Timoteu te umwe mukweze yoze te wakuwahilila ha kukwasa atu. Iye te kakuyaya ku yihela yinji hanga akwase akwo. Ha mukanda wa yino, iye te kakuwahilila chinji ku mwono wenyi. Yena unazange kunyingika hakutwala ku mwono wenyi?—

Timoteu kanakakolela mu yimwe mbonge yize te akuvuluka ngwo, Lisetra. Muze iye te uchili kanuke, kako Loye ni naye Unise, yaputuka kumulongesa hakutwala kuli Yehova. Muze Timoteu akolele, iye yazanga kukwasa akwo hanga anyingike Yehova.

Muze Timoteu te uchili mukweze, Paulu yamwita hanga jiye mu wenyi wa kwambujola sango lipema ku yihela yikwo. Timoteu yatayiza ngwenyi: ‘Ewa!’ Iye yazanga kuya ni kukwasa akwo.

 Timoteu yaya ni Paulu ku yimwe mbonge ya Masendoniya te akuvuluka ngwo Tesalonika. Ha kuyako, ayo yenda chinji hi yanyina mu ulungu. Muze ayo aheteleko, yakwasa atu anji hanga alilongese hakutwala kuli Yehova. Alioze amwe atu yaputuka kuvwila Paulu ni Timoteu uli nawa yafupa kwaashaha. Kashika Paulu ni Timoteu akatukileko hanga aye ni kwambujola sango lipema ku yihela yeka.

Ha kupalika cha amwe tukweji, Paulu yeta kuli Timoteu hanga afune ku Tesalonika ni kumeneka mandumbu. Iye te chamutamba kupwa ni hamu hakufuna ku mbonge yacho, mumu atu jako te api. Alioze Timoteu yayako ha mukunda wa zango kuli mandumbu waze te atwamako. Iye yaneha lusango mupema kuli Paulu. Mandumbu a ku Tesalonika te kali kanawa!

Timoteu kanakakalakala miaka yinji hamwe ni Paulu. Kashika Paulu asonekene ngwo Timoteu kali mutu mupema yoze te iye mahasa kutuma hanga akwase yikungulwila. Timoteu te kakuzanga Yehova nawa te kakuzanga atu.

Yena wakuzanga atu nawa unazange hanga waakwase kunyingika Yehova?— Nyi wachilinga, yena muhasa kuwahilila ku mwono we, ngwe chize Timoteu te akuwahilila!