Yika yena mulinga nyi wevwa woma?— Yena muhasa kufupa ukwaso kuli yisemi je. Alioze kuli nawa umwe mutu yoze mahasa kukukwasa. Iye kali ni ndundo jinji kuhiana ja mweswawo. Yena unanyingika mutu wacho?— Kali Yehova Zambi. Tuhanjikenu hakutwala kuli umwe mukweze yoze anavuluka mu Mbimbiliya ngwo Ndawichi. Iye te kananyingika ngwo Yehova mamukwasa, kashika kakevwile woma.

Muze Ndawichi te uchili kanuke, yisemi jenyi te kakumulongesa kuzanga Yehova. Longeso liacho liakwashile Ndawichi hanga achine kwivwa woma chipwe muze te malitakana ni yuma ya mwongo. Iye te kananyingika ngwo Yehova kali sepa lienyi nawa ngwo mamukwasa. Limwe tangwa, muze Ndawichi te anafunga mapanga, umwe ndumba munene yeza yakwata panga! Yena unanyingika yize Ndawichi alingile? Iye yahanga ndumba nawa yamushaha! Nawa muze umwe kangunga akwachile panga, neye yamushaha kuli Ndawichi! Ku nyonga lie iya te wakukwasa Ndawichi?— Ewa, te Yehova.

Limwe tangwa Ndawichi yasolola hamu linji. A-Izalele te kakwasa jita ni atu waze te akuvuluka ngwo A-Filistea. Umwe swalale Ka-Filistea te musuku chinji, nawa te chitakame! Jina lienyi te Ngoliate. Chitakame wacho te kakukekuna maswalale A-Izalele ni Yehova. Ngoliate te kakuhamwisa maswalale A-Izalele hanga eze ni kuliasa no jita. Alioze A-Izalele eswe te woma akwivwa wa kuliasa nenyi. Muze Ndawichi achivwile, iye yamba kuli Ngoliate ngwenyi: ‘Yami munguliasa ni yena! Yehova mangukwasa, nawa mungukukumba!’ Ku nyonga lie Ndawichi te hamu akwete?— Chochene, te hamu linji akwete. Yena unazange kunyingika yize nawa yapwileko?

Ndawichi yanda ndundu yenyi ni mawe akehe-akehe atano, hohene yaya ni kwasa jita ni Ngoliate. Muze Ngoliate hamona ngwo Ndawichi te kanuke, iye yaputuka nawa kukekuna Ndawichi! Alioze Ndawichi yamwamba ngwenyi: ‘Yena uneza kuli yami ni mukwale, alioze yami nguneza kuli yena mu jina lia Yehova!’ Hohene iye yasa liwe mu ndundu yenyi, nawa  yaliasa kuli Ngoliate. Liwe yililokola huma lia Ngoliate! Chitakame wacho yalimbuka, yafwa! A-Filistea eswe yaputuka kuchina. Kuchi mukweze Ndawichi ahashile kukumba Ngoliate?— Yehova wamukwashile, mumu Yehova kakwete ndundo jinji kuhiana chitakame wacho!

Yika yena muhasa kulilongesa ha sango ja Ndawichi?— Yehova kali mukwa ndundo jinji kuhiana mweswawo. Nawa iye kali Sepa lie. Kashika nyi ha mashimbu akwo mwivwa woma, ewuluka ngwo, Yehova mahasa kukukwasa hanga upwe ni hamu!