1. Kuchi sango hakutwala ku tufutafuta, kujilika ni wanga jinakwate hali atu anji?

 “Mukanda Religião Tradicional Africana unambe ngwo, “mu África chili uhepuke kuhula nyi kwatwama nganga,” unanungu nawa ngwo, “mu África atu eswe kakutayiza ngwo, wanga kuwatwamako.” Chipwe atu waze alilongesele chinji ni waze kalilongesele, eswe kakutayiza ngwo, tufutafuta, vulama ni wanga yatwamako. Mangana a mayingeleja no kakutayiza ngwo, yuma yacho yatwamako.

2. Kulita ni yize atu akutayiza, tachi ja tufutafuta kulihi jakukatuka?

² Mu África atu kakutayiza ngwo, kwatwama yimwe spiritu hanji tachi. Zambi mwe wakusongwela tachi jacho. Maspiritu ni tulamba twetu mahasa kukalakala ni tachi jacho. Atu amwe kukalakala ni tachi jacho hanga alinge yuma yipema (wanga wa kulifunga nawo) hanji yuma yipi (wanga wa kulinga nawo upi).

3. Wanga wa kulinga nawo upi yika unalumbunuka, chikwo nawa yika atu akunyonga hakutwala ku wanga wacho?

³ Wanga wa kulinga nawo upi hanji vulama kakuuzachisa hanga alimike nawo ni akwa-kole. Kulita ni yize atu akutayiza, waze akuzachisa tachi jacho kakuhasa kutuma tufukufuku, tujila, jiji ni yuma yikwo nawa hanga alinge upi kuli atu. Anji kakutayiza nawa ngwo, wanga wa kulinga nawo upi kakuuzachisa hanga atu alilambe, achine kushita, apwe ni misongo hanji kufwa.

4. Yika atu amwe akutayiza hakutwala kuli nganga, yika nawa amwe waze apwile nganga akwamba?

⁴ Wanga ni nganga yakwendela hamuwika. Atu amwe kakwamba ngwo, nganga kakwecha mijimba yo ufuku hanga ahumuke kusuku mumu kanazange kuliwana ni nganga-ni-akwo hanji kulowa atu. Amu mujimba wa nganga wakusala ha muhela mu tulo, shindakenyo yakukatuka kuli waze apwile nganga haliapwila ha wecha. Chakutalilaho, umwe mukanda wa mu África unahanjika hali waze apwile nganga (anji a kuli ayo akweze a mapwo) waze ambile ngwo: “Nashiha atu 150 ha kwalimbwisa ni moto.” Mukwo ngwo “nashihile twanuke atano ha kwashisa manyinga.” “Nashihile tusendo twami atatu mumu lia kungwecha.”

5. Wanga wa ufunge yika, kuchi akuuzachisa?

⁵ Atu kakutayiza ngwo wanga wa ufunge wakufunga atu ku yuma yipi. Waze akwete wanga wa ufunge, kakuzachisa kazeya hanji mikosa. Kakunwa yitumbo ya ufunge hanji kulikwitayo ha mujimba. Kakusweka mu mazuwo jo hanji mwishi lia mavu chimwe chikwata chize ayo akunyonga ngwo muchiafunga. Kakufuliela nawa ha yimwe mikosa yize yikwete sona ya mu Mbimbiliya hanji Alcorão.

6. Yika Satana ni Andemoniu jenyi alingile ha mashimbu akunyima, nawa yika twatamba kunyingika ha ndundo jize ali najo?

⁶ Satana ni andemoniu jenyi kali akwa-kole waze akulimika ni atu. O kakwete ndundo jakulingisa manyonga ni mwono wa atu, ha mashimbu akunyima, ayo kahashile kunjila mu mijimba ya atu ni ya tushitu ni kutwamamo. (Mateu 12:43-45) Twatambile kulelesa ndundo jo, alioze kanda tunyonga ngwe kakwete ndundo jahiana.

7. Yika Satana akuzanga hanga tufuliele, hana chilweza.

⁷ Satana mwe mwata wa mahuza. Kakupiangula atu hanga anyonge ngwo iye kakwete ndundo jinji. Chakutalilaho: Muze mu chimwe chifuchi cha mu África mwapwile jita, maswalale kazachishile yingambia-ngambia ya miaso hanga evwise woma akwa-kole jo. Shimbu kanda te achilimika no, maswalale kapwile ni kwimbisa maliji a kukopa a mambomba ni mata. Kazangile hanga akwa-kole jo anyonge ngwo, kanalimiki ni chimwe chizavu cha maswalale chize chili ni mata anji nawa a ndundo. Chizechene nawa, Satana kakuzanga hanga atu afuliele ngwo iye kali ni ndundo jinji jahiana. Nyonga lienyi lili kuvwisa woma atu hanga alinge yuma yize iye akuzanga ni kwecha kulinga upale wa Yehova. Tutalenu haliapwila mahuza atatu waze Satana akuzanga hanga atu afuliele.

8. Mahuza aka amwe waze Satana akumwanga?

⁸ Mahuza amwe waze Satana akumwanga kali wano: Kukushi upi wakulingiwa chamulingiwila; chuma chipi chize mutu katulingilecho chakulingiwa kupalikila mu ndundo ja maspiritu. Chakutalilaho, tuchinyongenu ngwe umwe mwana mafwa ni yikola ya kachiki. Naye kota kananyingika ngwe yikola ya kachiki yakukatuka kuli tumwe. Alioze hanji manyonga nawa ngwo umwe mutu wazachisanga wanga hanga atume kamwe asume mwanenyi.

9. Kuchi Mbimbiliya yakusolola ngwo hi Satana ko wakuneha upi weswe?

⁹ Chipwe ngwe Satana kali ni ndundo jakulinga yuma yipi, chili chipi kufuliela ngwo upi weswe twakumona hanji chuma cheswacho muchilingiwa chalingiwa ni ndundo jenyi. Mbimbiliya yinambe ngwo: “Mukwa tambu keshi kukumba mu yizombwoka; mukwa tachi keshi kukumba mu jita, mukwa mana keshi kuzuka kulia; mukwa yinyingi keshi kuzuka upite; mukwa utotombo keshi kumulemesa, alioze chakuawana nikulita ni tangwa liacho; chakupwa chipwila.” (Chilumbununyi 9:11) Umwe mukwa-kuzomboka mahasa kuzomboka chinji kuhiana akwo, alioze hanji kechi kukumba. Chimwe “chipwila” muchihasa kumuwana ni kumuhonesa kukumba. Iye mahasa kuhukana ni kulimbuka, kulivwa chipi hanji mahasa kwivwa kulu yikola. Yuma yino muyihasa kulingiwa kuli mutu mweswawo. Yuma yacho hi Satana ko wakuyineha hanji wanga, alioze yene lume yakulingiwa.

10. Yika atu akwamba hali nganga, nawa kuchi tunanyingika ngwetu yino yili ya mahuza?

¹⁰ Mahuza akwo waze Satana akumwanga kali wano: Nganga kakuhichika mijimba yo ni kuya ni kwenda ufuku hanga alitakane ni nganga-ni-akwo hanga apinjise miono ya atu ni kwashiha. Hachino, lihule ngwe: ‘Nyi ngwe nganga kakulinga yuma yacho, yika yakutuhuka mu mujimba?’ Ngwe chize twamona, alma mutu, hi chuma ko chize chakukatuka mu mujimba wa mutu. Chikwo nawa, spiritu ye tachi ya ku mujimba, alioze kuyishi kuhasa kulinga nichimwe chakuhona mujimba.

11. Kuchi tunanyingika ngwetu nganga keshi kuhichika mijimba yo, shina yena wakutayiza yino?

¹¹ Chipwe alma chipwe spiritu kuyishi kuhasa kuhichika mujimba hanga yilinge chimwe chuma, chipema hanji chipi. Kashika, nganga keshi kuhichika mijimba yo. Kwamba pundu, ayo keshi kulinga yuma yize atu akwamba hanji akunyonga.

12. Kuchi Satana akutwala atu hanga afuliele ngwo ayo kalingile yuma yize kakalingile?

¹² Kuchi mutuhasa kulumbununa yize atu apwile ni wanga akwamba? Satana mahasa kutwala atu hanga afuliele ngwo ayo kalingile yuma yize kakalingile. Kupalikila mu yilota, Satana mahasa kutwala atu hanga anyonge ngwo kamwene, kevwile nawa kalingile yuma yize kakamwene, kakevwile chipwe kuyilinga. Hachino, Satana kanazange kupiangula atu ja Yehova hanga anyonge ngwo Mbimbiliya yili ya Mahuza.

13. (a) Shina wanga wa ufunge uli upema? (b) Yika Mbimbiliya yakwamba hakutwala ku wanga wa ufunge?

¹³ Mahuza akwo kali wano: wanga wa ufunge uli uze atu akunyonga ngwo walisa ni wanga wa kushaha nawo, nawa ngwo uli upema. Mbimbiliya kuyishi kusolola kalisa uli ha wanga wa ufunge ni wa kushaha nawo. Mbimbiliya kuyishi kuzanga wanga weswawo. Tutalenu shimbi jize Yehova ahanyine kuli A-Izalele hakutwala ku kafutafuta hanji wanga ni waze apwile ni kuyilinga:

•   “Kanda nukalinga yuma ya kutaha ni ya wanga.”—Ulevi 19:26

•   “Lunga hanji pwo mukwa mahamba hanji mukwa tufutafuta, munumushiha. Munumwasa mawe.”—Ulevi 20:27.

•   “Kanda awana kuli yenu . . . mukwa kupanda, chipwe nganga, chipwe mukwa kujilika, chipwe mukwa tufutafuta, chipwe mukwa kuhula afu.”—Shimbi Yamuchiali 18:10-14.

14. Mumu liaka Yehova asele shimbi hakutwala ku tufutafuta hanji wanga?

¹⁴ Shimbi jino jasolwele zwalala ngwo, Zambi keshi kuzanga hanga atu jenyi alinge tufutafuta. Yehova kasele shimbi jino kuli atu jenyi mumu kakwazanga nawa kakazangile hanga apwe ndungo ya woma ni kujikijila yuma ya mahuza. Chikwo nawa, kakazangile hanga andemoniu apinjise atu jenyi.

15. Kuchi Mbimbiliya yakusolola ngwo Yehova kali ni ndundo jinji kuhiana Satana?

¹⁵ Chipwe ngwe Mbimbiliya kuyishi kuhanjika chinji hakutwala ku yize andemoniu mahasa kulinga ni yize keshi kuhasa kulinga, nihindu yakusolola pundu ngwo, Yehova kali ni ndundo jinji kuhiana ndundo ja Satana ni andemoniu jenyi. Yehova kahumine Satana mu malilu. (Usolwelo 12:9) Nyingika nawa ngwe, Satana kechile utayizo kuli Zambi hanga eseke Yombi, chikwo nawa kanakononokena Zambi muze amwambile ngwo kanda ashiha Yombi.—Yombi 2:4-6.

16. Kuli iya twatamba kuchinyina hanga atufunge?

¹⁶ Mukanda wa Yishima 18:10 unambe ngwo: “Jina lia Yehova liapwa kaposhi mukolo. Mukwa ululi machinyinamo mba mamufungila mwilu.” Kashika, twatamba kuchinyina kuli Yehova hanga atufunge. Tuvumbi twa Zambi keshi kulinga tufutafuta hanji yipanda-panda hanga alilamwine kuli Satana ni andemoniu jenyi, chikwo nawa keshi kwivwa woma wa wanga. Tuvumbi twa Zambi kakufuliela yize Mbimbiliya yakwamba ngwo: “Mumu meso ja Yehova kakumona ndusu hashi heswe akalisolole mukwa tachi kukwasa yoze uli ni mbunge yingunu kuli iye.”—2 Sango ja Mianangana 16:9.

17. Shindakenyo yika tunawane ha Tiangu 4:7, alioze yika twatamba kulinga?

¹⁷ Ni yena muhasa kupwa ni shindakenyo yino nyi mulingila Yehova. Mukanda wa Tiangu 4:7 unambe ngwo: “Kashika lizeyesenu kuli Zambi; alioze limikenu ni Ndiapu mba kumakanuchina.” Nyi mulingila Zambi wamwenemwene ni kumwononokena, muhasa kupwa ni shindakenyo ngwo Yehova makufunga.