Samuele chize ha wanuke wenyi, te katwama ku tabernakulu nawa te kwe akalakala, tabernakulu te chihela kuze atu te akuya ni kuwayila Yehova. Yena unanyingika kuchi chapwile mba Samuele aye ni kutwama ku tabernakulu? Tulilongesenu chitangu hakutwala kuli Hana naye ya Samuele.

Ha mashimbu anji, Hana te keshi kushita alioze iye te kakuzanga kupwa ni mwana. Kashika iye yalemba kuli Yehova hanga amukwase. Iye yalakenya ngwo nyi mapwa ni umwe mwana, mamuhana hanga atwame ku tabernakulu ni kukalakalilako. Yehova yakumbulula kulemba chenyi, mba hi iye yashita umwe mwana. Iye yamuluka jina ngwo Samuele. Ngwe chizechene Hana alakenyene, muze Samuele akumbanyishine miaka yitatu hanji yiwana, iye yamutwala ku tabernakulu hanga alingile Zambi.

Eli te mwe sasendote wa lutwe ku tabernakulu. Ana jenyi aali noo te kwe akukalakala. Ewuluka ngwo tabernakulu te zuwo lia kuwayila Zambi, nawa atu waze te akutwamako te chaatamba kulinga yuma yipema. Alioze ana ja Eli te kakulinga yuma yipi. Samuele te kakumona yuma yize ayo te akulinga. Shina Samuele neye kalingile yuma yipi yize ana ja Eli te akulinga?— Ka, iye yanunga ni kulinga yuma yipema, ngwe chize yisemi jenyi amulongesele.

Yika te Eli chamutamba kulinga hali ana jenyi aali?— Iye te chamutamba kwaaha upatwilo. Nawa te chamutamba kwaahuma ku zuwo lia Zambi. Alioze Eli kakachilingile, kashika Yehova anakamwivwila uli hamwe ni ana jenyi. Yehova yakwata chiyulo cha kwaaha upatwilo.

Ha umwe ufuku muze Samuele te anapomba, iye yevwa umwe mutu kanamusanyika ngwo: ‘Samuele!’ Iye yaya kuli Eli, alioze Eli yamba ngwenyi: ‘Yami chakusanyikine.’ Chino chapwile nawa ha yisuho yiali. Muze te hi yakumbana yisuho  yitatu, Eli yamba kuli Samuele ngwo nyi wevwa nawa liji liacho, yena chakutamba kukumbulula ngwo: ‘Vulie, Yehova, hanjika; Ngunapanjika.’ Che Samuele alingile. Mba hi Yehova yamba kuli Samuele ngwenyi: ‘Lweza Eli ngwo yami nguhana upatwilo kuli usoko wenyi ha mukunda wa yuma yipi yize ayo analingi.’ Shina chino chapwile chashi kuli Samuele ha kulweza sango jacho kuli Eli?— Ka, te hi chashi ko. Chipwe ngwe, Samuele woma evwile, nihindu iye yalinga yize Yehova amulwezele. Yuma yize Yehova ambile yiyipwa yaumwenemwene. Ana aali ja Eli yaashaha, Eli neye yafwa.

Samuele kali chilweza chipema kuli yetwe. Iye kanakalinga yuma yipema chipwe ngwe atu akwo te kakulinga yuma yipi. Nyi yena, yika te mulinga? Shina yena muupwa ngwe Samuele, mununga ni kulinga yuma yipema? Nyi wachilinga, yena muuwahilila mbunge ya Yehova ni ya yisemi je.