“Yena Mbeteleme Efrata, . . . kuli yena mukukangutuhukila umwe yoze makapwa mukwa kuyula Izalele.”

Mika 5:2

“Muze te Yesu hasemuka mu Mbeteleme, chihunda cha mu Yundeya, ha matangwa ja mwanangana Heronde, kumanyi, akwa mana a ku Chivumbuko yeza ku Yerusaleme.”

Mateu 2:1

“Kanalianyina mazalo jami hakachi ko; ha chikuto chami kanate chela.”

Samu 22:18

“Mba maswalale muze te hahachila Yesu ha [mutondo], anjile mazalo jenyi, alingile yihanda yiwana . . . Alioze, chikuto kuchapwile ni mutongwa, chatungiwile chize kwilu ndusu cheswe. Kashika aliambile umwe kuli mukwo ni mukwo ngwo, Kanda tuchipula, alioze tutenu chela, tunyingike yoze machitambula.”

Yoano 19:23, 24

“Kakufunga yifwaha yenyi, chipwe chimuwika kuchamakukine.”

Samu 34:20

“Alioze ha kuheta kuli Yesu, amwene te hafwa kulu, kamakwine molu jenyi.”

Yoano 19:33

“Alioze ha utanguko wa yetu amwashile.”

Izaia 53:5

“Alioze umwe wa kuli maswalale watuwile lumbu lienyi ni kunga.Hazehene mwatuhukile manyinga ni meya.”

Yoano 19:34

“Yangupezalishila ha fweto yami makumi atatu a mbongo ja prata.”

Zekaria 11:12, 13

“Henaho umwe wa kuli kumi ni aali, jina lienyi, Yundase Ka-Keriote, yaya kuli asasendote akwa lutwe ngwenyi, Chingahi munungwaha nyi mungumukunjika kuli yenu? O yalula kuli iye makumi atatu a mbongo ja prata.”

Mateu 26:14, 15; 27:5