1, 2. (a) Yika mangana amayingeleja ahashile kulinga ni mulimo wa kwambujola, nawa yika apostolo alingile? (b) Mumu liaka apostolo alitunyine kukaula shimbi yize yapwile kukanjisa mulimo wa kwambujola?

 HANYIMA lia Pentekoste 33 M.J., chikungulwila cha Akwa-Kristu mu Yerusaleme te hichalinga poso jikehe wika. Kwamba umwenemwene, kuli Satana waze kapwile mashimbu apema hanga eseke chikungulwila shimbu kanda te chichikola chinji ku ufulielo. Kawashi-washi, Satana katwalile mangana ha mashimbu jacho akanjise mulimo wa kwambujola. Chipwe chocho, apostolo kanungine ni kwambujola ni zango chikwo nawa malunga ni mapwo yanunga ni kufuliela kuli Mwene.—Yilinga 4:18, 33; 5:14.

² Ni ufwatulo, akwa-kole yasa apostolo ja Yesu mu zuwo lia ususu. Alioze, ha ufuku, mungelo wa Yehova yazulula pito lia zuwo lia ususu, ha chimenemene apostolo yaputuka cheka ni kwambujola. Kaatwalile nawa mu zuwo lia ususu kuli manguvulu mumu kanungine ni kwambujola. Hachino, apostolo ja Yesu yakumbulula ngwo: “Chatutamba kwononoka kuli Zambi, hi kuli atu ko.” Akwa-kuyula yevwa uli, chikwo nawa “yazanga kwashiha.” Hazehene Ngamaliele umwe hakachi ka akwa-kuyula, longeshi ya Shimbi, mulemu kuli atu eswe yamba ngwenyi: “Keyelenu ha kutwala ku chize nunambe kulinga kuli wano atu.” Akwa-kuyula kakawile chiyulo chenyi ni kuchiza apostolo mu zuwo lia ususu. Mba yika malunga wano ashishika te malinga? Ni hamu ayo “kalitwaminyineko kulongesa, nikwambujola Sango Lipema ngwo, Yesu iye mwe Kristu.”—Yilinga 5:17-21, 27-42; Yishi. 21:1, 30.

3, 4. (a) Majila aka Satana akuzachisa hanga alimike ni atu ja Zambi? (b) Yika mutushimutwina ha mutwe uno ni ha mitwe yikwo yiali yize muyisulaho?

³ Usopeso uze walingiwile ha mwaka 33 M.J., wapwile chisuho chitangu chikungulwila cha Akwa-Kristu kupalika mu yihungominona kukatuka kuli manguvulu, alioze o kakasulilile hazehene. (Yilinga 4:5-8; 16:20; 17:6, 7) Ha mashimbu jetu nawa, Satana kakutwala atu waze akulimika ni uwayilo wa umwenemwene hanga asupwile manguvulu akanjise mulimo wa kwambujola. Akwa-kulimika ni uwayilo wamwenemwene kakwamba yuma yipi hakutwala kuli atu ja Zambi. Amwe a kuli ayo kakwamba ngwo, tuli akwa-mbwanja. Akwo kakwamba ngwo twakutwala atu hanga alimike ni manguvulu nawa ngwo tuli akwa-kulanjisa. Ha mashimbu alita, mandumbu jetu kayile ku chota hanga asolole ngwo yuma yize akutwamba yili ya mahuza. Yika yalingiwile ha chikuma chacho? Kuchi yiyulo yize yakatukile ku chota miaka yinji kunyima yinakwate hali yena musono? Haliapwila mututala yikuma yimwe ya usopeso hanga tumone chize yinatukwasa “kufunga ni kukolesa Sango Lipema.”—Fwili. 1:7.

⁴ Ha mutwe uno mutulilongesaho chize twakukalila ulite wetu wa kwambujola. Ha mitwe yaali muyihataho mutushimutwina yize twalingile mba tukumbe batalhas jurídicas mumu lia kuzanga kununga kwehuka kulinjisa ku yuma ya mafwefwe ni kutwama kulita ni shimbi ja Zambi.

5. Kusongo lia mwaka 1930, mumu liaka akwa-kwambujola asele mu mazuwo a ususu, chikwo nawa yika mandumbu a ku mutangu anyongene kulinga?

⁵ Kusongo lia mwaka 1930, chifuchi cha Estados Unidos yicheseka kushinjila Yela ja Yehova hanga apwe ni mukanda uze unakatuka kuli manguvulu unambe ngwo ayo katela kwambujola. Alioze, mandumbu jetu kakatayile kulinga chino. Mumu ayo te kananyingika ngwo mukanda wacho te uli shimbu lize mahasa kuzachisa, chikwo nawa, ayo te kali ni shindakenyo ngwo niumwe nguvulu keshi ni ulite wa kukinda kukaula usongwelo uze Yesu ahanyine wa kwambujola sango jipema ja Wanangana. (Marku 13:10) Chino chatwalile akwa-kwambujola anji kwasa mu zuwo lia ususu. Makulwana a mu chikungulwila, kayile ku chota hanga akwase mandumbu. Ayo te kanazange kusolola ngwo nguvulu kanalinge katonde ha kukanjisa Yela ja Yehova kuwayila Zambi. Ha mwaka 1938 yikulingiwa yimwe yize yakwashile kukalila ulite wetu wa kwambujola kulutwe. Yika yalingiwileko?

6, 7. Yika yalingiwile ni usoko wa ndumbu Cantwell?

⁶ Ha chimene liamaali, ha tangwa 26 ya Abril 1938, Newton Cantwell wapwile ni miaka 60, hamwe ni mukwo-pwo ni ana jenyi Henry, Russell, ni Jesse, eswe pionelu alipwila, kayile ni kwambujola mu mbonge ya New Haven, Connecticut. Ayo kanyingikine ngwo kota te keshi kuhasa kuhiluka ku zuwo. Mumu liaka? Mumu kapwile ni kwasa mu zuwo lia ususu ha yisuho yinji, kashika anyongene ngwo kota maasa nawa mu zuwo lia ususu. Chipwe chocho, yino kuyakakinjile kwambujola sango jipema. Ayo yaheta mu New Haven ni mashinyi aali. Newton mwe te unendesa mashinyi waze te ali ni mikanda hamwe ni fonografu, Henry kapwile ni miaka 22, iye mwe te unendesa mashinyi waze te ali ni yisaji. Ngwe chize ayo anyongene, ha kupalika cha mashimbu akehe, mapulisha yaya ni kwakwata.

⁷ Chitangu, Russell umwe mukweze te uli ni miaka 18 kamusele mu zuwo lia ususu, hanyima yasa nawa Newton ni esther. Jesse yoze te uli ni miaka 16 kamwene chize yesemi jenyi te anaatwale kuli mapulisha. Amu Henry te anambujola ku chihela chikwo, Jesse kapwile ukawenyi. Chipwe chocho, iye kakwachile fonografu ni kununga ni kwambujola. Amwe malunga a mu yingeleja Catolica yatayiza hanga Jesse aalweze sango jipema. Hachino, iye kasele pande ja Ndumbu Rutherford jili ni mutwe unambe ngwo “Mukwa-kole.” Ha kupanjika pande, malunga jacho kevwile uli ni kuzanga kulamba Jesse. Jesse yalihumikiza, ni kuya ku chihela chikwo, chocho yamukwata kuli mapulisha ni kumusa neye mu zuwo lia ususu. Ndumbu Newton ni ana jenyi kapwile mu zuwo lia ususu. Alioze, ha tangwa lizeliene yaatusula.

8. Mumu liaka Jesse Cantwell amusumine mulonga wa kupwa mukwa-mbwanja?

⁸ Ha kupalika cha tukweji amwe, ha mwaka 1938 kakweji wa Setembro, usoko wa ndumbu Newton kaatwalile ku chota cha usopeso mu mbonge ya New Haven. Mukwa-kusopesa yasuma mulonga Newton, Russell ni Jesse ha kwamba ngwo kakuya ni kwita mulambu chakuhona umwe mukanda wa utayizo. Chipwe ngwe keseka kwita ukwaso hanji kusoneka ku Chishina Chinene cha Chota mu Connecticut, nihindu Jesse kamusele mu zuwo lia ususu ni kumwamba ngwo kakupinjisa sambukila, nawa ngwo kali mukwa-mbwanja. Mumu liaka? Mumu malunga aali Akwa-Katolika waze apanjikile sango mu chisaji kambile mu chota ngwo ayo kahanjikile yuma yipi hakutwala ku yingeleja yo. Mumu lia yino, mandumbu jetu a ku Mutango, yeta ukwaso ku Chishina Chinene cha Chota mu Estados Unidos, chota chinene chahiana yota yeswe mu chifuchi.

9, 10. (a) Chiyulo chika Chota Chinene cha Usopeselo mu Estados Unidos akwachile hakutwala ku usoko wa ndumbu Cantwell? (b) Kuchi twakuyuka musono mumu lia chiyulo chino?

⁹ Kukatuka ha 29 ya Março 1940, Ngaji Munene Charles E. Hughes ni ngaji akwo nake kapanjikile kulihangujola cha ndumbu Hayden Covington, umwe hako wa Yela ja Yehova. a Muze hako yoze wakukalila nguvulu ambile yuma yipi hanga asolole ngwo Yela ja Yehova kakwete mbwanja, umwe ngaji yamuhula ngwo: “Shina sango jize Yesu apwile ni kwambujola ha shimbu lienyi atu te kakujizanga?” Iye yakumbulula ngwenyi: “Ka. Nyi ngunewuluka kanawa, Mbimbiliya yinambe ha yize yalingiwile kuli Yesu mumu lia kwambujola sango jacho.” Iye kasolwele chikuma chilemu, chocho yatesa Yela ja Yehova ni Yesu Kristu ni kutesa manguvulu ngwe waze amushihile. Ha tangwa 20 ya Maio ya 1940, Chota cha Usopeso yichikwata chiyulo chipema hali Yela ja Yehova.

¹⁰ Mumu liaka Chota chakwachile chiyulo chipema hali Yela ja Yehova? Chino chahanyine ulite kuli Yela ja Yehova wa kwambujola kweswako mazanga, nawa nguvulu niumwe katambile kwaakanjisa. Chikwo nawa, Chota chakawanyine mulonga “wakupinjisa sambukila ni kupwa mukwa-mbwanja” kuli ndumbu Jesse. Kwamba umwenemwene, chiyulo chacho chasolwele ngwo Yela ja Yehova kali atu ja Zambi, nawa ngwo keshi kupinjisa sambukila! Kuchi chiyulo chino chinatukwase musono? Umwe hako wa Yela ja Yehova kambile ngwenyi: “Ulite wetu wa kuwayila Zambi chakuhona ukanjiso, wakutukwasa ngwe Yela ja Yehova kwambujola sango jipema jize jakuhana kutalatala kuli atu.”

11. Kwambujola chika chalipwila chize mandumbu alingile mu chifuchi cha Canadá? Nawa mumu liaka?

¹¹ Ha mwaka 1940, Yela ja Yehova mu chifuchi cha Canada kapalikile mu yihungumiona. Kashika ha mwaka 1946, mandumbu kalingile umwe ululikiso wa kwambujola chalipwila ha matangwa 16 ni kuhana mukanda unambe ngwo, “O Ódio Ardente de Quebec a Deus, a Cristo e à Liberdade É uma Vergonha para Todo o Canadá,” hanga asolole katonde wa nguvulu ha kukanjisa mulimo wa kwambujola. Mukanda uno wasolwele chize mangana a mayingeleja ni mapulisha te akupinjisa mandumbu mu mbonge ya Quebec. Mukanda wanungine ngwo, “Yihungumiona ya Yela Ja Yehova yinachinunga. Kuli milonga 800 yize kanda achisopa hali Yela ja Yehova mu Grande montreal.”

12. (a) Kuchi akwa-kole evwile mumu lia kwambujola chalipwila? (b) Mulonga uka asumine mandumbu jetu? (Tala nawa maliji mushi lia lifwo)

¹² Maurice Duplessis, umwe Nguvulu wa mu Quebec hamwe ni Católico Romano Villeneuve, yazanga kwasa “jita chakuhona keke” ni Yela ja Yehova. Kashika milonga yize asumine Yela ja Yehova yapwile 800 ni kuheta ndo 1,600. Umwe pionelu yamba ngwenyi, “Mapulisha yatukasa ha yisuho yinji, yize kutushi kuhasa kwalula. Yela waze apwile kuhana tumikanda, kakwachile ni kwasuma mulonga wa kuhana mikanda yize “yinalimiki ni manguvulu.” b

13. Aya waze atangu asumine mulonga ya kulimika ni nguvulu, chiyulo chika chota cha usopeselo chakwachile?

¹³ Ha mwaka 1947, ndumbu Aimé Boucher ni anenyi a mapwo Gisèle wa miaka 18 ni Lucille wa miaka 11, kapwile atangu waze akwachile ha mulonga wa kuhana mikanda yinalimiki ni manguvulu. Ayo kahanyine tumikanda tunambe ngwo, “O Ódio Ardente de Quebec a Deus, a Cristo e à Liberdade É uma Vergonha para Todo o Canadá” hakamwihi ni chihunda cho ku milundu ya ku south mu Quebec, alioze chapwile chikalu kwamona ngwe atu akwa-mbwanja. Ndumbu Boucher kapwile mukwa-kulikehesa, nawa kapwile ni kachihunda kakehe. Chipwe chocho, asoko jenyi kapwile ni kunyongonona mu yihungumiona yinakatuka ku tumikanda twacho. Ngaji yoze unakapwa ni kusopa mulonga wacho, te keshi kuzanga Yela ja Yehova. Kashika iye yalituna kutayiza ngwo ndumbu Boucher keshi ni mulonga, iye katayijile ngwo tumikanda tunalimiki ni nguvulu. Yize Ngaji ambile yalumbunukine ngwo: Uli mulonga kuhanjika umwenemwene! Aimé ni Gisèle kaasumine mulonga uze kakalingile, ni kanuke Lucille kamusele mu zuwo lia ususu ha matangwa aali. Mandumbu yatwala mulonga wacho ku Chota Chinene cha mu Canada, chize chatayijile kusopa mulonga wo.

14. Yika mandumbu mu Quebec alingile muze apalikile mu yihunguminona?

¹⁴ Mandumbu ni mapangi jetu a hamu mu chifuchi cha Quebec, kanungine kwambujola sango lipema lia Wanangana, chipwe ngwe ayo kapwile ni kwahungumiona. Yehova kanungine ni kwakwasa. Muze kwapalikile miaka yiwana kukatuka haze aputukile kwambujola chalipwila chakuhana tumikanda tuze nguvulu kakazangile ha mwaka 1946, Yela ja Yehova yapwa anji, kukatuka ha 300 kuheta ha 1,000! c

15, 16. (a) Chiyulo chika chakwachile Chota chinene cha Usopeselo cha Canadá hakutwala ku usoko wa ndumbu Boucher? (b) Kuchi chiyulo chino chakwachile kuli mandumbu jetu ni atu akwo nawa?

¹⁵ Ha Junho 1950, Chota Chinene cha mu Canada, ni mangaji nake, kanakahengwola mulonga uze asumine ndumbu Aimé Boucher. Hakupalika cha tukweji asambano ha 18 ya Dezembro 1950, Chota yichikwata chiyulo chize chatukwashile. Mumu liaka? Ndumbu Glen How, hako wa Yela ja Yehova kambile ngwenyi, Chota chatayijile yize hako ahanjikile ngwo, mulonga uze asumine Yela ja Yehova wakulimika ni nguvulu hi wamwenemwene ko, mumu tumikanda tuze ayo apwile ni kuhana te kutushi kulimika ni shimbi ya nguvulu. Ndumbu How yawezela nawa ngwenyi: “Nawahililile chinji ha kumona chize Yehova atukwashile.” d

¹⁶ Chiyulo chize Chota Chinene chakwachile, chatuyukishile chinji. Chakwashile kuchiza milonga yikwo 122 yize Yela ja Yehova mu chifuchi cha Quebec aasumine. Chikwo nawa, chiyulo chino chalumbunukine ngwo mutu mweswawo mahasa kuhana nyonga lienyi hakutwala ku chize nguvulu mahasa kuyula. Chatalile nawa hali mayingeleja ni nguvulu wa mu Quebec waze te a kufupa kukanjisa ulite wa Yela ja Yehova. e

17. Kuchi manguvulu amwe akweseka kukaujola mulimo wetu wa kwambujola?

¹⁷ Chizechene ngwe Akwa-Kristu a ku sekulu yitangu, ni yetu musono kutushi kulanjisa liji lia Zambi. (Tanga 2 A-Korindu 2:17.) Chipwe chocho, manguvulu amwe kakuzanga kukaujola mulimo wetu wa kwambujola, hakusa shimbi jize mujisolola ngwe tuli akwa-kulanjisa. Tutalenu yilweza yiali yize yinasolola nyi Yela ja Yehova kali akwa-kulanjisa hanji akwa-kwambujola.

18, 19. Kuchi manguvulu mu Dinamarca esekele kukanjisa mulimo wetu wa kwambujola?

¹⁸ Dinamarca. Ha tangwa 1 ya Outubro 1932, yikupwa shimbi jize jakukanjisa kulanjisa mikanda chakuhona kupwa ni utayizo wa manguvulu. Alioze, mandumbu jetu kakalingile mukanda wacho uze wakwita utayizo wa manguvulu. Tangwa lize liahachileko, akwa-kwambujola atano kapalikishile tangwa liamuwundu ni kwambujola mu Roskilde, hakamwihi ni Copenhague mbonge yinene ya mu chifuchi. Chingoloshi, umwe mukwa-kwambujola August Lehmann, yamusa mu zuwo lia ususu ni kumusuma mulonga ngwo kanalanjisa mikanda chakuhona kwita utayizo wa manguvulu.

¹⁹ Ha 19 ya Dezembro 1932, yatwala August Lehmann ku chota cha usopeso. Iye yalumbununa ngwenyi, kamenekene atu ni kwaha mikanda ya mu Mbimbiliya, alioze te keshi kuyilanjisa. Chota chinene yichitayiza yize iye ambile, ha kulumbununa ngwo: “Iye . . . kali ni uhashi wa kupwa ni mbongo jenyi, katambwile niumwe ukwaso hanji jimwe mbongo mumu lia yize analingi. Alioze, mulimo wacho kwatwalile iye kutokesa jimwe mbongo jenyi.” Chota chinakakalila Yela ja Yehova nawa kakwachile chiyulo ngwo mulimo wa kwambujola “hi mingoso ko.” Alioze akwa-kulimika ni atu ja Zambi te kanase tachi jinji hanga akanjise mulimo wa kwambujola mu chifuchi cheswe cha Dinamarca. (Sam. 94:20) Alioze akwa-kulimika ni atu ja Zambi kesekele kwita ukwaso ku Chota Chinene cha Usopeso cha chifuchi. Mba yika mandumbu alingile?

20. Chiyulo chika Chota chinene cha Usopeselo chakwachile, nawa yika mandumbu alingile?

²⁰ Yela ja Yehova yaputuka kwambujola chinji mu chifuchi cha Dinamarca shimbu kanda achiya ku Chota Chinene cha Usopeso. Liamaali tangwa 3 ya Outubro 1933, Chota Chinene cha Usopeso kakwachile chiyulo ngwo, ndumbu August Lehmann kakalingile niyimwe yize yinalimiki ni shimbi ja manguvulu. Chiyulo chacho, chalumbunukine ngwo mandumbu mahasa kwambujola kweswako mazanga. Mba asolwele usakwililo kuli Yehova, mandumbu kalihanyine chinji mu mulimo wa kwambujola. Kukatuka ha tangwa liacho, mandumbu jetu ku Dinamarca kakwambujola ni utuswilo.

21, 22. Chiyulo chika Chota chinene cha Usopeselo cha mu Estados Unidos chakwachile hali ndumbu Murdock?

²¹ Estados Unidos. Ha Liayenga 25 ya Fevereiro 1940, Robert Murdock Jr, ni mandumbu akwo shimbiali kaasele mu zuwo lia ususu amu te anambujola mu mbonge ya Jeannette. Kaasele mu zuwo lia ususu mumu keshi ni mikanda ya akwa-kulanjisa. Chota yichitayiza kuhengwola kanawa chikuma chino.

²² Ha tangwa 3 ya Maio 1943, Chota Chinene chakwashile Yela ja Yehova. Chota Chinene chakatayijile kuhana mikanda ya akwa-kulanjisa kuli Yela ja Yehova mumu “chino te chinalimiki ni shimbi.” Kashika, Chota chambile ngwo “mukanda wakulanjisa nawo wa manguvulu unakinda utuswilo uze mutu akwete wa kuwayila Zambi yenyi, ni kukaula shimbi ja yingeleja yenyi.” Muze asolwele chikuma chacho ku Chota, ngaji William O. Douglas kambile ngwo mulimo uze Yela ja Yehova “akulinga unahiana hi wika ko kwambujola hanji kutetela mikanda ya yingeleja.” Iye yamba nawa ngwo, “Mulimo uno unalite ni mulimo uze akulinga mukachi ka mayingeleja ngwe . . . kulemba ni kulinga pande.”

23. Mumu liaka kukumba chize yalingiwile ha mwaka 1943 chili chilemu kuli yetu?

²³ Chiyulo chino cha Chota Chinene chakwashile atu ja Zambi. Mumu chahanyine shindakenyo ngwo tuli akwa-kwambujola hi akwa-mingoso ko. Ha tangwa lize lilemu ha mwaka 1943, Yela ja Yehova kakumbile yihungumiona 12, ha yihungumiona apalikile 13, kuchingako chikuma Murdock. Yiyulo yino yakutukwasa ndo musono, chipwe muze akwa-kulimika ni yetu akweseka cheka nawa kukinda mulimo wetu wa kwambujola sango jipema ha mbunga ni ku zuwo ni zuwo.

24. Yika twakulinga muze nguvulu akukanjisa mulimo wetu wa kwambujola?

²⁴ Ngwe tuvumbi twa Yehova, twakuwahilila chinji muze nguvulu akutayiza ulite wetu wa kwambujola ni utuswilo. Alioze, nyi nguvulu makanjisa mulimo wetu wa kwambujola, twakululieka yimwe hanga tununge ni kwambujola mu jina yeswayo. Chizechene ngwe apostolo, ni yetu “Chatutamba kwononoka kuli Zambi, hi kuli atu ko.” (Yili. 5:29; Mateu 28:19, 20) Chipwe chocho, twakuzomboka ku chota muze akukanjisa mulimo wetu, hanga tuhwise kapinda wacho. Tutalenu yilweza yiali.

25, 26. Yuma yika yalingiwile mu Nicarágua yize yatwalile kupatwila mulonga mu Chota chinene, nawa chiyulo chika chota cha usopeselo chakwachile?

²⁵ Nicarágua. Ha tangwa 19 ya Novembro 1952, Donovan Munsterman, umwe Mishionaliu nawa mukwa-kukalakala ku mutango. Kanjilile mu chipatulo cha waze akuhengwola mikanda ni atu Akunjila mu mbonge yinene ya Manágua. Kamusanyikine kuli kapitau Arnoldo García yoze wapwile kasongo wa chipatulo chacho. Kapitau yamulweza ngwo, “mulimo wa kwambujola ni uwayilo wa Yela ja Yehova uli wakukanjisa mu chifuchi cha Nicarágua.” Muze amuhulile mumu liaka mulimo wetu uli wakukanjisa kapitau Garcia yakumbulula ngwo, Yela ja Yehova keshi ni utayizo wa nguvulu wakuya ni kwambujola sango jipema nawa ngwo kali akwa-mbwanja. Iya watusumine mulonga wa mutapu au? Kali ngana wa ku yingeleja Católica Romana.

²⁶ Ndumbu Donovan kawashi-washi ketele ukwaso ku chipatulo cha Nguvulu yoze wakusongwela Mayingeleja, ni kuli Mutolo yoze te unatumina chifuchi chacho Anastasio Somoza García. Alioze, ayo kakamukwashile. Hachino, mandumbu kafupiwile kwalumuna majila akuwayilamo. O yayika Zuwo lia Wanangana yaputuka ni kulikungulula mu yizavu yikehe-yikehe, yecha kuya mu munda ni kwambujola mu matapalo, chipwe chocho, kanungine ni kwambujola. Chikwo nawa, katumine mikanda ku Chota Chinene cha mu Nicarágua, ni kwita ukwaso hanga eche Yela ja Yehova ambujole ni utuswilo. Amu mikanda ya sango ya mu chifuchi yahanjikile ha ukanjiso wa mulimo wa Yela ja Yehova, Chota Chinene yichitayiza kuhengwola kanawa chikuma chacho. Yika yalingiwileko? Ha tangwa 19 ya Junho 1953, Chota Chinene yichikwata chiyulo cha kutusula Yela ja Yehova. Ayo kambile ngwo, ukanjiso wa mulimo wa Yela ja Yehova yinalimiki ni shimbi yinatale ha ulite uze mutu mweswawo akwete wa kuwayila Zambi.

27. Mumu liaka Akwa-Nicaragua akomokene ni chiyulo chize Chota cha usopeselo chakwachile, kuchi mandumbu amwene kukumba chacho?

²⁷ Atu amu chifuchi cha Nicarágua kakomokene ha kunyingika ngwo, Chota Chinene chakwachile chiyulo cha kutusula Yela ja Yehova. Mumu kupiangula cha akwa-mayingeleja chapwile chinji, kashika Chota chehukile kulimika no. Chikwo nawa, amu nguvulu kakwete ndundo, chapwile chikalu ku Chota kukwata chiyulo chinalimiki ni yize nguvulu akwamba. Mandumbu jetu kapwile ni shindakenyo ngwo, kakumbile kapinda wacho mumu lia kupwa ni ukwaso wa Mwanangana wetu nawa kakechele kwambujola.—Yilinga 1:8.

28, 29. Ha mwaka 1980, yika yalumwine mu chifuchi cha Zaire?

²⁸ Zaire. Ha mwaka 1980, unji wa Yela ja Yehova wapwile mu chifuchi cha Zaire (haliapwila kayisanyika, República Democrática do Congo) te 35,000. Amu mulimo te unayi ni kwoka, mutango yiuputuka kutunga mazuwo aha a Wanangana. Ha Dezembro ya mwaka 1985 kwalingiwile kukunguluka cha mambonge cha yifuchi yinji, mu mbonge yinene ya Kinshasa, unji wa atu apwilemo te 32,000 a mu yifuchi yeka ni yeka. Alioze kulutwe yuma yiputuka kwalumuka kuli Yela ja Yehova. Mumu liaka?

²⁹ Ndumbu Marcel Filteau, mishionaliu wa mu Quebec chifuchi cha Canada, kamwene yihungumiona ha mashimbu a kuyula cha Duplessis, yoze wapwile mu Zaire ha mashimbu jacho. Iye kambile ngwenyi “Ha tangwa 12 ya Março 1986, Mutango watambwile umwe mukanda unambe ngwo, Yela ja Yehova keshi ni ulite wa kutwama mu chifuchi cha Zaire.” Mukanda wakukanjisa mulimo wa Yela ja Yehova kausonekene kuli Mutolo te watumina chifuchi avuluka ngwo, Mobutu Sese Seko.

30. Chiyulo chika chilemu Komite ya Mutango te atambile kukwata, yika ayo alingile?

³⁰ Ha kuputuka cha tangwa, yitwivwa mutambi ku chisaji ngwo: “Mulimo wa Yela ja Yehova kaukanjisa mu chifuchi cha Zaire.” Hohene, yihungumiona yiyiputuka. Mazuwo a Wanangana yapuzula, mandumbu jetu yaasa mu mazuwo a ususu, yaalamba, yeya yikwata yo, amwe ni ana jo yaasa mu mazuwo a ususu. Ha tangwa 12 ya Outubro 1988, nguvulu yatambula yikwata ya mu ululikiso wetu, chivazu cha maswalele yichiya kutwama ku mutango. Mandumbu waze akumanyinako ululikiso, kawashi-washi kayile ni kuhanjika ni Mutolo wa mu chifuchi Mobutu, alioze kakahele kumbululo nilimwe. Ha mashimbu jacho, Komite ya Mutango te chinafupiwa kukwata chimwe chiyulo chilemu: “Shina mutwita ukwaso ku Chota Chinene nyi mutushimbwila?” Timothy Holmes, yoze wapwile mishionaliu kasongo wa Komite ya Mutango, yamba ngwenyi, “Kawashi-washi yitwita ukwaso wa Yehova hanga atusongwele ni kutwaha mana.” Hanyima lia kulemba ni kuhengwola kanawa chikuma chino, mutango yiupwa ni shindakenyo ngwo te lishi shimbu lialita lia kwita ukwaso ku chota chinene. Hachino, yalinga ululikiso wa kulitakamisa umwe ni mukwo ni chize mahasa kununga ni kwambujola.

31, 32. Chiluyo chika chakukomwesa chize Chota chinene cha Usepeselo mu Zaire chakwachile, nawa kuchi yino yakwashile mandumbu jetu?

³¹ Kwapalikile miaka yinji. Yihungumiona hali Yela ja Yehova yiyitepuluka, chikwo nawa, nyonga lia kwecha mutu hanga asakule yize anazange kulinga yilioka. Komite ya Mutango yiyipwa ni shindakenyo ngwo, kwaheta mashimbu apema a kwita ukwaso ku Chota Chinene cha Zaire mumu lia ukanjiso wa mulimo wetu. Chaukomokeso, Chota Chinene yichitayiza kuhengwola chikuma chacho. Hachino, ha 8 ya Janeiro 1993, muze kwapalikile miaka shimbiali, shimbi ya nguvulu kayisele mu yitanga, yize yasolwele ngwo ukanjiso wa mulimo wa Yela ja Yehova kuwalitele, chocho yatwaha utuswilo. Nyonga ha yize chino chinalumbunuka: ngaji kasele mwono wo mu ponde ha kwehuka chiyulo chize chakatukile kuli Mutolo wa mu chifuchi! Ndumbu Timothy kambile ngwenyi, “Ha mashimbu jacho, twamwene chize Yehova mahasa kwalumuna yuma susumuku.” (Dan. 2:21) Kukumba kapinda wacho, chakolesele ufulielo wa mandumbu jetu, o kamwene chize Mwanangana wetu Yesu, akwashile atu jenyi hanga anyingike shimbu lialita lize mahasa kwita ukwaso.

³² Muze ahanyine utuswilo kuli Yela ja Yehova kulinga milimo yo, mutango watambwile utayizo wakuneha mishionaliu, kutunga mbetele ni kuneha mikanda ya mu Mbimbiliya. f Chochene lume, tuvumbi twa Zambi hashi heswe kanakawahilila ha kumona mutapu uze Yehova akufungilamo atu jenyi!—Iza. 52:10.

33. Yika twalilongesa ha Kuhengwola kapinda waze mandumbu jetu apalikile?

³³ Kuhengwola ha kapinda meswe twapalikile, yatwaha shindakenyo ngwo, Yesu kakumanununa chilakenyo chenyi chinambe ngwo: “kumungukanwaha kanwa ni mana, aze akwa kulimika ni yenu eswe kechi kahasa kuchinda chipwe kuhamika.” (Tanga Luka 21:12-15.) Kwamba umwenemwene, musono, Yehova kakuzachisa atu waze akusolola yitanga ngwe ya Ngamaliele hanga akalile atu jenyi, ni kutwala ngaji ni hako akwete hamu hanga akalile ululi. Iye keshi kwecha akwa-kulimika ni yetu hanga akumbe. (Tanga Izaia 54:17.) Mumu niumwe keshi kuhasa kukinda mulimo wa Zambi.

34. Mumu liaka kukumba chetu chakukomwesa, nawa yika yinasolola? (Tala nawa mushete “ Kukumba Ku Yota Yinene Ya Usopeselo Yize Yahanyine Uchela Wa Kwambujola Wanangana.”)

³⁴ Mumu liaka kukumba chetu chakukomwesa? Achinyonga hachino: Yela ja Yehova keshi atu alemu nawa keshi lufuma. Tushi kusakula yoze mapwa nguvulu wa mu chifuchi, tushi kukwasa akwa-mafwefwe ni kulinjisa mu yuma yacho. Chikwo nawa, mandumbu jetu waze asumine mulonga ni kwapatwila ku chota chinene cha chifuchi te kakwamona ngwe atu waze kalilongesele. (Yilinga 4:13) Hachino, atu te kakunyonga ngwo yota yishi yikuma yize muyitwala hanga akalile yela ja Yehova ni kukumba waze te analimika no. Chipwe chocho, chota chakwachile chiyulo chize chatukwashile. Kukumba chetu chakuhana shindakenyo ngwo “kumeso ja Zambi, twakuhanjika muli Kristu.” (2 Kori. 2:17) kashika, ngwe postolo Paulu, twakwamba ni shindakenyo ngwo: “Mwene iye Chikwashi chami; chichi kevwa woma.”—Hepre. 13:6.