe!’

Muhwa wa Paulu yevwa hakutwala ku nyonga liacho lipi. Yika iye te malinga? Iye yaya ku zuwo lia ususu ni kulweza Paulu hakutwala ku upi wacho. Hazehene, Paulu yamulweza hanga atoweze kapitau wa maswalele hakutwala ku upi wa jacho. Shina te chashi kuli muhwa wa Paulu kuhanjika ni kapitau?— Ka, mumu kapitau te mwata mulemu chinji. Alioze muhwa wa Paulu yapwa ni hamu nawa yahanjika ni kapitau.

Kapitau yanyingika pundu yize te malinga. Iye yatuma 500 ja maswalele hanga afunge Paulu! Iye yaamba hanga atwale Paulu ku Sezarea ha ufuku uze wene. Shina Paulu kanakamulamwina?— Ewa, mumu malunga jacho api kakahashile kumukwata! Nyonga lio lipi liakamanunukine.

Yika yena muhasa kulilongesa ha sango jino?— Ni yena muhasa kupwa ni hamu ngwe muhwa wa Paulu. Yetwe chatutamba kupwa ni hamu muze mutwambujola sango ja Yehova kuli akwetu. Yena muupwa ni hamu nawa muununga ni kuhanjika hakutwala kuli Yehova?— Nyi walinga chocho, yena muuhasa kulamwina mwono wa atu.