Kuchi Munguhasa Kupwa Ni Masepa Apema?
KAPITULU 8
Kuchi Munguhasa Kupwa Ni Masepa Apema?
“Nyi ngunevu uli, mungufupa yoze munguhanjika nenyi. Nyi ngunanenganyana mungufupa yoze mangulweza liji lia utakamiso. Nyi ngunawahilila munguzanga kulweza umwe. Kuli yami chili chilemu chinji kupwa ni masepa.”—Brittany.
ATU amwe kakwamba ngwo twanuke kakufupiwa waze maheha no, alioze akweze kakufupiwa masepa. Kalisa muka uliho?
Mutu yoze wakuheha nenyi ha mashimbu amwe wika keshi sepa lie.
Sepa kali mutu yoze ukwete yitanga yipema ngwe ya yena.
Chikwo nawa, Mbimbiliya yinashindakenya ngwo “sepa lia mutu kakuzanga matangwa eswe; alioze ha tangwa lia lamba he hakusemukina uyaya.” (Yishima 17:17) Chino kota chinasola mutapu wa usepa wahiana uze wanyingikine muze wapwile kanuke!
Umwenemwene: Muze unayi ni kukola, yena mufupiwa masepa waze
1. Akwete yitanga yipema
2. Atwama kulita ni shimbi jipema
3. Makukwasa kupwa ni utu upema
Chihula: Kuchi muhasa kuwana masepa a mutapu au? Tuhengwolenu yikuma yino yitatu.
Chikuma 1: Yitanga yipema
Yize watamba kunyingika: Hi eswe ko akwamba ngwo kali masepa, kapwa lume masepa jetu amwenemwene. Mbimbiliya yakwamba ngwo “yoze malizukila masepa anjianji malikokela kwonwona.” (Yishima 18:24) Muchihasa kusoloka ngwe tunahianyisa. Alioze nyonga hachino: Shina hiunapu kama ni umwe “sepa” yoze wakulingile chipi? Hanji wahanjikile yuma yipi hali yena kuli akwo? Yuma yino muyihasa kukutwala hanga uchine kujikijila hali masepa je. a Iwuluka ngwe, ha chikuma cha masepa, chuma chilemu chili kusakula waze ali ni yitanga yipema hi ko kupwa ni masepa anji.
Yize muhasa kulinga. Sakula masepa waze ali ni yitanga yipema yize muhasa kwimbulula.
“Atu eswe kakuhanjika yuma yipema hakutwala kuli sepa liami Fiona. Ni yami ngunazange aputuke kuhanjika yuma yipema hali yami. Ngunazange kupwa ni lufuma mupema ngwe iye. Chino chakungukomwesa.”—Yvette, miaka 17.
Linga chino.
1. Tanga A-Ngalashia 5:22, 23.
2. Lihule ngwe: ‘Shina masepa jami kali ni yitanga ya “mihuko ya spiritu”?’
3. Soneka mushi majina ja masepa je waze wakuzanga. Sali lia hita jina, soneka yitango yize o akusolola chinji.
Jina
․․․․․
Yitanga
․․․․․
Chiyulo: Nyi wamona ngwo ayo kali ni yitanga yinji yipi, watamba kufupa masepa aha!
Chikuma 2: Atwama kulita ni shimbi jipema
Yize watamba kunyingika. Nyi walipupula hanga upwe ni masepa, muchipwa chashi kusakula masepa waze katelele. Mbimbiliya yakwamba ngwo: “Mweswe malikata ni yihepuke kumakevwa kusasaminya.” (Yishima 13:20) Liji “yihepuke” kuliatalile kuli atu waze keshi ni mana ku shikola hanji waze keshi kusa tachi hanga ande nota jipema. Alioze, linatale hali waze akulinga yuma yipi ni kwecha kulinga yuma yize yalita. Watamba kwehuka masepa a mutapu au.
Yize muhasa kulinga. Sakula masepa, kanda utayiza kulinga usepa ni mutu mweswawo. (Samu 26:4) Chino kuchalumbunukine ngwo uli ni katonde. Alioze, Chinalumbunuka kumona kalisa “hakachi ka akwa ululi ni yingulungulu; hakachi ka mukwa kulingila Zambi ni yoze kamulingilile.”—Malakia 3:18.
“Nakusakwilila chinji yisemi jami hakungukwasa kuwana masepa a miaka yami waze ali kanawa ku ufulielo.”—Christopher, miaka 13.
Kumbulula yihula yino:
Muze nakupwa ni masepa jami, shina nakulipikala nyi ayo mangushinjila hanga ngulinge yuma yipi?
□ Ewa
□ Ka
Shina nakwivwa sonyi ja kusolola masepa jami kuli asoko jami ni kunyonga ngwo hanji yisemi jami kechi kwatayiza?
□ Ewa
□ Ka
Yize muhasa kulinga: Nyi wakumbulula ngwo ewa ha yihula yino, fupa kulikata ni masepa apema, waze ali yilweza yipema ngwe Akwa-Kristu.
Chikuma 3: Waze makukwasa kupwa ni yitanga yipema
Yize watamba kunyingika. Mbimbiliya yakwamba ngwo: “Usepa upi kuwakupihisa ndako jipema.” (1 A-Korindu 15:33) Umwe mukweze avuluka ngwo Lauren kambile ngwenyi: “Alongi-ni-akwetu kapwile ni kungutayiza hanga ngwende no nyi nalinga yuma yize ayo te akuzanga. Amu napwile ni kulivwa ukawami, naputukile kulinga yuma ngwe ayo hanga angutayize.” Lauren kamwene ngwenyi, nyi yena mulinga yeswe yize akwenu mamba, mupwa ngwe ka-boneca ni kukutwala kweswako ayo anazange. Chino kuchatambile kulingiwa kuli yena!
Yize muhasa kulinga. Echa kulikata ni atu waze akukushinjila hanga ulinge yize ayo anazange. Kulinga chino, kota muchikutwala kupwa ni masepa akehe alioze mulivwa kanawa ni kupwa ni masepa apema waze makukwasa kupwa ni yitanga yipema.—A-Roma 12:2.
“Sepa liami Clint kali mutu mupema, yoze uli ni nyonga lialita nawa kakupanjika kanawa atu.”—Jason, miaka 21.
Lihule yihula yino:
Shina nakuzala, kuhanjika hanji kulinga yuma yize kuyalitele hanga nguvwise masepa jami kuwaha?
□ Ewa
□ Ka
Shina nakuya ku yihela kuze akulinga yuma yize kuyalitele mumu lia masepa jami?
□ Ewa
□ Ka
Yize muhasa kulinga: Nyi wakumbulula ngwo ewa ha yihula yino, eta ukwaso kuli yisemi je hanji kuli umwe yoze wajama. Nyi yena uli Chela cha Yehova, eta ukwaso kuli umwe mukulwana wa mu chikungulwila ni kumulweza ngwo unafupiwa ukwaso wenyi hanga uhase kusakula kanawa masepa waze makukwasa kupwa ni yitanga yipema.
TANGA YIKUMA YIKWO HA CHIHANDA 2, KAPITULU 9
Shina mbunge ye hanji umwe yoze wakuliamba ngwo kali sepa lie, kakukushinjila hanga ulinge yuma yipi? Tala chize muhasa kwehuka masepa a mutapu au!
[Maliji ali mushi]
a Yetweswe twakuhengesa. (A-Roma 3:23) Kashika, nyi umwe sepa lie makulemeka ku mbunge, alioze hanyima malikonyeka ni mbunge yeswe, iwuluka ngwe “zango kuliakufuka milonga yinji.”—1 Petulu 4:8.
[Chikuma chilemu]
“Muze yisemi jami angukanjishile kulikata ni masepa amwe, nambile ngwami chisolo masepa akwo, te ngunawahilila ni waze napwile no. Alioze chiyulo cho chapwile chipema, mba yingumona ngwami kuli amwe waze mahasa kupwa masepa apema.”—Cole
[Chizulie]
Nyi mulinga yeswe yize masepa je akwamba hanga akutayize, nyingika ngwe yena mupwa ngwe ka-boneka kaze kakulinga yize mwenyako anazange
Kota Muzanga Chinji Yuma Yize Mumona
AKWEZE
Yize akweze akuhula
Yihula yize akweze akuhula hakutwala ku kulisumbakenya, masepa, yisemi, walwa, ni yuma yikwo nawa.
